Maharashtra Live Updates : मराठा आंदोलनाला अवघे उरले 15 मिनिटे, जरांगेंच्या भूमिकेकडे सर्वांचं लक्ष

मनोज जरांगे पाटील मुंबईतील आझाद मैदानावर उपोषणाला बसले आहेत. सकाळी 10 वाजता सुरू झालेल्या या आंदोलनासाठी त्यांना सरकारकडून 8 तासांची मुदत देण्यात आली होती. त्यानुसार संध्याकाळी 6 वाजता आंदोलनाची वेळ संपणार असून आता शेवटचा अवघे 15 मिनिट उरले आहे. त्यामुळे जरांगे पुढे कोणता निर्णय घेणार याकडे सर्वांचे लक्ष लागले आहे.

मुंबईत मनोज जरांगे पाटील यांनी मराठा आरक्षणासाठी आमरण उपोषण सुरु केले आहे. त्यांनी स्पष्ट भूमिका घेतली आहे की, आरक्षणाचा निर्णय होईपर्यंत ते मुंबई सोडणार नाहीत.

महाराष्ट्रात गुंतवणुकीला चालना देण्यासाठी राज्य सरकारने 17 नवे करार केले आहेत. उपमुख्यमंत्री देवेंद्र फडणवीस यांनी सांगितले की, या करारांमुळे राज्यात मोठ्या प्रमाणावर रोजगारनिर्मिती होणार आहे. यामध्ये पुणे विभागात पाच करार, तर विदर्भात सात करार करण्यात आले आहेत. रायगड जिल्ह्यात तब्बल तीन हजार कोटी रुपयांची गुंतवणूक होणार आहे. या गुंतवणुकीमुळे उद्योगधंद्यांना नवे बळ मिळेल आणि युवकांसाठी रोजगाराच्या संधी वाढतील. सरकारच्या या उपक्रमामुळे महाराष्ट्रात औद्योगिक विकासाला गती मिळणार आहे.

गुणरत्न सदावर्ते यांनी मनोज जरांगे यांच्यावर गुन्हा दाखल करण्याची मागणी केली आहे. पोलिसांच्या अटींचे पालन न केल्याचा आरोप करत सदावर्ते यांनी ऑनलाइन तक्रार दाखल केली. या प्रकरणामुळे आंदोलनाच्या पार्श्वभूमीवर नवे वादंग निर्माण झाले आहे.

मराठा आंदोलनामुळे मध्य रेल्वेच्या गाड्यांच्या वेळापत्रकावर परिणाम झाला आहे. काही गाड्या उशिराने धावत आहेत, त्यामुळे प्रवाशांना अडचणींचा सामना करावा लागत आहे. रेल्वे प्रशासनाकडून परिस्थितीवर लक्ष ठेवले जात असून, आवश्यक त्या उपाययोजना केल्या जात आहेत. मात्र, प्रवास करताना अनावश्यक गर्दी टाळावी, केवळ गरज असल्यासच प्रवास करावा, असे आवाहन रेल्वे प्रशासनाने नागरिकांना केले आहे. आंदोलनामुळे होणाऱ्या उशिरामुळे प्रवाशांनी संयम बाळगावा, अशी विनंतीही प्रशासनाने केली आहे.

मुंबईत पावसाला सुरुवात झाली आहे. पण भर पावसात मराठा बांधवांचं आंदोलन सुरु आहे. सीएसएमटी स्थानकावर आंदोलकांनी गर्दी केली आहे. मंत्रालयाबाहेरही आंदोलकांनी घोषणा केल्या.

मराठा मोर्चाने मुंबई पोलिसांना पत्र दिलं आहे. आझाद मैदानातील उपोषणाची वेळ वाढवून द्या अशी मागणी आंदोलकांनी केली आहे.

मराठा आंदोलक मुंबईत धडकले असून CSMT स्टेशनवर तुफान गर्दी झाली आहे. मराठा आंदोलकांची मुंबईतील CSMT स्टेशनवर तुफान गर्दी उसळली आहे. मनोज जरांगे पाटलांच्या नेतृत्वाखाली मराठा कार्यकर्त्यांचा जयघोष आणि आक्रमक उत्साह पाहायला मिळतो आहे.

