अखेर संजय पांडे पायउतार; राज्याच्या पोलिस दलाला मिळाले नवे बॉस!

मुंबई : महाराष्ट्र राज्याच्या पोलिस महासंचालक पदी (Director general of state) रजनीश सेठ (Rajnish Seth) यांची नियुक्ती करण्यात आली आहे. ते १९८८ च्या बॅचचे आयपीएस अधिकारी आहेत. रजनीश सेठ हे फोर्स वन महाराष्ट्राचे प्रमुख राहिलेले आहेत. याशिवाय गृह विभागाचे प्रधान सचिव म्हणूनही सेठ यांनी जबाबदारी संभाळलेली आहे. आझाद मैदान दंगलीच्या वेळी रजनीश सेठ हे मुंबईचे कायदा आणि सुव्यस्था विभागाचे सहपोलिस आयुक्त होते.

रजनीश सेठ यांच्याव्यतिरीक्त मुंबईचे पोलिस आयुक्त हेमंत नगराळे (Hemnat Nagrale) आणि होम गार्डचे महासंचालक के. व्यंकटेशम यांचेही नाव चर्चेत होते. याआधी तत्कालिन पोलिस महासंचालक हेमंत नगराळे यांची मुंबईच्या पोलिस आयुक्तपदी नियुक्ती करण्यात आल्यानंतर एप्रिल २०२१ पासून त्यांच्या जागी संजय पांडे यांच्याकडे प्रभारी म्हणून पोलिस महासंचालक पदाची सुत्रे देण्यात आली होती.

मात्र राज्याच्या पोलिस महासंचालक पदी कायमस्वरूपी अधिकाऱ्याची नियुक्ती करावी, अशी मागणी मुंबई उच्च न्यायालयात ॲड. दत्ता माने यांनी याचिकेद्वारे केली होती. त्यानंतर उच्च न्यायालयाने सरकारला फटकारलं होतं. याशिवाय केंद्रीय लोकसेवा आयोगानेही संजय पांडे (Sanjay Pandey) या पदासाठी पात्र नसल्याची शिफारस केली होती.

संजय पांडे यांनी सरकारी सेवेतून मध्यंतरात अवकाश घेवून खासगी क्षेत्रात सेवा केली होती. त्यामुळे सुमारे दोन वर्षे सेवेत नसलेल्या अधिकाऱ्याला राज्याच्या पोलिस महासंचालक करण्यास विरोध केला जाईल, अशी भीती व्यक्त केली जात होती. त्याप्रमाणे केंद्रीय लोकसेवा आयोगाने ही भीती अखेर खरी ठरवली होती. यासोबतच महासंचालकपदासाठी रजनीश सेठ, डॉ.वेंकटेशम आणि हेमंत नगराळे या तीन अधिकाऱ्यांच्या नावांची शिफारस देखील आयोगाने केली होती.