Telangana Assembly Election : निवडणूक आयोगाची मोठी कारवाई, तेलंगणाचे पोलिस महासंचालक निलंबित; रेवंथ रेड्डींची भेट भोवली

Telangana Assembly Elections Results in Marathi : आचारसंहिता उल्लंघन प्रकरणी केंद्रीय निवडणूक आयोगाने तेलंगणामध्ये मोठी कारवाई केली आहे. निवडणूक आयोगाने तेलंगणाचे पोलिस महासंचालक (डीजीपी) अंजनी कुमार यांना निलंबित केले आहे. निवडणूक आयोगाने अंजनी कुमार यांना निलंबित करण्याचे आदेश दिले आहेत. सूत्रांच्या माहितीवरून वृत्तसंस्था पीटीआयने ही माहिती दिली आहे.

तेलंगणाच्या पोलिस महासंचालकांनी राज्य पोलिस नोडल अधिकारी संजय जैन आणि नोडल अधिकारी महेश भागवत यांच्यासोबत हैदराबादमध्ये विधानसभा निवडणुकीतील उमेदवार आणि काँग्रेस प्रदेशाध्यक्ष रेवंथ रेड्डी यांची त्यांच्या निवासस्थानी भेट घेतली. डीजीपी अंजनी कुमार यांनी त्यांना पुष्पगुच्छ भेट दिला.

रेवंथ रेड्डींच्या भेटीनंतर आयोगाची कारवाई

विधानसभा निवडणुकीची मतमोजणी सुरू असताना डीजीपींनी ही भेट घेतली. या भेटीनंतर निवडणूक आयोगाने ही कारवाई केली आहे. विधानसभा निवडणुकीत मध्य प्रदेश, राजस्थान आणि छत्तीसगडमध्ये काँग्रेसचा मोठा पराभव झाला, पण तेलंगणामध्ये काँग्रेसला दिला मिळाला असून, काँग्रेसची वाटचाल बहुमताने सरकार स्थापन करण्याच्या दिशेने होत आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

तेलंगणामधील मतमोजणीत संध्याकाळी ६ वाजेपर्यंत लागलेल्या निकालात २९ जागांवर काँग्रेस विजयी झाली आहे. ३५ जागांवर काँग्रेसचे उमेदवार आघाडीवर आहेत. काँग्रेस विजयी होत असल्याचे पाहून पक्षाचे समर्थक प्रदेशाध्यक्ष रेवंथ रेड्डी यांना शुभेच्छा देत आहेत. याच दरम्यान डीजीपी रेवंथ रेड्डी यांनी घेतलेली भेट चर्चेत आली आहे.

तेलंगणा निवडणुकीत सत्ताधारी बीआरएसला पराभवाचा मोठा झटका बसला आहे. ही बातमी होईपर्यंत बीआरएसने १७ जागा जिंकल्या होत्या, तर २२ जागांवर बीआरएस आघाडीवर होती.