Gram Panchayat Results : वैभववाडीत ठाकरे गटाला जोरदार धक्का : राणेंनी गड राखला, तर 'नांदगाव'मध्ये...

Gram Pachayat Election : सिंधुदुर्ग जिल्ह्यातील वैभववाडी तालुक्यात 17 ग्रामपंचायतीच्या निवडणुका जाहीर झाल्यानंतर, या निवडणुका आगामी जिल्हा परिषद आणि पंचायत समितीच्या निवडणुकींची रंगीत तालीम म्हणूनच या निवडणुकीकडे पाहिले जात होते. यामध्ये आता भाजपान निर्विवाद वर्चस्व राखले आहे. 17 पैकी 14 ग्रामपंचायतीवर भाजपाची सत्ता आली.

भाजपा नेते व आमदार नितेश राणे (Nitesh Rane) यांच्या नेतृत्वाखाली वैभववाडी तालुक्याच्या निवडणुका लढल्या. जिल्हा परिषद आणि पंचायत समितीचीच पूर्व तयारी या निमित्ताने झाली. नितेश राणे यांनी अगोदरच 17 पैकी 5 ग्रामपंचायती बिनविरोध निवडून आणल्या होत्या, आज निकाल लागल्यानंतर आणखी 9 ग्रामपंचायती भाजपाने मिळवल्या असल्याचं स्पष्ट झालं. वैभववाडी तालुक्यात दोन ग्रामपंचायती ग्रामविकास पॅनलला मिळाल्या तर शिंदे गटाला एक ग्रामपंचायत मिळाली. या निकालाने वैभववाडी तालुक्यात भाजपाची ताकद जास्त असल्याचं स्पष्ट होत आहे.

दरम्यान, निवडणूक प्रचारादरम्यान नितेश राणे यांचे विधान वादग्रस्त ठरले होते. यावेळी नितेश राणे यांनी ग्रामपंचायत निवडणुकीच्या प्रचारादरम्यान ग्रामस्थांना दम दिला होता. सरपंच आपल्या मर्जीतील नसल्यास सरकारी निधीतून एक पैसाही मिळणार नाही, असे त्यांनी म्हटले आहे.

नांदगाव येथील निवडणूक सभेत नितेश राणे म्हणाले की, ग्रामस्थांनी चुकूनही आपल्या मर्जीचा सरपंच निवडून दिला नाही तर शासनाचा निधी गावात पोहोचू देणार नाही आणि हे गाव विकासापासून दूरच राहील. या रॅलीच्या वेळी ग्रामस्थ व सरपंच उपस्थित होते. या वादग्रस्त विधानानंतरही राणे आणि भाजपने नांदगाव ग्रामपंचायतीवर वर्चस्व राखले आहे.