Mumbai News: ऑक्टोबर महिन्याच्या पहिल्याच दिवशी व्यावसायिक गॅस सिलिंडर वापरणाऱ्या ग्राहकांना महागाईचा धक्का बसला आहे. तेल विपणन कंपन्यांनी आजपासून (१ ऑक्टोबर २०२६) १९ किलोच्या कमर्शियल LPG सिलिंडरच्या किमतीत वाढ केली आहे.
शहरानुसार या दरात बदल झाला असून काही ठिकाणी ६० ते ७० रुपयांपर्यंत वाढ झाली आहे. मात्र, सर्वसामान्यांसाठी महत्त्वाच्या असलेल्या १४.२ किलोच्या घरगुती LPG सिलिंडरच्या दरात कोणताही बदल करण्यात आलेला नाही.
सणासुदीचा काळ सुरू असताना झालेल्या या दरवाढीचा परिणाम हॉटेल, रेस्टॉरंट, ढाबे तसेच खाद्यपदार्थांच्या व्यवसायावर होण्याची शक्यता आहे. व्यावसायिक गॅसचा खर्च वाढल्याने त्याचा परिणाम व्यवसायांच्या एकूण खर्चावर होऊ शकतो.
मुंबईत १९ किलोच्या कमर्शियल LPG सिलिंडरचा सप्टेंबरमधील दर २,७०१ रुपये होता. आता त्यात वाढ होऊन सिलिंडरची किंमत २,७६७ रुपये झाली आहे. दुसरीकडे, मुंबईतील १४.२ किलोच्या घरगुती सिलिंडरचा दर ९४१.५० रुपये इतकाच कायम आहे.
देशाची राजधानी दिल्लीतही कमर्शियल सिलिंडरच्या दरात ६२.५० रुपयांची वाढ झाली आहे. सप्टेंबरमध्ये २,७४७.५० रुपये असलेला सिलिंडर आता २,८१० रुपयांना मिळणार आहे.
चेन्नईमध्ये १९ किलोच्या सिलिंडरचा दर २,९६१.५० रुपयांवरून २,९८३ रुपये झाला आहे. अहमदाबादमध्ये हा दर २,८३१.५० रुपये, तर कन्याकुमारीमध्ये ३,०४६ रुपये झाला आहे. या शहरांतील घरगुती सिलिंडरचे दर अनुक्रमे ९५७.५०, ९४९ आणि १,०२६ रुपये आहेत.
पटणामध्ये कमर्शियल सिलिंडरच्या दरात सर्वाधिक वाढीपैकी एक नोंद झाली असून तो ७१.५० रुपयांनी महागला आहे. ३,०२९ रुपयांवरून त्याची किंमत आता ३,१००.५० रुपये झाली आहे. लखनऊमध्ये २,८७० रुपयांवरून दर २,९३२.५० रुपये, तर भोपाळमध्ये २,७५५.५० रुपयांवरून २,८१५ रुपये झाला आहे.
कमर्शियल LPG सिलिंडरची सर्वाधिक किंमत लेहमध्ये आहे. येथे १९ किलोच्या सिलिंडरचा दर ३,३८५.५० रुपयांवरून वाढून ३,४५० रुपये झाला आहे. म्हणजेच ६४.५० रुपयांची वाढ झाली आहे. लेहमध्ये घरगुती LPG सिलिंडरची किंमत १,१७९ रुपये आहे.
दरम्यान, १४.२ किलोच्या घरगुती LPG सिलिंडरचे दर देशभरात सध्या स्थिर ठेवण्यात आले आहेत. त्यामुळे घरगुती ग्राहकांना दरवाढीपासून दिलासा मिळाला असला तरी व्यावसायिक गॅसच्या वाढलेल्या किमतीमुळे खाद्य व्यवसायाच्या खर्चावर त्याचा परिणाम होण्याची शक्यता आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.