डॉ.अमोल कोल्हेंना फक्त पाहण्यासाठी लोक येतात एवढेच : गिरीश महाजन 

जळगाव :  मुख्यमंत्री देवेंद्र फडणवीस यांच्या जनादेश यात्रेला मिळणाऱ्या प्रतिसादामुळे आता विरोधकांना मिळणाऱ्या जागाचे बदलणारे आकडे  राज्याचे जलसंपदामंत्री गिरीश महाजन  जाहिर करीत आहेत. त्यानुसार त्यांनी आज जळगावच्या जाहिर सभेत विरोधकांना केवळ आता तीसच जागा मिळतील असे भाकित केले आहे.
 
मुख्यमंत्री देवेंद्र फडणवीस यांची महाजनादेश यात्रा आज जळगाव जिल्ह्यात दाखल झाली. सागर पार्क मैदानावर जाहिर सभेचे आयोजन करण्यात आले होते. यावेळी बोलतांना गिरीश महाजन म्हणाले, आमची यात्रा बघून विरोधकही यात्रा काढत आहे. परंतु आता जनता या नेत्यांचे तोंड पहायला येत नाही. नवीन निवडून आलेले खासदार डॉ.अमोल कोल्हे यांना घेवून ते फिरत आहेत. छत्रपती संभाजी मालिकेत त्यांनी काम केलेले असल्याने त्यांना पाहण्यासाठी येतात एवढेच. बाकी राष्ट्रवादीची अवस्था बिकट झाली आहे.

 कॉंग्रेस तर व्हेंटीलेटवरच आहे. त्यामुळे यापूर्वी आपण आघाडीला चाळीस जागा मिळणार असे सांगितले होते. मात्र आता त्यात घसरण झाली असून त्यांना तीस जागाही मोठ्या मुश्किलीने  मिळतील असे चित्र आहे. आमच्या सरकारचे काम दमदार आहे. त्यामुळे विधानसभा निवडणूकीत आम्हीच विजयी होवून पुन्हा सत्तेवर येणार याची आम्हाला खात्री आहे.