Tamil Nadu Government Gold Ring Scheme : निवडणूक प्रचारातील आश्वासनांची पूर्तता करताना, मुख्यमंत्री विजय यांच्या नेतृत्वाखालील सरकारकडून तमिळनाडूमध्ये द्रविड नेते सी. एन. अण्णादुराई यांची जयंती अर्थात १५ सप्टेंबरपासून ‘मामाची अंगठी’ योजना राबविण्यात येणार आहे. यामध्ये सरकारी रुग्णालयांमध्ये जन्मलेल्या नवजात बालकांना एक ग्रॅम सोन्याची अंगठी देण्यात येणार असून, यासाठी दोन आघाडीच्या सोने व्यावसायिकांकडून १.२८ लाख अंगठ्या मागविण्यात आल्या आहेत. यासाठी तमिळनाडू सरकारने २२० कोटी रुपयांची तरतूद केली आहे.
तमिळनाडूमध्ये एप्रिलमध्ये विधानसभा निवडणूक झाली. त्यापूर्वी विजय यांनी या योजनेची घोषणा केली होती. सरकारी रुग्णालयांमध्ये प्रसूतीला प्रोत्साहन देणे आणि सरकारी आरोग्य व्यवस्थेवरील जनतेचा विश्वास वाढवणे, हा या योजनेचा उद्देश आहे. या योजनेच्या अंमलबजावणीसाठी चार महिन्यांसाठी एक लाखांहून अधिक २२ कॅरेट सोन्याच्या अंगठ्यांची आवश्यकता आहे.
विजय यांच्या वाढदिवसापासून म्हणजेच २२ जूनपासून सरकारी रुग्णालयांत जन्मलेल्या बालकांना या योजनेचा लाभ मिळणार आहे. प्रारंभीच्या टप्प्यातील अंगठ्यांची अंतिम किंमत बाजारभावानुसार बदलू शकते. मात्र, प्रचलित बाजारभावानुसार सोन्याची किंमत देण्याची जबाबदारी राज्य सरकारने स्वीकारली आहे.
तामिळनाडू सरकारनं या योजनेसाठी २२० कोटी रुपयांची तरतूद केली असून २२ कॅरेट सोन्याच्या १, २८, ४९९ अंगठ्यांची ऑर्डर देण्यात आली आहे. तामिळनाडू सरकारनं या योजनेसाठी एका वर्षासाठी जवळपास ७५५ कोटी रुपयांची तरतूद केली आहे. तर एका वर्षात ४ लाख ४१ हजार ६६७ सोन्याच्या अंगठ्यांचं वाटप करण्यात येतील असे सरकारचा दावा आहे.
जॉयअलुक्कास, कल्याण ज्वेलरची निवड
‘तमिळनाडू मेडिकल सर्व्हिसेस कॉर्पोरेशन’ने जून ते सप्टेंबर या कालावधीसाठी १, २८, ४९९ सोन्याच्या अंगठ्यांच्या पुरवठ्यासाठी जॉयअलुक्कास आणि कल्याण ज्वेलर्सला ७०:३० या प्रमाणात कार्यादेश दिले आहेत. त्यानुसार जॉयअलुक्कास ८९, ९४९, तर कल्याण ज्वेलर्स ३८, ५५० अंगठ्या पुरवणार आहे.
अंगठ्यांचा पुरवठा करण्यासाठी काढण्यात आलेल्या निविदेत ११ कंपन्यांनी सहभाग घेतला होता. जॉयअलुक्कासने सोन्याच्या एका ग्रॅमच्या किमतीव्यतिरिक्त प्रक्रिया शुल्क, विमा, वाहतूक आणि बीआयएस स्टॅम्पिंगसह इतर सर्व शुल्कांसाठी एक पैसा इतका सर्वांत कमी दर दिला. निविदेतील विजेत्याचा दर संबंधित कायद्यानुसार इतर १० निविदाकारांना कळवण्यात आल्यानंतर कल्याण ज्वेलर्सनेही तोच दर स्वीकारला, असे सरकारने म्हटले आहे.
विरोधकांचा आक्षेप
या योजनेच्या निविदेवरून या आठवड्यात विधानसभेत जोरदार चर्चा झाली. विरोधी पक्षांनी निविदा प्रक्रियेवर प्रश्न उपस्थित करत यशस्वी निविदाकाराने अतिरिक्त शुल्कासाठी केवळ एक पैसा दर देणे हा ‘अत्यंत असामान्य’ प्रकार असल्याचे म्हटले. विरोधकांनी ही खरेदी तमिळनाडू मेडिकल सर्व्हिसेस कॉर्पोरेशनमार्फत का करण्यात आली, असा प्रश्नही उपस्थित केला. या संस्थेची स्थापना प्रामुख्याने औषधे, वैद्यकीय उपकरणे खरेदी करणे आणि आरोग्य सुविधांच्या इमारती बांधण्यासाठी करण्यात आली असल्याचा त्यांचा दावा आहे.