Rahul Gandhi vs Vijay : 2029 मध्ये काहीतरी जादू होईल, अन् विजय..! राहुल गांधींचे नाव घेत मित्रपक्षाच्या आमदाराचा धक्कादायक दावा

Congress TVK alliance news : काँग्रेसकडून पंतप्रधानपदाचे उमेदवार म्हणून राहुल गांधी यांना प्रोजेक्ट केले जात आहे. पण मित्रपक्षालाच राहुल गांधी नको आहेत. तमिळनाडूमध्ये मुख्यमंत्री विजय यांच्या सरकारला काँग्रेसने पाठिंबा दिला आहे. काँग्रेसचे दोन आमदारही ही सरकारमध्ये मंत्री आहेत. मात्र, त्यानंतरही विजय यांच्या टीव्हीके पक्षातील नेत्यांकडून राहुल गांधी यांच्याविरोधात विधाने केली जात आहेत.

विजय हेच २०२९ मध्ये पंतप्रधान पदाचे उमेदवार असतील, असे टीव्हीके पक्षाचे नेते म्हणत आहेत. विशेष म्हणजे राहुल गांधीच त्यासाठी पुढाकार घेतील, असेही नेते म्हणत आहेत. टीव्हीकेच्या आमदार कनीमोझी संतोष यांनी याबाबत धक्कादायक विधान केले आहे.

पंतप्रधान कोण असतील, हे दिल्ली ठरविणार नाही. तामिळनाडू ठरवेल. २०२९ मध्ये विजय हेच पंतप्रधानपदाचे उमेदवार असतील. २०२९ मध्ये काहीतरी जादू होईल आणि राहुल गांधी स्वत: विजय यांना पंतप्रधान करतील, असे कनीमोझी म्हणाले आहेत. यावरून काँग्रेसने टीव्हीकेच्या नेत्यांना खडसावले आहे.

काँग्रेसचे तामिळनाडू विधिमंडळ पक्षाचे नेते थराहई कथबेर्ट यांनी सोमवारी म्हटले होते की, राहुल गांधी यांना आघाडीचे पंतप्रधान पदाचे उमेदवार म्हणून पाठिंबा देण्याचा निर्णय विजय यांनी घेतला आहे. विजय यांना पंतप्रधान पदाचे उमेदवार म्हणणे हे त्यांच्या पक्षातील नेत्यांचे वैयक्तिक मत आहे. मात्र, पक्षनेतृत्वाला तसे वाटत नाही.

दरम्यान, राहुल गांधी आणि विजय हे चांगले मित्र असल्याचे सांगितले जाते. विजय यांच्या शपथविधीवेळी राहुल यांनी त्यांचा 'ब्रदर' असा उल्लेख केला होता. तामिळनाडूच्या विधानसभा निवडणुकीतही दोन्ही नेत्यांनी एकमेकांवर वैयक्तिक टीका केली नव्हती.

विजय यांना अधिकच्या जागा मिळाल्यानंतर काही तासांतच काँग्रेसने त्यांना सरकार स्थापनेसाठी पाठिंबा जाहीर केला होता. मात्र, आता पंतप्रधान पदावरून दोन्ही पक्षातील नेते आमनेसामने उभे ठाकल्याने चर्चांना उधाण आले आहे.