MVA Meeting : ठाकरेंचे सहा खासदार फुटले! महाविकास आघाडी सावध, बैठक सुरू: शरद पवार उपस्थित राहणार!

Uddhav Thackeray News : शिवसेना उद्धव बाळासाहेब ठाकरे पक्षाचे सहा खासदार फुटले आहेत. त्या पार्श्वभूमीवर महाविकास आघाडीतील नेते सावध झाले आहे. उद्धव ठाकरेंच्या उपस्थितीमध्ये महाविकास आघाडीची बैठक सुरू आहे. या बैठकीला शरद पवार हे देखील उपस्थित राहणार असल्याची माहिती आहे.

पावसळी अधिवेशनाच्या पार्श्वभूमीवर या बैठकीत रणनीती आखली जाण्याची शक्यता आहे. राज्यातील सध्याची राजकीय परिस्थितीसोबतच विविध राज्यातील प्रश्न या सगळ्या संदर्भात बैठक होत असल्याचे सांगितले जात आहे. मात्र, ठाकरेंच्या सहा खासदारांच्या फुटी नंतर बदललेल्या राजकीय परिस्थिवर देखील चर्चा होण्याची शक्यता आहे.

राष्ट्रवादी काँग्रेस शरदचंद्र पक्षाकडून या बैठकीसाठी प्रदेशाध्यक्ष शशिकांत शिंदे उपस्थित आहेत. तर, काँग्रेसकडून प्रदेशाध्यक्ष हर्षवर्धन सपकाळ, सतेज पाटील उपस्थित आहेत. ठाकरेंच्या शिवसेनेकडून उद्धव ठाकरेंसोबत भास्कर जाधव देखील उपस्थित आहेत.

राज्यस्तरावरची आता कोणतीही मोठी निवडणूक लगेच नाही. मात्र, ठाकरेंचे खासदार फुटल्याने राजकीय परिस्थिती बदललेली आहे. या परिस्थितीमध्ये महाविकास आघाडी एकसंध ठेवणे मोठे आव्हान असणार आहे. त्यामुळे आगामी काळात महाविकास आघाडीचा रोडमॅप काय असावा याविषयी चर्चा होण्याची शक्यता आहे.

ठाकरे अ‍ॅक्टिव्ह मोडवर

उद्धव ठाकरे हे पुन्हा मैदानात उतरल्याचे दिसत आहे. आज होणाऱ्या बैठकीला ते उपस्थित राहिले आहे. तर, फुटलेल्या खासदारांच्या मतदारसंघाचा ते दौरा करणार आहेत. तेथील राजकीय परिस्थितीचा आढाव घेत ते संघटनात्मक ताकद मतदारसंघात कायम ठेवण्यासाठी पदाधिकाऱ्यांशी संवाद साधण्याची शक्यता आहे.