HSC Exam News: बारावीच्या परीक्षेची तयारी पूर्ण करून अर्ज भरण्याच्या टप्प्यावर आलेल्या हजारो विद्यार्थ्यांसमोर आता नवे संकट उभे राहिले आहे. अकरावीच्या प्रवेशावेळी ऑनलाइन नोंदणी न झाल्याने राज्यातील तब्बल १८ हजार ५३४ विद्यार्थ्यांना बारावीच्या परीक्षेचा अर्ज भरताना अडचणींचा सामना करावा लागत आहे. राज्यातील आठ विभागांमधील १ हजार २१८ कनिष्ठ महाविद्यालयांशी संबंधित हा प्रश्न असल्याने शिक्षण विभागाच्या कार्यपद्धतीवर प्रश्न उपस्थित होत आहेत.
अकरावी आणि बारावी या दोन वर्षांत विद्यार्थ्यांनी परीक्षेच्या दृष्टीने अभ्यास केला. मात्र, बारावीच्या परीक्षेसाठी अर्ज भरताना प्रशासकीय प्रक्रियेतील त्रुटी समोर आल्याने विद्यार्थ्यांची चिंता वाढली आहे. अकरावीला काही विद्यार्थ्यांना ऑनलाइन प्रवेशाऐवजी ऑफलाइन पद्धतीने प्रवेश देण्यात आला. त्यामुळे संबंधित विद्यार्थ्यांची नोंद UDISE+ प्रणालीमध्ये झाली नसल्याचे सांगितले जात आहे. याचा परिणाम आता बारावीच्या परीक्षा अर्ज प्रक्रियेवर होत आहे.
UDISE+ ही केंद्र सरकारची शालेय शिक्षणाशी संबंधित माहिती संकलित करणारी डिजिटल प्रणाली आहे. विद्यार्थ्यांची नोंद या प्रणालीमध्ये उपलब्ध नसल्यामुळे परीक्षा अर्ज भरताना अडथळे निर्माण होत असल्याची परिस्थिती आहे. त्यामुळे संबंधित विद्यार्थ्यांची नोंदणी पूर्ण करून त्यांना अर्ज भरण्याची सुविधा उपलब्ध करून देण्याचे आव्हान शिक्षण विभागासमोर उभे राहिले आहे.
विभागनिहाय आकडेवारीनुसार, मुंबई विभागाला या समस्येचा सर्वाधिक फटका बसला आहे. येथील १९३ कनिष्ठ महाविद्यालयांमधील ६ हजार ४७८ विद्यार्थ्यांच्या परीक्षा अर्जाचा प्रश्न निर्माण झाला आहे. पुणे विभागातील १७७ महाविद्यालयांमधील २ हजार ५९३ विद्यार्थी, तर नाशिक विभागातील ११८ महाविद्यालयांमधील २ हजार २०६ विद्यार्थी प्रभावित झाले आहेत.
नागपूर विभागात १७८ महाविद्यालयांतील १ हजार ९४५ विद्यार्थी, छत्रपती संभाजीनगर विभागात १७५ महाविद्यालयांतील १ हजार ७१८ विद्यार्थी आणि कोल्हापूर विभागातील १७० महाविद्यालयांमधील १ हजार ६११ विद्यार्थ्यांना या अडचणीचा सामना करावा लागत आहे.
अमरावती विभागातील १२४ महाविद्यालयांमधील १ हजार १३७ विद्यार्थी, तर लातूर विभागातील ८३ महाविद्यालयांमधील ८४६ विद्यार्थीही या प्रक्रियेत अडकले आहेत. अशा प्रकारे राज्यातील आठ विभागांमध्ये मिळून १८ हजार ५३४ विद्यार्थ्यांचा प्रश्न निर्माण झाला आहे.
परीक्षेची तयारी केलेली असतानाही केवळ नोंदणीतील त्रुटींमुळे अर्ज भरता येत नसल्याने विद्यार्थ्यांमध्ये चिंता आणि नाराजी आहे. वेळेत हा प्रश्न सुटला नाही, तर त्यांच्या परीक्षेवर आणि पुढील शैक्षणिक नियोजनावर परिणाम होण्याची शक्यता आहे.
त्यामुळे शिक्षण विभागाने तातडीने हस्तक्षेप करून संबंधित विद्यार्थ्यांची UDISE+ नोंदणी पूर्ण करण्यासाठी उपाययोजना करणे आवश्यक आहे. तसेच, या विद्यार्थ्यांना बारावीचा परीक्षा अर्ज भरता यावा, यासाठी योग्य कार्यवाही करणे महत्त्वाचे ठरणार आहे. अन्यथा प्रशासकीय त्रुटींचा फटका विद्यार्थ्यांच्या शैक्षणिक भवितव्याला बसू शकतो.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.