राजकीय समीकरणे बदलू लागली : राजू शेट्टी यांनी राजारामबापू दुध संघात सत्कार स्वीकारला !

इस्लामपुर : सांगली जिल्ह्याच्या राजकारणाची समीकरणे बदलू लागली आहेत . एक वेळेस सूर्य पश्चिमेस उगवेल पण राजू शेट्टी आणि जयंत पाटील कधीही एकत्र येणार नाहीत असे जिल्ह्यातील राजकीय निरीक्षक छाती ठोकून सांगत असत . पण खासदार  राजू शेट्टी यांनी आज चक्क जयंत पाटील यांच्या  राजारामबापू दुध संघात सत्कार स्वीकारला !

एकेकाळी साखर सम्राटांविरुद्ध धडाडणारी स्वाभिमानी शेतकऱ्यांची मुलुख मैदानी तोफ आज साखर सम्राटांशी हस्तांदोलन करीत आहे , ही भाजपमधील चाणक्यांच्या अपयशी विस्तारवादी राजकारणाची फलनिष्पत्तीच मानावी  लागेल . 

ज्यांच्या दिवसाची सुरवात जयंत पाटील यांच्या राजकीय  व सहकारी संस्थांची मापे काढल्याशिवाय झाली नाही असे राजकारणातील पक्के वैरी एकत्र आले आहेत .  गेल्या काही वर्षापासुन एकमेकाना पाण्यात बघणारे जयंत पाटील व राजु शेट्टी हे पश्चिम महाराष्ट्रातील राजकिय पटलावरील प्रमुख नेते . मात्र आज वाळवा तालुक्यातील लोकाना एक वेगळेच चित्र पहावयास मिळाले .

जयंत पाटील  यांचे कट्टर विरोधक मानले गेलेले राजू शेट्टी  आज जयंत पाटील यांच्या राजारामबापू दुध संघात गेले . गाडी  चुकुन आत गेली काय ? असा प्रश्न पडावा इतका हा विरोधाभासी प्रसंग होता .  मात्र , खासदार शेट्टी यानी राजारामबापु दुध संघात जावुन संघाचे अध्यक्ष विनायकराव पाटील यांच्या हस्ते सत्कार स्विकारला . या घटनेने अनेकांच्या भुवया उंचावल्या.

मात्र राजकारणात कोण कुणाचा कायमचा शत्रु अथवा मित्र नसतो  याचा अनुभव आला . आता या भेटीची कारणे अनेक दिली जातील . मतदाराना सांगायला, मात्र इस्लामपुर विधानसभा मतदार संघ व हातकणंगले लोकसभा मतदार संघातील  भविष्यातील राजकारण काय असेल याचा ट्रेलर या घटनेमधुन स्वच्छ दिसतो .

खासदार राजू शेट्टी यांनी भाजपची सांगत पूर्णपणे सोडली आहे हे अलीकडच्या काही दिवसातील घटना घडामोडी पाहता  स्पष्ट होते . मुंबईत भाजप विरोधात 'संविधान बचाव 'च्या निमित्ताने देशातील प्रमुख विरोधी पक्षांना एकत्र आणण्याच्या कामात खासदार राजू शेट्टी यांचा सहभाग तर होताच पण पुढाकार देखील होता .

 खुद्द शरद पवार यांनीच यावर शिक्कामोर्तब करताना राजू शेट्टी आणि जितेंद्र आव्हाड यांनी पुढाकार घेतला होता हे जाहीरपणे सांगितले आहे . त्यानंतर गेल्या आठवड्यात शरद पवार आणि राजू शेट्टी यांच्यात प्रदीर्घ राजकीय चर्चाही झाली . राजू शेट्टी यांच्या अलीकडच्या काळातील राजकीय हालचाली पाहता ते आता भाजपापासून बरेच दूर गेलेले दिसतात .

भाजपच्या चाणक्यांनी सदाभाऊ खोत यांना राजू शेट्टी यांच्यापासून आधी मंत्रिपदाच्या निमित्ताने फोडले . त्यानंतर सदाभाऊ खोत यांना शेतकरी नेता म्हणून  राजू शेट्टी यांच्या विरोधात प्रोजेक्शन देण्याचा प्रयत्न केला . त्यामुळे चवताळले राजू शेट्टी उसळी मारून वर आले असून त्यांनी  संघटनात्मक बळ  आणि आपली प्रतिमा अधिक उंचावण्याचे काम सुरु केले आहे .

त्यामुळे राजकारणातील एकेकाळचे परस्परांचे कट्टर विरोधक असलेले नेते आता जिवलग मित्र बनू लागले आहेत तर सख्खे मित्र केंव्हाच पक्के वैरी बनले आहेत . राजू शेट्टी यांची  राष्ट्रवादी काँग्रेस पक्षबरॊबर वाढत चाललेली जवळीक कोल्हापूर, सांगली, सातारा , सोलापूर ,पुणे ग्रामीण या साखर पट्ट्यात भाजपाला सेट बॅक देणारी तर राष्ट्रवादीचे बाळ वाढविणारी ठरणार आहे .