Ramdas Kadam : शिवसेना ठाकरे गटाचे प्रमुख उद्धव ठाकरे (Uddhav Thackeray) यांची आज (ता. ५ मार्च) खेडमध्ये माजी आमदार संजय कदम यांच्या प्रवेशानिमित्त सभा होणार आहे. शिवसेनेला सोडचिठ्ठी देऊन शिंदे गटात गेलेले माजी मंत्री रामदास कदम आणि त्यांचे चिरंजीव योगेश कदम यांच्या होम ग्राउंडवर ठाकरेंची सभा होत आहे. ही सभा ऐतिहासिक व रेकॉर्डब्रेक व्हावी, असा आदेश मातोश्रीवरून देण्यात आला आहे. मात्र ठाकरेंच्या सभेपूर्वीच राजकीय टीका टिपण्णी सुरू झाली आहे.
उद्धव ठाकरे यांचं भाषण सुरू होण्यापूर्वी ठाकरे गटाचे नेते भास्कर जाधव य़ांनी शिंदे गटाचे नेते रामदास कदम यांना डिवचले आहे. भास्कर जाधव म्हणाले, "इथे काही लोक आम्हाला काही सांगतात. तो एक पिक्चर होता झपाटलेला, त्यातला हा रामदास कदम त्यातला तात्याविंचू आहे. यांचा एक कलमी कार्यक्रम आहे. मला उद्धव साहेबांनी संपवलं. खंरं तर उद्धव ठाकरेंनी असली बांडगूळं पाळली ना, ते देवालाचा माहिती. रामदास कदम रोज बोलतो,आदित्य ठाकरेंनी माझं खातं पळवलं. अरे तुला पर्यावरण शब्द तरी बोलता येतं का रे?" असा एकेरी उल्लेख करत भास्कर जाधव यांनी रामदास कदमांवर घणाघात केला.
काय म्हणाले होते रामदास कदम?
सभेपूर्वी रामदास कदम यांनी ठाकरेंवर निशाणा साधला आहे. कदम म्हणाले, "आज सायंकाळी कोकणातील खेडच्या गोळीबार मैदानात उद्धवजी ठाकरे यांची जाहीर सभा आहे. या सभेला पूर्ण संपूर्ण महाराष्ट्रातून शिवसैनिकांना बोलवण्यात आलेलं आहे. कारण त्यांना कल्पना आहे की, खेड हा रामदास कदमांचा बालेकिल्ला आहे. म्हणून ठाकरेंच्या या सभेला स्थानिक जनता येणार नाही. म्हणून या सभेला मुंबई, ठाणे, नवी मुंबई, रायगड, रत्नागिरी, सिंधुदुर्ग, सांगली, सातारा, कोल्हापूर येथून शिवसैनिकांना बोलवण्यात आलं आहे. म्हणजे रामदास कदमांना किती महत्त्व आहे, हेच यातून स्पष्ट होतेय."
"अनिल परबला इथे पालकमंत्री केल्यानंतर योगेश कदमला संपवायचंय आणि संजय कदमला तिकीट देवून पुढे आणायचंय, हा अट्टाहास त्यांचा कायमचा होता.पण उद्धवजी तुम्हाला एक सांगतो. तुम्ही एक वेळा नाही, शंभरवेळा जरी खेडला आलात तरी योगेश कदम पन्नास हजार मतांनी निवडून आल्याशिवाय राहणार नाही. असे कितीही चिनपाट जरी आले, तरी त्याला आम्ही भीक घालत नाही," असा इशाराही त्यांनी यावेळी दिला.
सरकारनामाचे सदस्य व्हा
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.