बिहार इथल्या सभेत काँग्रेसच्या व्यासपीठावरून पंतप्रधान नरेंद्र मोदी यांच्याविषयी आक्षेपार्ह भाषा वापरली गेली. त्यावरून बिहार पाटणा इथल्या काँग्रेस मुख्यालयाबाहेर भाजप आणि काँग्रेस कार्यकर्ते एकमेकांना भिडले आहे. एकमेकांवर दगडफेक, लाठ्या-काठ्यांनी मारहाण करत आहे. पोलिसांनी सौम्य बळाचा वापर करत दोन्ही बाजूच्या कार्यकर्त्यांना पांगवण्याचा प्रयत्न करत आहेत.

मनोज जरांगे पाटील यांच्याबरोबर मुंबईत दाखल झालेले मराठा आंदोलक सरकारविरोधात आक्रमक झाले आहेत. एक महिन्याभराचं किराणा साहित्य घेऊन मुंबईत आलो आहोत. जोपर्यंत ओबीसीमधून आरक्षण मिळणार नाही तोपर्यंत मुंबई सोडणार नसल्याची भूमिका मराठा आंदोलकांनी घेतली आहे. आझाद मैदानात मुलभूत सुविधा न पुरवल्यावरून मराठा आंदोलकांनी महापालिका प्रशासनाच्या कारभारावर नाराजी व्यक्त केली.

गोरक्षकांच्या बाबत बेताल वक्तव्य करणारे आमदार सदाभाऊ खोत आणि आमदार ईद्रीस नायकवडी यांच्या विरोधात सांगलीत शिवप्रतिष्ठान युवा हिंदुस्तानकडून निदर्शने करीत त्यांच्या वक्तव्याचा निषेध केला. आमदार खोत आणि आमदार नायकवडी यांनी बेताल वक्तव्य करत गोरक्षकांच्यावर मोकोका अंतर्गत कारवाई करण्याची मागणी केली होती

मनोज जरांगे पाटील यांच्या मुंबईतील आंदोलनाला आमदार प्रकाश सोळंके आणि आमदार संदीप क्षीरसागर यांनी भेट घेतली. जरांगे पाटलांच्या संघर्ष समाजासाठी सुरू आहे. त्यामुळे त्याला आमचा पाठिंबा आहे. दोन महिन्यांपासून सरकारला विनंती आहे की, यात सकारात्मक निर्णय घ्यावा. ठाम भूमिका घेण्याची सरकारची हीच वेळ आहे, असे आमदार सोळंके आणि आमदार क्षीरसागर यांनी म्हटलं आहे.

मुंबई महापालिकेसमोर मराठा आंदोलकांनी एकत्र येत आंदोलन सुरू केलं आहे. मुंबईत दाखल झालेल्या मराठे वेगवेगळ्या ठिकाणी आंदोलन सुरू केली आहेत. बीएमसी मुख्यालयासमोर मराठा आंदोलकांनी आंघोळ करून, मनोज जरांगे पाटील यांच्या उपोषणाला पाठिंबा दिला आहे. मनोज जरांगे पाटील मुंबईत तब्बल तीन हजार गाड्या घेऊन दाखल झाले आहेत. त्यामुळे मुंबईत वाहतूक कोंडी झाली आहे.

शेतकऱ्यांच्या कर्जमाफीसाठी माजी मंत्री बच्चू कडू 2 ऑक्टोबरऐवजी 28 ऑक्टोबरला मुंबईत मोठ आंदोलन उभारणार आहेत. यासाठी बच्चू कडू उद्यापासून राज्यभर शेतकरी, शेतमजूर हक्क यात्रा काढणार आहे. या यात्रेचा प्रारंभ वाशिम जिल्ह्यातून होणार असून, प्रत्येक जिल्ह्यात 5 ते 6 सभा घेण्याचा निश्चित केला आहे.

मनोज जरांगे पाटील मुंबईला पोचले आहे. त्यांच्या सहकाऱ्यांशी चर्चा करणार आहोत. चर्चेतून मार्ग निघू शकतो. जरांगे पाटलांच्या मागण्यांबाबत पूर्ण सहानुभूती आहे. सरकारकडे प्राप्त झालेल्या निवेदनावर कार्यवाही सुरू आहे. आता पुन्हा निवेदन आल्यावर चांगल होईल. जरांगे पाटलांच्या भूमिकेचा नेहमीच आदर केला आहे. चर्चा झाल्यास, मार्ग निघेल, अशी प्रतिक्रिया मंत्री राधाकृष्ण विखे पाटील यांनी म्हटलं.

