BJP News: विधानसभेनंतर भाजपनं निवडणुकीचा पॅटर्न बदलला! कार्यकर्त्यांना दिलं नवं 'टार्गेट',चव्हाणांची फडणवीसांच्या 'होमग्राऊंड'मधूनच मोठी घोषणा

Nagpur News: विविध कार्यक्रमाच्या माध्यमातून वर्षभर राबवून घेण्यात येत असल्याने भाजपचे कार्यकर्ते आधीच वैतागले आहेत. यात आता नवे टार्गेत प्रदेशाध्यक्ष रवींद्र चव्हाण यांनी दिले आहे. वर्षभरानंतर पदवीधर मतदारसंघाची निवडणूक होऊ घातली आहे. त्यापूर्वी येत्या चार महिन्यात महापालिकेची निवडणूक होणार आहे. असे असताना आधी लगीन कोंढाण्याचे लावायचे सोडून पदवीधर निवडणुकीचे कामाला जुंपल्या जात असल्याने भाजपच्या कार्यकर्त्यांमध्ये (BJP) मोठी अस्वस्थता निर्माण झाली आहे.

हजार घरापर्यंत पोहोचा आणि महापालिकेचे तिकीट मिळवा, अशी घोषणा रवींद्र चव्हाण यांनी नागपूरमध्ये केली. पदवीधर निवडणुकीच्या तयारीचा आढावा घेण्यासाठी चव्हाण नागपूरला आले होते. याकरिता शहरातील पदाधिकाऱ्यांना बैठकीसाठी बोलवण्यात आले होते. या बैठकीत त्यांनी पदवीधर निवडणुकीच्या निमित्ताने एक हजार घरांपर्यंत पोहोचा आणि महापालिकेची मिळविण्यासाठी पात्र व्हा अशी योजना जाहीर केली.

महापालिकेची निवडणूक सुमारे साडेतीन वर्षांपासून रखडली आहे. जानेवारी महिन्यात ती होणार आहे. यापूर्वी लोकसभा आणि विधानसभेच्या निवडणुकीत आपल्या उमेदवारांना निवडून आणण्याचे टार्गेट भाजपने दिले होते.

या निवडणुकीत लेखाजोखा महापालिकेच्या निवडणुकीत तिकीट देताना तपासला जाईल असे सांगण्यात आले होते. त्यानंतर पंतप्रधान नरेंद्र मोदी यांनी अकरा वर्षाचा कार्यकाळ पूर्ण केल्यानंतर भाजपने भरगच्च कार्यक्रमांची आखणी केली. कार्यकर्त्यांना कामाला लावले.

लहान मोठ्या सभा घेण्यास लावल्या. या सभेला कार्यकर्ते सोडून कोण किती गर्दी जमवतो हे बघून महापालिकेची तिकीट दिले जाईल असे सांगण्यात आले होते. लगेच निवडणूक जाहीर होईल या आशेने कार्यकर्ते कामाला लागले होते. हा कार्यक्रम संपताच आता नवे टार्गेट देण्यात आले आहे.

भाजप प्रदेशाध्यक्ष रवींद्र चव्हाण(Ravindra Chavan) यांनी शहरातील प्रत्येक बूथवरून किमान शंभर पदवीधरांशी संपर्क केला पाहिजे, त्यांची नोंदणी केली पाहिजे असे आवाहन केले. जो सक्रिय कार्यकर्ता, पदाधिकारी आहे त्याने किमान हजार घरांशी संपर्क केला पाहिजे. हजार घरांपर्यंत संपर्क साधून नोंदणी करणारी व्यक्ती महापालिका उमेदवारी निवडणुकीसाठी मागण्यास पात्र समजली जाईल, असे आवाहन चव्हाण यांनी केले.

भाजपने या निवडणुकीसाठी नोंदणीप्रमुख म्हणून माजी आमदार सुधाकर कोहळे यांची नियुक्ती केली आहे. भाजपचा नोंदणीप्रमुख हाच पदवीधर मतदारसंघाचा उमेदवार असतो. त्यामुळे कोहळे यांचे तिकीट पक्के मानले जात आहे.

विशेष म्हणजे भाजपचे नवनियुक्त शहर अध्यक्षांनी जाहीर केलेल्या कार्यकारिणीवरून मोठा असंतोष आहे. कार्यकारिणीतील पदाधिकाऱ्यांचा आणि कामांचा काही संबंध नसल्याने मोठी नाराजी आहे.