मानेशिंदे म्हणाले, राणेंनी कोकण रेल्वेने प्रवास केला म्हणून रेल्वेगाडीची तपासणी करणार का?

सिंधुदुर्ग : शिवसेना (Shivsena) कार्यकर्ते संतोष परब हल्लाप्रकरणी भाजपचे (BJP) आमदार नितेश राणे (Nitesh Rane) अडचणीत आले आहेत. त्यांच्या जामिनावरील आजच्या सुनावणीवेळी राणेंचे वकील सतीश मानेशिंदे आणि सरकारी वकिलांनी जोरदार युक्तिवाद केला. आरोपीने कोकण रेल्वेने प्रवास केला म्हणून संपूर्ण गाडीची तपासणी करणार का, असा प्रश्न मानेशिंदे यांनी उपस्थित केला. दरम्यान, राणेंच्या जामिनावरील युक्तिवाद पूर्ण झाला असून, यावर न्यायालय उद्या (ता.9) फैसला सुनावणार आहे.

आजच्या सुनावणीला नितेश राणेंचे बंधू माजी खासदार निलेश राणे हे वकील सतीश मानेशिंदे आणि संग्राम देसाई यांच्यासह न्यायालयात हजर झाले. सुरवातीला सतीश मानेशिंदे आणि संग्राम देसाई यांनी बाजू मांडली. सरकारी वकील प्रदीप घरत हे जामीन मिळू नये यासाठी वेळकाढूपणा करत असल्याचा आरोप मानेशिंदे यांनी केला. सरकारी वकीलांनी व्हॅनिटी व्हॅनमध्ये मारहाणीचा कट रचल्याचा दावा करत व्हॅनिटी व्हॅन तपासण्याची मागणी केली. याला मानेशिंदे यांनी आक्षेप घेतला. कोकण रेल्वेमधूनही प्रवास केल्याने कोकण रेल्वेच्या गाडीची तपासणी करणार का? असा प्रश्न त्यांनी केला. परब यांच्यावरील हल्ल्यानंतर तपासापूर्वीच राणे यांचं नाव माध्यमांसोर जाहीर करण्यात आले, अशी तक्रारही मानेशिंदे यांनी केली. सरकारी पक्षाने वेळकाढूपणा केला असून, राणेंना आता जामीन मिळावा, अशी विनंती त्यांनी केली.

मानेशिंदे यांच्यानंतर वकील देसाई यांनीही युक्तिवाद केला. ते म्हणाले की, राकेश परब यांनी त्यांचे मोबाईल पोलिसांकडे दिले आहेत. व्हॅनिटी व्हॅन चालकानेही पोलिसांना सर्व कागदपत्रे दिली आहेत. पैशांची देवाणघेवा झाल्याचा पोलिसांच्या तपासात उल्लेख झालेला नाही. राणे हे जामीन मिळाल्यास बाहेर येऊन इतरांना धमकावतील, असा आरोप सरकारी पक्ष करीत आहे. राणेंची अशी कोणतीही पार्श्वभूमी नसून त्यांना जामीन मिळावा.

परब यांना गंभीर जखम झाली नसल्याचे राणेंच्या वकिलांनी सांगितले. त्यावर परब यांच्या छातीवर गंभीर जखम करुन मारण्याचा प्रयत्न मारेकऱ्यांनी केला, असे सरकारी वकील प्रदीप घरत म्हणाले. मारेकऱ्यांनी राणेंशी संपर्क केल्यामुळे हा पूर्वनियोजित कट नाही का? असा प्रश्नही त्यांनी उपस्थित केला. परब यांना झालेली मारहाण सीसीटीव्हीमध्ये रेकॉर्ड झाल्याचेही घरत यांनी स्पष्ट केले. घरत म्हणाले की, मुख्य संशयित आरोपी सचिन सातपुते हा पुण्याचा असून, त्याच्या संपर्कात नितेश राणे होते. परब यांचा फोटो सातपुतेने राणेंना पाठवल्याने हा सर्वात मोठा पुरावा आहे. हा सुपारी देऊन केलेला गुन्हा नाही का? हल्लेखोरांशी परब यांच्याशी कोणतही वैर नव्हते. कॉल डेटा रेकॉर्ड अहवालही महत्वाचा पुरावा आहे. राणे आणि सचिन सातपुते या दोघांचेही लोकेशन एकत्र कणकवलीमध्ये आढळले होते. इतर चार आरोपींप्रमाणे राणेंचाही जामीना नाकारावा.

नितेश राणेंच्या जामिनावर 5 फेब्रवारीला सुनावणी होणार होती. परंतु, त्यावेळी विशेष सरकारी वकील प्रदीप घरत यांनी या प्रकरणाची सुनावणी अतिरिक्त जिल्हा व सत्र न्यायाधीशांऐवजी प्रमुख जिल्हा व सत्र न्यायालयात घ्यावी, अशी मागणी केली होती. त्यांनी यासाठी केलेला अर्ज परिपूर्ण नसल्याने न्यायालयाने ही सुनावणी 7 फेब्रुवारीला ठेवली होती. दरम्यान, गानसम्राज्ञी लता मंगेशकर यांच्या निधनामुळे काल सार्वजनिक सुटी जाहीर करण्यात आली होती. त्यामुळे ही सुनावणी झाली नव्हती. आज राणेंच्या जामिनावर सुनावणी झाली.

काय आहे संतोष परब हल्ला प्रकरण?

सिंधुदुर्ग जिल्हा बँकेच्या निवडणुकीच्या प्रचाराच्या रणधुमाळीत हा प्रकार घडला होता. बँकेचे तत्कालीन अध्यक्ष सतीश सावंत यांचे समर्थक व करंजे गावचे माजी सरपंच संतोष परब यांच्यावर 18 डिसेंबर 2021 रोजी हल्ला झाला होता. परब हे दुचाकीवरून कनकनगर येथे जात असताना मागून येणाऱ्या नंबर प्लेट नसलेल्या इनोव्हा कारने त्यांना मागून धडक दिली होती. यानंतर परब रस्त्यावर पडल्यानंतर दोघांनी परब यांच्यावर टोकदार हत्याराने छातीवर वार केले होते. यात परब गंभीर जखमी झाले होते. राजकीय वादातून हा हल्ला झाल्याचा संशय व्यक्त करण्यात आला होता. जिल्हा बँक निवडणुकीच्या रणधुमाळीत झालेल्या या हल्ल्यामुळे खळबळ उडाली होती.