Kolhapur : '22 आमदार फुटणार', खैरेंवर काँग्रेस नाराज, महाविकास आघाडीत ठिणगी!

कोल्हापूर : शिवसेना ठाकरे गटाचे नेते चंद्रकांत खैरे यांनी काँग्रेस पक्षाबाबत खळबळजनक दावा केला होता. काँग्रेसचे 22 आमदार फुटणार असे वक्तव्य खैरे यांनी केले आणि यावरून आता राजकीय नाट्य रंगत आहे. काँग्रेसकडूनही प्रतिक्रीया आली आहे. खैरेंनी आपलं वक्तव्य मागं घ्यावं, अशी मागणी काँग्रेसने केली आहे.

खैरेंनी केलेले वक्तव्य संयुक्तिक नाही. त्यांनी आपलं वक्तव्य मागे घ्यावं, अशी मागणी काँग्रेस नेते सतेज पाटील यांनी केली आहे. ते आज पत्रकारांशी बोलत होते. राज्यात सध्या नेत्यांच्या सभांना परवानगी नाकारण्याचा ट्रेन्ड सुरू झाला असल्याचीही टीका त्यांनी केली.

शिंदे गटातील 16 आमदार अपात्र ठरले तरी सरकार पडू नये आणि आपल्याला मुख्यमंत्री पद मिळावे, यासाठी देवेंद्र फडणवीस यांनी काँग्रेसच्या 22 आमदारांची सोय करून ठेवली आहे, असा खळबळजनक गौप्यस्फोट शिवसेना नेते चंद्रकांत खैरे यांनी काल औरंगाबादमध्ये केला होता. याबद्दल सतेज पाटील यांनी नाराजी व्यक्त केली होती.

खैरे यांनी गेली अनेक वर्ष खासदार म्हणून काम केले असून, शिवसेनेचे वरिष्ठ नेते आहेत. राज्यात महाविकास आघाडी म्हणून काम करतांना खैरैंचे हे वक्तव्य योग्य नाही. त्यांन विधान मागे घ्यावे, असे पाटील म्हणाले. सध्या महाराष्ट्रात भारत जोडो यात्रा येत असून, यामध्ये राष्ट्रवादी काँग्रेसचे अध्यक्ष शरद पवार तसेच शिवसेना उद्धव बाळासाहेब ठाकरे पक्षाचे नेते उद्धव ठाकरे हे सर्व सहभागी होत आहेत. अशा वेळी खैरेंनी असे वक्तव्य करून गैरसमज पसरवू नये, असेही मत त्यांनी यावेळी व्यक्त केले.