Lok Sabha : पत्र देण्याच्या आदल्या दिवसापासूनच शेवाळेंची गटनेता म्हणून नियुक्ती!

नवी दिल्ली : मुख्यमंत्री एकनाथ शिंदे (Eknath Shinde) समर्थक खासदार गटाला आणि राहुल शेवाळे (Rahul Shewale) यांच्या गटनेतेपदाला लोकसभा अध्यक्ष ओम बिर्ला यांनी मंगळवारी (ता. 19) मान्यता दिली आहे. पण आता त्यावरून वाद निर्माण झाला आहे. शिंदे समर्थक खासदारांनी अध्यक्षांना 19 जुलै रोजी पत्र दिलं असताना लोकसभा सचिवालयाने शेवाळे यांचा गटनेता म्हणून उल्लेख 18 जुलैपासूनच केला आहे. (Shiv Sena Latest Marathi News)

शिवसेनेचे खासदार विनायक राऊत (Vinayak Raut) यांनी याबाबतची सर्व पत्र समोर आणली आहेत. राऊत यांनी गुरूवारी दिल्लीत पत्रकार परिषद घेत याबाबत नाराजी व्यक्त केली आहे. ते म्हणाले, आम्ही 18 जुलै रोजी रात्री साडे आठ वाजता लोकसभा अध्यक्षांच्या घरी जाऊन गटनेते पदावर दावा सांगण्यात आला तर आम्हाला आमची बाजू मांडण्याची संधी द्यावी, अशी मागणी केली होती. 19 जुलै रोजीही त्यांना भेटून पत्र दिलं.

लोकसभेच्या पोर्टलवर 20 तारखेला शेवाळे यांच्या गटनेतापदी नियुक्तीचे पत्र आलं आहे. पण आम्हाला 19 तारखेला हे पत्र मिळालं. तर प्रत्यक्षात पक्षाच्या स्थितीबाबतची लोकसभेतील यादी 18 जुलै रोजीची आहे. त्यात शेवाळे हे गटनेता असल्याचे म्हटलं आहे. याचा अर्थ त्यांनी आधीच निर्णय घेऊन ठेवला होता, असा आरोप राऊतांनी केला आहे.

लोकसभा सचिवालयाने 19 जुलैला पत्र काढून 18 जुलैपासून राहुल शेवाळे यांची नियुक्ती केली आहे. हे कृत्य त्यांच्या कोणत्या नियमात बसते, याचे आकलन होत नाही. त्यांना बंडखोर गटाचा गटनेता बनवायचाच होता तर ज्यादिवशी पत्र दिले त्यादिवसापासून नियुक्ती करायला हवी होती.

पण त्यांनी आदल्यादिवसापासूनच ही नियुक्ती पत्रात दाखवली आहे. त्यामुळे पक्षपाती झाला असल्याची शंका शिवसेना खासदारांमध्ये आहे. याबाबत आम्ही लोकसभा अध्यक्षांना लेखी विचारणा करणार असल्याचे राऊतांनी सांगितले.