Video Devendra Fadnavis : शिवाजी महाराजांनी सुरत लुटली नाही, देवेंद्र फडणवीसांचा दावा

Devendra Fadnavis News : छत्रपती शिवाजी महाराजांचा पुतळा कोसळल्याप्रकरणी मविआकडून आज (रविवारी) आंदोलन करण्यात आले. हुतात्मा स्मारक ते गेट वे असा मोर्चा काढण्यात आला. या आंदोलनातून महायुती सरकारवर महाविकास आघाडीच्या नेत्यांनी टीका केली.

महाविकास आघाडीच्या आंदोलनाला उत्तर देताना काँग्रेसनेच शिवाजी महाराजांचा अपमान केला आहे. शिवाजी महाराजांनी सुरत लुटली नव्हती. मात्र, काँग्रेसने ते लोकांना इतके वर्ष शिकवले, असा दावा उपमुख्यमंत्री देवेंद्र फडणवीस यांनी केला आहे.

देवेंद्र फडणवीस म्हणाले, स्वातंत्र्यानंतर आजपर्यंत काँग्रेसच्या लोकांनी शिकवले की शिवाजी महाराजांनी सुरत लुटली. पण शिवाजी महाराजांनी कधीच सुरत लुटली नव्हती. सुरतच्या लोकांनी छत्रपती शिवाजी महाराजांचा पुतळा तेथे लावला. शिवाजी महाराजांचा येवढा सन्मान तेथे होता. तरीसुद्धा काँग्रेसने शिवाजी महाराजांनी सुरत लुटली असे शिकवले. याची माफी ते मागणार आहेत का?

शिवाजी महाराज यांचा जो सातत्याने अपमान केला त्यासाठी काँग्रेस आणि महाविकास आघाडीने जगामध्ये जे शिवप्रेमी आहेत त्यांची माफी मागावी, असे देखील फडणवीस म्हणाले.

शाहु महाराजांचे प्रत्युत्तर

पुतळा कोसळल्याप्रकरणी मविआकडून हुतात्मा स्मारक ते गेट वे असा मोर्चा काढला होता. या मोर्चात काँग्रेसचे खासदार शाहु महाराज छत्रपती सहभागी झाले होते. त्यांनी ' आपल्या महाराष्ट्रात पहिल्यांदा कोणी इतिहास लिहिला आणि कोणी इतिहास शिकवला याचे संशोधन करा, या शब्दांत फडणवीसांना प्रत्युत्तर दिले.

भाजपचे 'मविआ' विरोधात आंदोलन

पुतळा कोसळल्याने महाविकास आघाडीकडून आंदोलन केले जात असताना भाजपकडून देखील महाविकास आघाडीच्या विरोधात आंदोलन करण्यात आले. पंतप्रधान नरेंद्र मोदी यांनी माफी मागितली असताना आंदोलन कसले करता. असा सवाल देखील या आंदोलनातून विचारण्यात आला.