Devendra Fadnavis Letter : 'ओला दुष्काळ' जाहीर करा, फडणवीसांचे जुने पत्र व्हायरल; वडेट्टीवारांचा थेट मुळावर घाव!

Vijay Wadettiwar News : मुख्यमंत्री देवेंद्र फडणवीस यांनी अतिवृष्टीने झालेल्या नुकसानीबाबत बोलताना ओला दुष्काळ हा शब्द वापरता येणार नाही. तो बोलीभाषेतील शब्द असून नियमावलीत असा शब्द नाही, असे सांगितले होते. आपत्ती व्यवस्थापन (मॅन्यूअल) मध्ये देखील असा शब्द नसल्याचे म्हटले होते.

फडणवीस यांच्या या वक्तव्यानंतर काँग्रेस नेते विजय वडेट्टीवार यांनी फडणवीस विरोधी पक्षनेते असताना त्यांनी ओला दुष्काळ जाहीर करण्यासंदर्भात तत्कालीन मुख्यमंत्री उद्धव ठाकरे यांना लिहिलेल पत्रच आपल्या ट्विटवरून शेअर करत फडणवीस शब्दांचा खेळ करत असल्याची टीका केली.

वडेट्टीवार म्हणाले, तत्कालीन विरोधी पक्षनेते देवेंद्र फडणवीस यांनी १६ ऑक्टोबर २०२० मध्ये मुख्यमंत्री उद्धव ठाकरे यांना राज्यात ओला दुष्काळ जाहीर करण्याची मागणी करत पत्र लिहिले होते.आज त्यापेक्षा दहा पटीने गंभीर परिस्थिती राज्यात निर्माण झाली आहे म्हणून आम्ही जेव्हा ओला दुष्काळ जाहीर करण्याची मागणी करतो, तेव्हा मुख्यमंत्री फडणवीस सांगतात ओला दुष्काळ ही संकल्पना नाही, नियमावलीत असा शब्द नाही, ओला दुष्काळ कधीच जाहीर केलेला नाही!'

'मग प्रश्न असा आहे की, विरोधी पक्षनेते असताना ओला दुष्काळ ही संकल्पना होती, आणि सत्तेत आल्यानंतर ती संकल्पना नष्ट होते का? शब्दांचा खेळ करून शेतकऱ्यांच्या जखमेवर मीठ चोळू नये. आज शेतकरी संकटात आहे. त्याला निकषांपुढे जाऊन, सरसकट व भरीव मदत देणे ही सरकारची जबाबदारी आहे.', असे देखील ते म्हणाले.

किती दिवस वेड्यात काढणार?

राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी शेतकऱ्यांच्या मदतीवरून सरकारला सुनावले आहे. ते म्हणाले, मुख्यमंत्र्यांच्या बेडसाठी लाखो रुपयांचा तर निनावी जाहिरातींसाठी कोट्यवधी रुपयांचा चुराडा केला जातो. दोन्ही हातांनी मलिदा खाता यावा म्हणून पुण्याचा रिंग रोड १७ हजार कोटींवरून ४२ हजार कोटींवर नेता येतो, एमएसआयडीसीमार्फत २५ हजार कोटींच्या वर्क ऑर्डर देता येतात, महामार्गाचं टेंडर १५ टक्क्यांनी वाढवता येतं, निवडणुकीत उमेदवारांना खोकेच्या खोके देता येतात, पण सामान्य जनतेला द्यायची वेळ आली की मात्र तिजोरीत खडखडाट असतो. अजून किती दिवस महाराष्ट्राला वेड्यात काढणार?