नेत्यांचा फिटनेस : बालपणापासूनच योगासने, सूर्यनमस्कार, पेपर व पुस्तक वाचनाची आवड असून विविध खेळातही रूची आहे. नियमित योगा, प्राणायाम व मागील १५ वर्षांपासून सात्त्विक आहार घेत असून यामुळे निरोगी आयुष्य जगण्यासाठी दिवसभर ऊर्जा मिळते.
कामाचा व्याप मोठा असल्याने झोपण्यासाठी रात्री उशीर होत असला, तरी सकाळी किमान ६ ते ६ः३० वाजताच्या दरम्यान उठून मी योग, प्राणायाम करतो. आरोग्य निरोगी ठेवण्यासाठी विविध खेळ, व्यायाम, वॉकिंग तसेच पाच ते सहा तास झोप हाच फिटनेसचा मंत्र आहे. माजी खासदार तथा हळद संशोधन केंद्राचे अध्यक्ष विधान परिषदेचे आमदार हेमंत पाटील आपल्या फिटनेसचे रहस्य उलगडत होते.
मला व्हॉलिबॉल खेळायची आवड आहे. तसेच माझ्याकडे जिल्हा आर्चरी संघटनेचे अध्यक्षपद आहे. महाविद्यालयात प्रवेश घेतल्यानंतर पीएसआय होण्याचे स्वप्न उराशी बाळगून त्या दृष्टीने शारीरिक तंदुरुस्तीसाठी तयारी करायची म्हणून सकाळी चार वाजता उठायचो. विविध खेळामध्ये सहभागी होत असल्याने व्यायामाचीही सवय झाली. २००५ ते २०१३ असे तब्बल आठ वर्षे शिवसेनेचे नांदेड जिल्हाप्रमुख म्हणून काम केले.
या काळात विविध समाजोपयोगी कामे करण्यास प्राधान्य दिले. त्यानंतर २०१४ मध्ये नांदेड दक्षिण मतदारसंघातून विधानसभेत आमदार म्हणून निवडून गेलो. याकाळात शिवसेना पक्षातील पक्षनेतृत्वाचा विश्वासू आणि लोकांची कामे करण्यास सदैव तत्पर असल्याने शिवसेनेने लोकसभेचे तिकीट दिले.
हिंगोलीच्या मतदारांनी २०१९ मध्ये खासदार म्हणून लोकसभेत पाठविले. त्यानंतर, मुख्यमंत्री एकनाथ शिंदे यांनी माझ्यावर विश्वास टाकत २०२४ मध्ये पुन्हा आमदार म्हणून विधान परिषदेवर पाठविले. सध्या बाळासाहेब ठाकरे हळद संशोधन केंद्राच्या अध्यक्षपदासह मराठवाड्यातील पक्षाच्या इतर अनेक जबाबदा-या सांभाळत हिंगोली व नांदेड जिल्‍ह्या‍तील जनतेच्या सेवेत सातत्याने राहून धावपळीच्या दिनचर्येच्या व्यस्ततेतून वेळ काढत आरोग्याकडेही दुर्लक्ष होऊ दिले नाही. त्यामुळे वयाची ५६ वर्षे झाली असली तरी अजूनही बीपी, शुगर व अन्य कुठलेच आजार माझ्याजवळही फिरकले नाहीत.
नियमित लहानपणी विटी दांडू त्यानंतर व्हॉलिबाल, क्रिकेट, कबड्डी या खेळांना वेळ मिळेल तसे प्राधान्य देत समाजकारण व राजकारणाचाही वारसा या क्षेत्रात सक्रीय राहून जपला आहे. जनसंपर्क मोठ्या प्रमाणात वाढल्याने काम वाढले तरीही रोजच्या या धावपळीच्या दिनक्रमात मी माझ्या फिटनेसकडे दुर्लक्ष होऊ दिले नाही.
फिटनेससाठी आठवड्यातून किमान चार दिवस तरी पहाटे ६ ते ६.३० वाजताच उठून तासभर योगा, प्राणायाम यासाठी वेळ देतो. कामानुसार कुठेही असलो तरी आरोग्याकडे कधीच दुर्लक्ष करत नाही. तसेच योग्य आहार व वेळेवर जेवण घेण्याचाही माझा प्रयत्न असतो. ५६ व्या वर्षीही स्वतःचा फिटनेस जपण्यासाठी मी सतत दक्ष असून माझे वजनही नियंत्रणात ठेवण्याचा माझा प्रयत्न असतो. क्रिकेट, कब्बडी, व्हॉलीबॉलसारख्या मैदानी खेळांचीही आवड असल्याने शक्य होईल, त्यावेळी मित्रांसोबत आवर्जून या खेळांमध्ये सहभागी होतो.
रोजच्या कामात कितीही व्यस्त असलो, तरीही दिवसाची सुरुवात मात्र कटाक्षाने नियमित व्यायामाने करतो. रात्री झोपण्यास उशीर झाल्यावर कधीकधी उठायला उशीर होतो. मात्र शक्यतो पहाटे ठरलेल्या वेळीच उठतो. घरी असेल तरी योगा, प्राणायाम, फिरणे अथवा बाहेर असल्यास त्याठिकाणीही योग, प्राणायम थोडावेळ तरी करतो.
त्यानंतरच नियमित कामांना सुरुवात करतो. पहाटे व्यायाम, चांगला आहार व पुरेशी विश्रांती या बाबींचे नियोजन सांभाळून फिटनेस ठेवण्यास प्राधान्य देतो. रोजच्या आहारात मी घरच्या सात्विक जेवणाला प्राधान्य देतो. हॉटेलचे मसालेदार खाणे तसेच चहा, कॉफी कटाक्षाने टाळण्याचा प्रयत्न असतो. सकाळी ज्यूस, फळे यासाठी प्राधान्य देतो. दिवसभरात नाश्ता, दुपारी जेवण व रात्रीचे जेवण असा सात्विक आहार घेताना त्यात ज्वारीची भाकरी, पालेभाज्यांचा समावेश असतो. दिवसभरात घराबाहेर असताना दुपारी व सायंकाळच्या जेवणाच्या वेळा सांभाळणे अवघड होते.
सकाळी उठल्यानंतर वर्तमानपत्राचे वाचन, त्यानंतर जागतिक घडामोडी टीव्हीवर पाहतो, नांदेडमध्ये घरी असल्यावर जवळच असलेल्या शेतात जाऊन चार ते पाच किलोमीटर फिरणे, ऐतिहासिक गोष्टींची माहिती जाणून घेतो. केमिकलयुक्त आहार, बदलत्या जीवनशैलीत व्यायामाचा अभाव, मोबाईलच्या अतिवापरामुळे आरोग्याच्या समस्या वाढत असून विद्यार्थी, युवकांनी याकडे गांभीर्याने लक्ष देणे गरजेचे आहे. मैदानी खेळ तसेच रोजच्या व्यायामामुळेच कामात उत्साह राहून दिवसभर उर्जा मिळते.
(शब्दांकन : रामेश्वर काकडे, नांदेड)
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.