Atpadi Khanapur Vidhan Sabha : आटपाडीच्या विकासासाठी सुहास बाबरांना साथ द्या - जयदीप भोसले

आटपाडी : ‘‘आमदार दिवंगत अनिल बाबर यांनी पक्षाची बंधने तोडून तालुक्यात काँग्रेसशी स्नेह ठेवला होता. त्यांनी आमचे प्रश्न सोडवून न्याय दिला. त्यामुळे आटपाडीची काँग्रेस सुहास बाबर यांच्यासमवेत पूर्ण ताकदीने राहील,’’ अशी ग्वाही काँग्रेसचे तालुकाध्यक्ष जयदीप भोसले यांनी दिली.

नेलकरंजी (ता. आटपाडी) येथे जयदीप भोसले यांनी सुहास बाबर यांच्या प्रचारार्थ मेळाव्याचे आयोजन केले होते, त्या वेळी ते बोलत होते. या वेळी सुहास बाबर, जिल्हा बँकेचे संचालक ताराजीराव पाटील, उपसभापती राहुल गायकवाड, सरपंच किरण पवार, माजी सरपच बाबासाहेब भोसले, शशिकांत देठे, विजय मेटकरी प्रमुख उपस्थित होते.

भोसले म्हणाले, ‘‘आमदार दिवंगत अनिल बाबर आणि आम्ही परस्परविरोधी पक्षात होतो. मात्र आमदार बाबर यांनी कधीही दुजाभाव केला नाही. निवडणुकीनंतर सर्व पक्षांना समवेत घेऊन जाण्याची त्यांची भूमिका अन्य राजकर्त्यांसमोर निश्चित आदर्शवत आहे.

त्यांनी आमच्या कार्यकर्त्यांची जबाबदारीने कामे मार्गी लावली. पक्षाच्या चौकटी मोडून आम्हाला सहकार्य केले. त्यामुळे आम्ही विरोधी पक्षात असलो, तरी चांगला स्नेह जुळला होता. याची परतफेड करण्यासाठी आम्ही आणि आमचे कार्यकर्ते सुहास बाबर यांच्यासमवेत पूर्ण ताकदीने राहतील.’’

यावेळी सुहास बाबर म्हणाले, ‘‘दिवंगत अनिल बाबर यांनी सर्व जाती-धर्म, पक्ष असे कसलेही भेद न करता माणसं जोडली ते प्रचारात दिसते. विरोधकांवर टीका आणि त्यांच्या टीकेला प्रत्युत्तर देणार नाही. कारण मतदारांना सांगण्यासाठी आमच्याकडे केलेल्या कामाची यादी भली मोठी आहे.’’

संजय भिंगे, विजय पुजारी, वलवणचे शहाजी शिंदे, मोहन खरात, धावडवाडीचे उमर शेख, सदाशिव ढगे, नाथा पावणे, हणमंत मेटकरी, रावसाहेब मेटकरी, विठ्ठल ढ़बळे, शिवाजी दबडे, भारत वाघमारे आदी उपस्थित होते.