Ladki Bahin Yojana : लाडकी बहीण होणार नावडती! 'या' महिलांना मिळणार नाहीत पैसे?

Ladki Bahin Yojana : विधानसभा निवडणुकीत मुख्यमंत्री माझी 'लाडकी बहीण योजना' गेमचेंजर ठरली. या योजनेमुळे महायुतीला मोठे यश मिळाल्याचा दावा महायुतीमधील नेतेच करत आहेत. मात्र, निवडणुकीनंतर ज्या महिलांना या योजनेचा लाभ मिळत होता. त्यातील काही महिलांना वगळण्यात येतील, असे संकेत आमदार आदिती तटकरे यांनी दिले आहे.

एका वृत्तपत्राशी बोलताना आदिती तटकरे म्हणाल्या, अडीच लाखांपेक्षा जास्त वार्षिक उत्पन्न तसेच घरात चारचाकी वाहन असलेल्या महिलाही योजनेचा लाभ घेत असल्याच्या तक्रारी असून त्यामुळे आता अर्जांची छाननी केली जाणार आहे. छाननीनंतर नियमबाह्यपणे अर्ज बाद केले जातील.

अर्ज छाननीमध्ये 15 ते 20 टक्के अर्ज बाद होण्याची शक्यता आहे. त्याचा फटका तब्बल 40 लाख लाभार्थी महिलांना बसण्याची शक्यता आहे.

महायुतीने विधानसभा निवडणुकीत विजयानंतर लाडक्या बहिणींचा हफ्ता 1500 रुपयांवरून 2100 करण्याचे आश्वासन दिले होते. मात्र, हे पैसे मार्चनंतर मिळण्यास सुरुवात होईल अशी शक्यता आहे. तर, भाजपचे आमदार सुधीर मुनगंटीवार यांनी 2100 रुपये पुढील वर्षी दिवाळीनंतर मिळतील असे म्हटले होते.

जर वाढीव रक्कम दिली नाही तर देशात चुकीचा संदेश जाईल. त्यामुळे मुख्यमंत्र्यांना पत्र लिहिणार आहे की आपल्या शब्दावर ठाम राहावे. ही वाढीव रक्कम कोणत्या महिन्यात द्यायची यावर चर्चा केली जाईल. पुढील वर्षी भाऊबीजेपासून ती रक्कम वाढवू शकतो, असे सुधीर मुनगंटीवार म्हणाले.