कान्स फिल्म फेस्टिवलमध्ये रेड कार्पेटवर मंत्री अनुराग ठाकूर यांचा जलवा

कान्स चित्रपट महोत्सवाच्या पहिल्या दिवशी देशाचे माहिती आणि प्रसारण मंत्री अनुराग ठाकूर यांनी भारताचे प्रतिनिधित्व केले. महोत्सवातील अनेक क्षण त्यांनी आपल्या सोशल मिडीयावर शेअर केले आहेत.

स्वातंत्र्याच्या अमृत महोत्सवानिमित्त भारतीय चित्रपटसृष्टीला आपला चित्रपट प्रवास, सिनेमाची उत्कृष्टता आणि भारतीय चित्रपटांची ताकद जगभर दाखवण्याची संधी मिळाली आहे. यंदाच्या कान्स महोत्सवात तामिळ, मराठी, मल्याळम आणि हिंदी भाषेतील 6 चित्रपट दाखवले जाणार आहेत.

कान्स महोत्सवात मंत्री अनुराग ठाकूर यांच्यासह संगीतकार ए.आर. रहमान, ग्रॅमी विजेते रिकी केज, गीतकार प्रसून जोशी, शेखर कपूर, नवाजुद्दीन सिद्दीकी, आर.माधवन यांसारखे कलाकार रेड कार्पेटवर दाखल झाले होते.

यादरम्यान मंत्री अनुराग ठाकूर यांंनी मोशन पिक्चर असोसिएशन ऑफ अमेरिकाचे सीईओ चार्ली रिव्हकिन यांच्याशीही संवाद साधला.

कान्स महोत्सवात मंंत्री अनुराग ठाकूर यांनी पूर्णपणे भारतीय पोषाख परिधान केला होता. त्यांचे वस्त्र हा भारतातील विणकर समाजाला दिलेला सन्मान होता. यासोबतच खादी आणि हातमाग उद्योगाचे जगात मूल्य वाढल्याचा संदेशही त्यांनी यातून दिला.

कान्स फिल्म फेस्टिव्हलमध्ये या वेशभूषेत रेड कार्पेटवर येणे म्हणजे पंतप्रधान मोदींच्या 'व्होकल फॉर लोकल' या आवाहनाचा जगात किती प्रभावी परिणाम होत आहे, हेच दिसून येते.

याशिवाय कान्स चित्रपट महोत्सवादरम्यान अनुराग ठाकूर यांच्या वतीने महोत्सवात आलेल्या भारतीय शिष्टमंडळासाठी डिनरचे आयोजन करण्यात आले होते.