Mahayuti Politics : महायुतीतील नेते एकत्र, पण तटकरे-कदमांमध्ये दुरावा? योगेश कदमांनी भेट टाळल्याने राजकीय चर्चांना उधाण

Ratnagiri Political News : कोकणात पुन्हा एकदा राज्याचे उपमुख्यमंत्री एकनाथ शिंदे यांची शिवसेना आणि राष्ट्रवादी काँग्रेसमधील अंतर्गत वाद चव्हाट्यावर आला आहे. रायगड जिल्ह्यात सुरू असलेल्या वादाची धग आता शेजारी असणाऱ्या रत्नागिरी जिल्ह्यात पोहचली आहे. दरम्यान जिल्हा नियोजन समितीच्या बैठकीतही यावरून नाराजी नाट्य समोर आले असून गृहराज्यमंत्री योगेश कदम आणि खासदार सुनील तटकरे यांच्यात दुरावा दिसला. यावरून आता राजकीय वर्तुळात चर्चा सुरू झाली आहे.

रत्नागिरीतील शासकीय विश्रामगृहात जिल्हा नियोजन समितीच्या बैठकीचे आयोजन करण्यात आले होते. या बैठकीसाठी उद्योगमंत्री उदय सामंत, गृहराज्यमंत्री योगेश कदम, खासदार नारायण राणे आणि खासदार सुनील तटकरे महायुतीतील हे नेते एकत्र आले होते.

मात्र तटकरे दाखल झाल्यानंतर कदम यांनी त्यांची भेट टाळली. तसेच तटकरे यांच्याकडे पाठ फिरवल्याची चर्चा आहे. दापोली विधानसभा मतदारसंघातील दोन्ही नेत्यांमधील राजकीय मतभेदांच्या पार्श्वभूमीवर आता या घटनेकडे पाहिले जात असून तसे राजकीय महत्त्व दिलं जात आहे.

या बैठकीनंतर उद्योगमंत्री उदय सामंत, खासदार नारायण राणे आणि खासदार सुनील तटकरे हे एकाच वाहनातून रवाना झाले. यामुळे महायुतीतील भाजप, शिंदेंची शिवसेना आणि राष्ट्रवादी काँग्रेसमधील प्रमुख नेते एकाच वाहनातून गेल्याने हा प्रवास चर्चेचा विषय ठरला आहे.

दरम्यान काहीच दिवसांपूर्वी गृहराज्यमंत्री योगेश कदम यांचे वडील रामदास कदम यांनी रायगडच्या पालकमंत्री पदावरून तटकरे यांच्यावर निशाना साधला होता. कदम यांनी तटकरे यांच्यावर ताटत खाल्ले त्याच ताटात छेद देण्याचा आरोप केला होता. यावर प्रत्युत्तर देताना तटकरे यांनी कदमांची अवस्था वाईट झाली असून आपण याची वादाची तक्रार उपमुख्यमंत्री एकनाथ शिंदे यांच्याकडे करणार असल्याचे सांगितले होते.