Abdul Sattar : अब्दुल सत्तारांना शिक्षण मंत्री करतील... पृथ्वीराज चव्हाणांची खोचक टीका

कोल्हापूर : टीईटी घोटाळ्यात माजी मंत्री अब्दुल सत्तार यांच्या मुलांचा समावेश असल्याचं समोर आल्यानंतर ते सरकारमध्ये आहेत, कदाचित त्यांनाच शिक्षण मंत्री करतील, अशी खोचक टीका माजी मुख्यमंत्री पृथ्वीराज चव्हाण यांनी केली आहे.

पृथ्वीराज चव्हाण यांनी कोल्हापूरच्या काँग्रेस कार्यालयात पत्रकारांशी संवाद साधला. टीईटी घोटाळ्यातील अब्दुल सत्तार यांच्या मुलांचा सहभाग असल्याच्या आरोपाबाबत श्री. चव्हाण यांना विचारले असता ते बोलत होते. चव्हाण म्हणाले, शिंदेंनी दोन तृतीयांश आमदार फोडले खरे पण, त्यांनी विलिनीकरणाच्या कायद्याचा अभ्यास केला नव्हता. त्यामुळे आता न्यायालयात हे टिकेल असे वाटत नाही.

सध्या दोनच मंत्र्यावर सरकार सुरू आहे, मंत्री मंडळाच्या निर्णयासाठी किमान 12 मंत्री लागतात. त्यामुळे या दोघांनी घेतलेले निर्णयही बेकायदेशीर ठरतील. पृथ्वीराज चव्हाण यांनी केंद्र सरकारवरही टीका केली, देशाची आर्थिक अवस्था खूप बिकट आहे, मोदी सरकारने मोठ्या प्रमाणात कर्ज काढून ठेवले आहे, विकासदरही कमी आहे. त्यामुळे भविष्यात देशाला मोठ्या संकटाला सामोरे जावे लागेल अशी भीती त्यांनी व्यक्त केली.