दरवाजा उघडला अन्...बंद खोलीत आढळला महिला वनरक्षकाचा मृतदेह; समोर आलेला प्रकार पाहून परिसर सुन्न!

सिंधुदुर्ग जिल्ह्यातील आंबोली परिसरात 22 वर्षीय महिला वनरक्षकाचा मृतदेह राहत्या घरात आढळून आल्याने खळबळ उडाली आहे. आंबोली वन परिमंडळातील केसरी येथे वनरक्षक म्हणून कार्यरत असलेल्या आश्लेषा सागर मांगले यांचा संशयास्पद परिस्थितीत मृत्यू झाला. त्या मूळच्या आजरा, कोल्हापूर येथील रहिवासी होत्या.

आश्लेषा मांगले या माडखोल धवडकी येथे पूजा गोवेकर यांच्या घरात भाड्याने राहत होत्या. रविवारी त्यांची सुट्टी असल्याने त्या दिवसभर खोलीतच होत्या. मात्र, बराच वेळ झाला तरी त्या घराबाहेर न आल्याने घरमालकांना संशय आला.

घरमालकांनी आश्लेषा यांच्या खोलीचा दरवाजा ठोठावला. मात्र, वारंवार दरवाजा ठोठावूनही आतून कोणताही प्रतिसाद मिळाला नाही. त्यामुळे अखेर दरवाजा तोडून घरात प्रवेश करण्यात आला. त्यावेळी आश्लेषा लटकलेल्या अवस्थेत आढळून आल्या. हे दृश्य पाहून घरमालकांना मोठा धक्का बसला.

ही घटना रविवारी दुपारी सुमारे 2.30 वाजण्याच्या सुमारास घडल्याची माहिती आहे. आश्लेषा यांनी ओढणीच्या साहाय्याने गळफास घेतल्याचे प्राथमिक माहितीतून समोर आले आहे. मात्र, त्यांनी हे टोकाचे पाऊल नेमके कोणत्या कारणातून उचलले, याचे कारण अद्याप स्पष्ट झालेले नाही.

आश्लेषा मांगले या सुमारे 3 वर्षांपूर्वी सिंधुदुर्ग वन विभागाच्या सेवेत रुजू झाल्या होत्या. त्यांच्याकडे आंबोली वन परिक्षेत्रातील केसरी वनरक्षक पदाची जबाबदारी होती. त्यामुळे त्यांच्या अचानक झालेल्या मृत्यूने वन विभागासह परिसरात हळहळ व्यक्त होत आहे.

घटनेची माहिती मिळताच सहाय्यक पोलीस निरीक्षक हर्षद हिंगे, पोलीस उपनिरीक्षक माधुरी मुळीक आणि पोलीस महेश जाधव यांनी घटनास्थळी धाव घेतली. पोलिसांनी घटनास्थळाचा पंचनामा केला. तसेच वनविभागाच्या देवसू येथील अधिकाऱ्यांनाही घटनास्थळी बोलावण्यात आले.

घरमालक पूजा गोवेकर यांनी दिलेल्या खबरीनंतर पोलिसांनी आकस्मिक मृत्यूची नोंद केली आहे. या घटनेचा पुढील तपास पोलीस उपनिरीक्षक माधुरी मुळीक करत आहेत. आश्लेषा यांच्या मृत्यूमागील नेमके कारण तपासातून स्पष्ट होणार आहे.