Raigad Politics : तटकरेंची राजकीय खेळी, शिंदेंच्या शिलेदाराला जोरदार धक्का; शिवसेनेच्या 200 पदाधिकाऱ्यांचा NCP त प्रवेश

Raigad Politics : रायगड जिल्ह्यात शिवसेना (शिंदे गट) आणि राष्ट्रवादी काँग्रेसमधील राजकीय संघर्ष दिवसेंदिवस तीव्र होताना दिसत आहे. राष्ट्रवादी काँग्रेसचे प्रदेशाध्यक्ष खासदार सुनील तटकरे आणि शिवसेनेचे आमदार महेंद्र दळवी यांच्यात सुरू असलेल्या आरोप-प्रत्यारोपांच्या पार्श्वभूमीवर जिल्ह्यात मोठी राजकीय घडामोड घडली आहे. आमदार महेंद्र दळवी यांच्या मतदारसंघातील शेणवई आदिवासी वाडीतील 200 हून अधिक ग्रामस्थांनी राष्ट्रवादी काँग्रेसमध्ये प्रवेश केला आहे. सुनील तटकरे यांच्या उपस्थितीत हा पक्षप्रवेश पार पडला. या घडामोडीमुळे दळवी यांच्या मतदारसंघात राष्ट्रवादी काँग्रेसची ताकद वाढल्याची चर्चा सुरू झाली आहे.

रायगड जिल्ह्यात गेल्या काही दिवसांपासून तटकरे आणि महेंद्र दळवी यांच्यातील राजकीय वाद चर्चेत आहे. दोन्ही बाजूंकडून एकमेकांच्या वक्तव्यांना प्रत्युत्तर दिले जात असल्याने महायुतीतील अंतर्गत मतभेदही समोर येत आहेत. अशातच आता राष्ट्रवादी काँग्रेसने महेंद्र दळवी यांच्या मतदारसंघात राजकीय ताकद वाढवण्याच्या दृष्टीने महत्त्वाची घडामोड घडवून आणली आहे.

शेणवई येथील आदिवासी वाडीतील 200 हून अधिक ग्रामस्थांनी राष्ट्रवादी काँग्रेसमध्ये प्रवेश केला. प्रदेशाध्यक्ष खासदार सुनील तटकरे यांच्या उपस्थितीत हा कार्यक्रम पार पडला. यावेळी तटकरे यांनी पक्षात प्रवेश करणाऱ्या ग्रामस्थांचे स्वागत केले. दळवी यांच्या मतदारसंघात झालेल्या या पक्षप्रवेशामुळे शिवसेना (शिंदे गट) आणि राष्ट्रवादी काँग्रेसमधील स्थानिक राजकीय समीकरणांची चर्चा पुन्हा सुरू झाली आहे. या घडामोडीचा आगामी राजकीय संघर्षावर काय परिणाम होतो, हे पाहणे महत्त्वाचे ठरणार आहे.

सुनील तटकरे आणि महेंद्र दळवी यांच्यातील वाद अलीकडच्या काळात अधिक तीव्र झाला आहे. दळवी यांनी तटकरे यांच्या नेतृत्वावर टीका करताना त्यांचे कर्तृत्व आणि नेतृत्व जनतेला मान्य नसल्याचे वक्तव्य केले होते. तसेच तटकरे यांनी आता मार्गदर्शकाच्या भूमिकेत राहावे, असा सल्लाही त्यांनी दिला होता. दळवी यांच्या या वक्तव्यामुळे रायगडच्या राजकीय वर्तुळात चर्चा रंगली होती. महायुतीतील दोन घटक पक्षांच्या नेत्यांमध्ये उघडपणे टीका-प्रत्युत्तर सुरू असल्याने अंतर्गत मतभेद चव्हाट्यावर आल्याचे चित्र निर्माण झाले.

अनिकेत तटकरेंचा दळवींना पलटवार

महेंद्र दळवी यांच्या टीकेला राष्ट्रवादी काँग्रेसचे आमदार अनिकेत तटकरे यांनीही प्रत्युत्तर दिले होते. दळवी यांनीदेखील अनेकदा सुनील तटकरे यांचे मार्गदर्शन घेतले असून, भविष्यातही ते त्यांचे मार्गदर्शन घेत राहतील, असा टोला अनिकेत तटकरे यांनी लगावला होता. या वक्तव्यांमुळे तटकरे आणि दळवी यांच्यातील राजकीय संघर्ष अधिक चर्चेत आला आहे. आता दळवी यांच्या मतदारसंघातील शेणवई येथे 200 हून अधिक ग्रामस्थांनी राष्ट्रवादी काँग्रेसमध्ये प्रवेश केल्याने या संघर्षाला नवे वळण मिळाल्याची चर्चा आहे.

महायुतीतील अंतर्गत संघर्ष पुन्हा ऐरणीवर

रायगड जिल्ह्यात शिवसेना (शिंदे गट) आणि राष्ट्रवादी काँग्रेस हे दोन्ही पक्ष महायुतीचा भाग असले, तरी स्थानिक पातळीवरील नेत्यांमधील संघर्ष सातत्याने समोर येत आहे. सुनील तटकरे आणि महेंद्र दळवी यांच्यातील वादाच्या पार्श्वभूमीवर झालेल्या या पक्षप्रवेशामुळे जिल्ह्यातील राजकीय वातावरण आणखी तापण्याची शक्यता आहे. शेणवईतील पक्षप्रवेशामुळे राष्ट्रवादी काँग्रेसला स्थानिक पातळीवर किती राजकीय फायदा होतो आणि महेंद्र दळवी यांच्या मतदारसंघातील राजकीय समीकरणांवर त्याचा काय परिणाम होतो, याकडे आता लक्ष लागले आहे.