Amol Kolhe On belgaon : बेळगावचा 'बेळगावी' उल्लेखानंतर अमोल कोल्हेंचा माफिनामा !

Amol Kolhe On belgaon : बेळगावचा बेळगावी असा उल्लेख केल्याप्रकरणी राष्ट्रवादी काँग्रेसचे नेते व शिरूर लोकसभा मतदारसंघाचे खासदार डॉ. अमोल कोल्हे यांनी माफी मागितली आहे. आपल्याकडून अनावधानाने बेळगावचा उल्लेख बेळगावी असा झाला, असं स्पष्टीकरण कोल्हे यांनी दिले आहे. सीमाभागातील मराठी बांधवांनी कायम आपल्याला प्रेम दिलं आहे, असे ही ते म्हणाले.

अमोल कोल्हे म्हणाले, "येत्या पाच तारखेला बेळगावच्या राजहंस गडावर छत्रपती शिवाजी महाराजांच्या पुतळ्याचं अनावरण आहे, असं मला सांगण्यात आलं आहे, म्हणून या कार्यक्रमाला मी येत होतो, परंतु या कार्यक्रमाच्या संदर्भात आता निपाणीमध्ये शिवपुत्र संभाजी महानाट्याला जात असताना घाईमध्ये, अनावधानाने या प्रोगॅमसंदर्भात भाष्य करत असताना, बेळगावचा माझ्याकडून चुकीचा उल्लेख झाला, याबद्दल मराठी बांधवांच्या भावना दुखावल्या असतील, त्या सगळ्यांची मी दिलगिरी व्यक्त करतो. माझी काय भूमिका आहे, ते आजतागायत सर्वांना माहिती आहे. मी आजही त्या भूमिकेवर ठाम आहे."

"आपल्या सीमाभागामध्ये छत्रपती शिवाजी महाराजांचा भव्य पुतळा उभा राहतोय, म्हणून केवळ या कार्यक्रमाला येण्याचं मी कबूल केलं होतं. यामध्ये बेळगावचा माझ्याकडून जो माझ्याकडून अनावधानाने, घाईमध्ये चुकीचा उल्लेख झाला. त्याबद्दल मनापासून सर्वांची दिलगिरी व्यक्त करतो. आपल्या भावना दुखावल्यात्याबद्दल सर्वांची माफी मागतो," असे कोल्हे म्हणाले.