Sarkarnama Updates : ...तर भाजप पश्चिम बंगालमध्ये सत्तेत येणार, एटीएसची पडघामध्ये धाड - वाचा महत्वाच्या घडामोडी

पश्चिम बंगालमध्ये भाजप सत्तेवर येईल, असा दावा अमित शाह यांनी केला आहे. यावर बोलताना अमित शाहांच्या दाव्यात तथ्य आहे कारण महाराष्ट्रातील ईव्हीएम पश्चिम बंगालला पाठवण्यात येणार आहेत, असा टोला शिवसेना उद्धव बाळासाहेब ठाकरे पक्षाचे खासदार संजय राऊत यांनी लगावला

चंद्रकांत पाटील आणि भाजपच्या प्रमुख नेते आणि पदाधिकारी यांनी घेतली पुणे महापालिकेच्या नवनियुक्त आयुक्त नवल किशोर राम यांची भेट घेतली. प्रभागरचना आणि निवडणूक आयोगाकडून आलेल्या सूचनांवर चंदकांत पाटील यांची नवल किशोर राम यांच्याशी चर्चा गेल्या ३ वर्षांपासून नगरसेवक नसल्याची खंत, चंद्रकांत पाटील यांनी आयुक्तांना बोलून दाखवली.

मंत्रिपदाचे वाटप होऊन चार महिने झाले तरी राज्यमंत्र्यांना अधिकार मिळाले नाहीत. कॅबिनेट मंत्री राज्यमंत्र्यांना अधिकार देत नसल्याची चर्चा आहे. आपल्याला काहीच अधिकार नसल्याचे सांगत काही राज्यमंत्र्यांनी थेट मुख्यमंत्री देवेंद्र फडणवीस यांच्याकडे तक्रार केल्याचे सांगितले जात आहे.

ठाण्यातील पडघामध्ये महाराष्ट्र एटीएसने दहशतवादाशी संबंधित प्रकरणात छापेमारी केली. एटीएसने ३००३ च्या मुंबई बॉम्बस्फोट प्रकरणातील दोषी आणि सिमी या संघटनेचा माजी पदाधिकारी साकिब नाचन याच्या घराचीही झडती घेतली. साकिब नाचन याने २०१७ मध्ये आपलं शिक्षण पूर्ण केल्यानंतर पुन्हा दहशतवादी कारवायांमध्ये सहभागी झाल्याचा संशय एटीएसला आहे. 

आळंदी रोड येथील भारतरत्न डॉ बाबासाहेब आंबेडकर बीआरटीबस्टॉप चौकात ठेकेदारने वाहतूक विभागाची परवानगी न घेता ड्रेनेजचे काम तर केले. या कामाने रस्ता नादुरस्त झाला आहे. रस्त्यावरील खड्डे देखील तसचे आहेत. त्यामुळे काँग्रेसचे वडगावशेरी उपाध्यक्ष सचिन भोसले यांनी त्या तुटलेले ड्रेनेज वर बसून प्रतिकात्मक भ्रष्टाचाराचे मासे पकडून वेगळ्या पद्धतीने निषेध व्यक्त केला. तसेच ड्रेनेज पुन्हा दुरुस्त करा अशी मागणी केली.

दुर्गराज रायगड येथे भारतीय पुरातत्त्व विभाग व रायगड विकास प्राधिकरण यांच्या संयुक्त विद्यमाने सुरू असलेल्या उत्खनन प्रक्रियेमध्ये गडावर प्राचीन ‘यंत्रराज’ सौम्ययंत्र (Astrolabe) हे खगोलशास्त्रीय उपकरण सापडले आहे. संभाजीराजे छत्रपती यांनी आपल्या फेसबूक पोस्टद्वारे ही माहिती देत यंत्रराजचा फोटो देखील शेअर केला आहे.

खगोलशत्रीय अभ्यास करून तत्कालीन अत्याधुनिक व शास्त्रोक्त पद्धतीने दुर्गराज रायगडाचे बांधकाम झाले होते, याबाबतचा महत्त्वपूर्ण पुरावा मिळून आला आहे, असे संभाजीराजे म्हणाले. प्राचीन कालखंडापासून ग्रहताऱ्यांच्या अभ्यासासाठी, दिशांचा वेध घेण्यासाठी तसेच वेळ मोजण्यासाठी वापरण्यात येणारे महत्वाचे यंत्र म्हणजे 'Astrolabe'. याला ‘यंत्रराज’ या नावानेही ओळखतात.

अक्षांश, रेखांश, कर्कवृत्त, विषुववृत्त यांसारख्या गोष्टींचा अभ्यास करणे सोपे व्हावे म्हणून या यंत्राचा वापर केला जात असे. दुर्गराज रायगडाचे बांधकाम करीत असताना खगोलशास्त्रीय अभ्यास करण्यासाठी या यंत्राचा वापर झाला असण्याची शक्यता आहे.

अकोला शहरातील रद्द झालेल्या जन्म प्रमाणपत्र प्रकरणी एमआयएमने आक्रमक भूमिका घेतली आहे. जिल्हाधिकारी कार्यालयात ठिय्या आंदोलन करत हा निर्णय रद्द करण्याची मागणी केली. अधिकाऱ्यांनी आंदोलनकर्त्यांसोबत चर्चा केली. कागदपत्रांची पूर्तता केल्यानंतर पुन्हा प्रमाणपत्र मिळू शकेल, असे अधिकाऱ्यांनी सांगितले. तर, यावर तातडीने तोडगा न काढल्यास पुन्हा तीव्र आंदोलनाचा इशारा एमआयएमने दिला.