BJP War Room : कोकणातील नेत्याच्या खांद्यावर भाजपच्या वॉर रूमची जबाबदारी!

कुडाळ (जि. सिंधुदुर्ग) : भारतीय जनता पक्षाच्या (BJP) प्रदेश सोशल मीडिया आणि मीडिया मॅनेजमेंट वॉर रूमच्या प्रमुखपदी सिंधुदुर्ग (Sindhudurg) जिल्ह्यातील अविनाश पराडकर यांची नियुक्ती करण्यात आली. भाजपचे प्रदेशाध्यक्ष चंद्रशेखर बावनकुळे (Chandrashekhar Bawankule) यांनी ही नियुक्ती प्रदेश कार्यालयातून जाहीर केली आहे. (Avinash Paradkar appointed as BJP War Room Chief)

मीडिया वॉर रूम ही भाजपची महत्वाकांक्षी योजना असून त्यावर भाजपची केंद्रीय व प्रदेश यंत्रणा समन्वय राखून एकत्रित काम करत आहे. संपूर्ण राज्यात सोशल मीडिया यंत्रणा भक्कम करण्यात येत आहे. या वॉर रूमवर पराडकर यांची झालेली नियुक्ती सिंधुदुर्ग जिल्ह्यासाठी अभिमानास्पद असून भाजप कार्यकर्त्यांनी व सिंधुदुर्ग सोशल मीडिया टीमने त्याचा आनंद व्यक्त केला आहे.

चांगल्या कामाची दखल भाजपत निश्चितच घेतली जाते, हे यातून दिसून आले, असे मत सिंधुदुर्ग सोशल मिडिया जिल्हा संयोजक समीर प्रभुगावकर यांनी व्यक्त केले आहे. पराडकर यांनी यापूर्वी सिंधुदुर्ग जिल्हा संयोजक म्हणून जबाबदारी यशस्वीपणे पार पाडली होती. त्यानंतर रत्नागिरी-सिंधुदुर्ग लोकसभा मतदारसंघासाठी संयोजक म्हणून त्यांची नियुक्ती करण्यात आली होती.

नुकताच प्रदेशाध्यक्ष बावनकुळे यांचा सिंधुदुर्ग जिल्हा दौरा झाला त्यावेळी त्यांनी सोशल मीडियाच्या बैठकीत पराडकर यांच्यावर प्रदेशाची महत्वाची जबाबदारी देण्यात येणार असल्याचे सूतोवाच केले होते. त्यानुसार बुधवारी त्यांनी पराडकर यांच्या वॉररूम प्रमुखपदाच्या नियुक्तीची घोषणा करत सिंधुदुर्ग जिल्ह्याला सुखद धक्का दिला आहे.