माजी मुख्यमंत्री शिवराजसिंह चाैहान यांना सोनईच्या वडापावची भुरळ

सोनई (नगर) :  मध्य प्रदेशचे माजी मुख्यमंत्री शिवराजसिंह चौहान यांनी कुटुंबासह शनिशिंगणापूरला भेट देऊन शनिमूर्तीचे दर्शन घेतले. येताना त्यांनी सोनईतील एका हातगाडीजवळ उभे राहून वडा-पावचा आस्वाद घेतला.

दर वर्षी शनिदर्शनासाठी येताना माजी मुख्यमंत्री चौहान वंजारवाडी येथे उसाचा रस घेतात, तसेच सोनईतील अशोका हातगाडीजवळ उभे राहून वडा-पावचा आस्वाद घेतात. आज रस्त्यावर गर्दी असतानाही त्यांनी वडा-पाव व लाल चटणीचा आस्वाद घेतला. अशोक व गणेश कुसळकर यांनी त्यांचा सत्कार केला.

दर वर्षी कुटुंब व नातेवाइकांसह चौहान साईबाबा व शनिदर्शनासाठी येतात. काल (मंगळवारी) रात्रीच ते शनिदर्शनासाठी आले होते. उदासी महाराज मठात त्यांनी स्वयंभू शनिमूर्तीला तैलाभिषेक केला. देवस्थानाच्या जनसंपर्क कार्यालयात विश्वस्त शालिनी लांडे व राजेंद्र लांडे यांनी त्यांचा सत्कार केला. मध्य प्रदेशातील जनतेला नवीन वर्ष सुखाचे जावो, अशी प्रार्थना केल्याचे त्यांनी सांगितले. महाराष्ट्रातील सत्तानाट्यावर भाष्य करण्याचे त्यांनी टाळले. येथील पानसनाला प्रकल्प सुंदर असल्याचे कौतुकही त्यांनी केले.