Amit Shah Controversy : शाहांनी स्टेजवर खडसावलं? महिला नेत्यानं सांगितलं ‘त्या’ व्हिडिओचं सत्य

Tamil Nadu : आंध्र प्रदेशचे मुख्यमंत्री चंद्राबाबू नायडू यांच्या शपथविधीदरम्यान स्टेजवरील राजकीय नाट्याचा एक व्हिडिओ सोशल मीडियात प्रचंड व्हायरल झाला होता. केंद्रीय गृहमंत्री अमित शाह हे तेलंगणाच्या माजी राज्यपाल व भाजप नेत्या तमिलीसाई सुंदरराजन यांच्यावर संतापल्याचे व्हिडिओमध्ये दिसत होते.

शाह आणि तमिलीसाई यांच्यातील संवादाचा व्हिडिओ दोन दिवस सोशल मीडियात व्हायरल होत असताना त्यावर भाजप नेत्यांकडून कोणतीही प्रतिक्रिया देण्यात आली नाही. उलट डीएमकेकडून शाह यांच्यावर टीका करण्यात आली होती.

अखेर गुरूवारी रात्री तमिलीसाई यांनी ‘एक्स’वर पोस्ट करून चर्चेवर पडदा टाकण्याचा प्रयत्न केला आहे. अमित शाहांनी खडसावलं नसल्याचे सूचक विधान त्यांनी केले आहे. त्यांनी आपल्या मतदारसंघात पुन्हा जोमाने काम करण्याचा सल्ला दिल्याचे तमिलीसाई यांनी म्हटले आहे.

तमिलीसाई यांची पोस्ट

तमिलीसाई यांनी म्हटले आहे की, लोकसभा निवडणुकीच्यी निकालानंतर पहिल्यांदा अमित शाहांशी संवाद साधला. निवडणुकीबाबत दोघांमध्ये चर्चा झाली. निवडणुकीनंतर करण्यात आलेली कार्यवाही आणि आगामी काळातील आव्हानांबाबत विचारण्यासाठी शाह यांनी बोलावले. मी विस्ताराने याबाबत सांगत असताना वेळ नसल्याने शाह यांनी अत्यंत गांभीर्याने राजकीय जीवनात आणि मतदारसंघात काम करण्याचा सल्ला दिला. मी हे सर्व चर्चांना पुर्णविराम देण्यासाठी सांगत असल्याचे तमिलीसाई यांनी स्पष्ट केले आहे.

नेमकं काय घडलं होतं?

नायडू यांच्या शपथविधीदरम्यान स्टेजवर शाह तमिलीसाई यांच्याशी संतापून बोलत असल्याचे व्हिडिओमध्ये दिसते. दोघांमधील काही सेकंदाच्या संवादानंतर तर्कवितर्क लढवले जात आहेत. दोघांमधील गंभीर चर्चेला तमिळनाडूतील अंतर्गत वादाची किनार असल्याचे सांगितले जात आहे.

लोकसभा निवडणुकीतील पराभवानंतर तमिलीसाई आणि प्रदेशाध्यक्ष के. अण्णामलाई यांच्यातील वाद समोर आला होता. तमिळनाडूमध्ये भाजपला एकही जागा मिळाली नाही. तसेच मतांची टक्केवारीही अपेक्षित वाढली नाही.

त्यावरून पक्षातील काही नेत्यांनी अण्णामलाई यांच्यावर पराभवाचा ठपका ठेवला आहे. तमिलीसाई यांनीही एका मुलाखतीत अण्णामलाई यांच्यावर निशाणा साधला होता. त्यावरून दोन्ही नेत्यांच्या कार्यकर्त्यांमध्ये सोशल मीडियात आरोप-प्रत्यारोप सुरू आहेत.