Jalandhar By Election: अरविंद केजरीवालांचा काँग्रेस-भाजपला दणका; लोकसभेच्या पोटनिवडणुकीत 'आप'चा दणदणीत विजय

Punjab News : कर्नाटक विधानसभा निवडणुकीचं चित्र जवळपास स्पष्ट झालं आहे. कर्नाटकात काँग्रेसला जवळपास 137 जागा मिळताना दिसत आहेत. तर भाजपला फक्त 63 जागा मिळताना दिसत आहे. त्यामुळे काँग्रेसचा सत्ता स्थापन करण्याचा मार्ग मोकळा झाला आहे.

दुसरीकडे पंजाबच्या जालंधर लोकसभा मतदारसंघात झालेल्या पोटनिवडणुकीत आम आदमी पार्टीचे सुशील रिंकू यांचा दणदणीत विजय झाला आहे. जालंधर लोकसभा मतदारसंघात भाजप आणि काँग्रेसच्या उमेदवारांचा 'आप'ने पराभव केला आहे.

काँग्रेसचे दिवंगत खासदार संतोख सिंह चौधरी यांचं काही दिवसांपूर्वी निधन झालं होतं. त्यानंतर येथे पोटनिवडणूक जाहीर झाली होती. या निवडणुकीत काँग्रेसने संतोख सिंह चौधरी यांच्या पत्नी करमजीत कौर यांना उमेदवारी दिली होती. मात्र, त्यांचा पराभव झाला असून येथे आम आदमी पार्टीचे सुशील रिंकू विजयी झाले आहेत.

दरम्यान, या पोटनिवडणुकीत दिल्लीचे मुख्यमंत्री अरविंद केजरीवाल आणि पंजाबचे मुख्यमंत्री भगवंत मान यांनी देखील सुशील रिंकू यांचा जोरदार प्रचार केला होता. या पोटनिवडणुकीत सुशील रिंकू हे विजयी झाल्यामुळे पंजाबमध्ये आम आदमी पार्टीचे वर्चस्व आणखी वाढलं आहे.

(Edited By : Ganesh Thombare)