Ladki Bahin Yojana News: लाडक्या बहिणींसाठी खुशखबर; जानेवारीचा हप्ता जमा होणार, महापालिका निवडणुकीचा फॉर्म्युला झेडपीमध्ये राबवणार!

Ladki Bahin Yojana Installment News: राज्य सरकारची महत्त्वाकांक्षी ठरलेली 'मुख्यमंत्री माझी लाडकी बहीण' योजनेचा निधी न मिळाल्याने लाडक्या बहीणी सध्या नाराज आहेत. अशातच त्यांच्यासाठी गुड न्यूज आहे.

महापालिका निवडणुकीच्या आधी लाडक्या बहिणींना डिसेंबरचा हप्ता मिळाला होता. तोच फॉर्म्युला आता राज्य सरकार जिल्हा परिषद निवडणुकीत वापरणार असल्याची माहिती विश्वसनीय सुत्रांनी दिली. जिल्हा परिषद निवडणुकीच्या आधी चार हजार रुपये तर लाडक्या बहिणींच्या खात्यात 1500 रुपये जमा होणार असल्याची माहिती आहे.

शेतकऱ्यांना नमो शेतकरी योजनेचे केंद्र सरकारकडून दोन हजार रुपये तर राज्य सरकारकडून दोन हजार रुपये मिळणार आहे. राज्यात नमो शेतकरी योजनेचे 90 ते 94 हजार लाभार्थी आहेत.

मुख्यमंत्री लाडकी बहीण योजनेने विधानसभा निवडणुकीपूर्वी महिला वर्गामध्ये मोठा उत्साह निर्माण केला होता. आता राज्यातील अनेक जिल्ह्यांमधील हजारो महिलांना गेल्या दोन महिन्यांपासून हप्ता मिळालेला नाही, त्यामुळे लाडक्या बहिणी संभ्रमात आहेत.

राज्यात दोन-तीन महिन्यापासून स्थानिक स्वराज संस्थांच्या निवडणुका सुरू आहेत. आचारसंहितेमुळे लाडक्या बहिणींच्या बँक खात्यात पैसे येणार नाहीत असे वाटत होते. मात्र, डिसेंबर महिन्याच्या शेवटच्या दिवशी म्हणजेच 31 डिसेंबरला लाडक्या बहिणींना नोव्हेंबर महिन्याचा हप्ता मिळाला. त्यानंतर डिसेंबर आणि जानेवारी या दोन्ही महिन्यांचा एकत्रित हप्ता मकरसंक्रातीच्या मुहूर्तावर खात्यात जमा होईल, असा दावा करण्यात येत होता.

महानगरपालिका निवडणुकीवर परिणाम होईल असे सांगत काँग्रेसने तातडीने निवडणूक आयोगाकडे धाव घेतली. त्यानंतर निवडणूक आयोगाने डिसेंबर महिन्याचा हप्ता देण्यास मंजुरी दिली. डिसेंबरचा हप्ता मिळाला पण जानेवारी महिन्याचा हप्ता देण्यास नकार देण्यात आला. पण अद्यापही अनेक लाडक्या बहिणींचा नोव्हेंबर आणि डिसेंबरचा हप्ता रखडला आहे. त्यासाठी लाडक्या बहीणी रस्त्यावर उतरल्या आहेत.

लवकरच जानेवारी महिन्याच्या हप्त्यासोबतच नोव्हेंबर आणि डिसेंबरची थकीत रक्कम (एकूण 4500 रुपये) जमा होण्याची शक्यता वर्तवण्यात येत आहे. मात्र, या संदर्भात अद्याप कोणतीही अधिकृत माहिती समोर आलेली नाहीये. त्यामुळे लाभार्थ्यांमध्ये अस्वस्थता कायम आहे.