मनोज जरांगे पाटील यांच्या मराठा आरक्षण आंदोलनासाठी मोठ्या प्रमाणावर मराठा कार्यकर्ते घेऊन मुंबईत दाखल झाले आहेत. राज्यभरातून येणाऱ्या मराठा आंदोलकांसाठी ठिकठिकाणी व्यवस्था करण्यात येत आहेत. राज्याचे इतर भागातून येणाऱ्या मराठा आंदोलकासाठी भाजप आमदार राणाजगजीतसिंह पाटील यांनी त्यांच्या मुंबईतील नेरूळ इथं निवास, जेवणाची तसेच वाहनांच्या पार्किंगची व्यवस्था केली.

मुंबईत आंदोलनाला परवानगी वाढवून द्यावी, अशी विनंती मनोज जरांगे पाटील यांनी मुख्यमंत्री देवेंद्र फडणवीस यांच्याकडे केली आहे. जोपर्यंत सगळ्या मागण्या मान्य होत नाही, तोपर्यंत मी मुंबईची जागा सोडणार नाही, असाही इशारा त्यांनी दिला आहे. जरांगे पाटील यांना आज सायंकाळ पाच वाजेपर्यंतच आंदोलनाला न्यायालयाने परवानगी दिली आहे.

"मुख्यमंत्री देवेंद्र फडणवीस यांना चांगली संधी आहे. मराठ्यांची नाराजी ओढावून घेऊ नका. सरकारने आडकाठी न आणता उपोषण सुरू करू द्याव. आम्ही फक्त आरक्षण घ्यायला आला आहोत. मी मुंबईत आरक्षणासाठी आला आहोत. मराठ्यांच्या अंगावर, डोक्यावर विजयाचा गुलाल घेतल्याशिवाय मागे हटणार नाही. मला तुरुंगात नेऊन टाकलं, तरी चालेल. तिथं सडलो, तरी चालले. पण मागं हाटणार नाही," असा इशारा मनोज जरांगे पाटील यांनी दिला आहे.

"आपलं बेमुदत उपोषण दहा वाजल्यापासून सुरू झालं आहे. मुंबई जाम केली ना, आता दोन घंट्यात मुंबई मोकळी झाली पाहिजे. मुंबई पोलिस जिथं सांगतील, तिथं गाड्या पार्किंग करा. वाहतूक कोंडी झाली नाही पाहिजे. कोणताही पोलिस नाराज झाला नाही पाहिजे. आंदोलनासाठी सरकार पुढची परवानगी देईल, न्यायालय देखील दखल घेईल. आपण शिकलो नाही. त्यामुळे 70 वर्षे समाजाचं वाटोळं झालं आहे. सगळ्या मागण्यांची अंमलबजावणी होईपर्यंत मुंबई सोडणार नाही. सरकारने गोळ्या घातल्या तरी माघार नाही. हटणार नाही. मराठा समाजाला विजय मिळवल्याशिवाय इथून हलायचं नाही," असा इशारा मनोज जरांगे पाटील यांनी दिला.

मनोज जरांगे पाटील हे आझाद मैदानात दाखल झाले आहेत. ते मराठा आरक्षणाच्या मागणीसाठी ते आंदोलन करणार आहेत. अवघा एक दिवस आंदोलन करण्याची परवानगी त्यांना देण्यात आली आहे. त्यामुळे ते नेमके काय बोलणार याकडे सर्वांचे लक्ष लागले आहे.

राष्ट्रवादी काँग्रेसच्या आमदार सना मलिक म्हणाल्या की, सरकारने आपली भूमिका स्पष्ट केली आहे. आम्ही संपूर्ण विषय समजून घेत त्यावर तोडगा काढत आहोत. सरकार मनोज जरांगे पाटील यांच्याशी चर्चा करणार आहे. माझ्या मतदारसंघातून मनोज जरांगे पाटील हे पुढे जात आहे. मी त्यांचे स्वागत केले.

मनोज जरांगे पाटील हे मुंबईत दाखल झाले असून त्यांचा ताफा लवकरच आझाद मैदानात पोहोचणार आहे. आझाद मैदानात मराठा आंदोलकांची मोठी गर्दी जमा झाली आहे. सीएसएमटी स्थानका परिसरात देखील मोठ्या प्रमाणात मराठा आंदोलकांची गर्दी झाली आहे.

मनोज जरांगे पाटील हे मुंबईत दाखल झाले आहेत. आज ते आझाद मैदान येथे आंदोलन करणार आहेत. मोठ्या संख्येने मराठा आंदोलक मुंबईत दाखल झाले आहेत. एक मराठा लाख मराठा, अशी घोषणाबाजी आंदोलकांकडून करण्यात येत आहे.