Maharashtra Political Live Update : जळगाव शासकीय रुग्णालयातील डॉक्टरवर हल्ला; बेदम मारहाणीत डॉक्टर रक्तबंबाळ

जळगावमधील शासकीय वैद्यकीय महाविद्यालय व रुग्णालयात कनिष्ठ निवासी डॉ. मोहित गादिया यांच्यावर उपचारादरम्यान रुग्णाच्या नातेवाईकांनी बेदम मारहाण केली. रुग्णालयात गर्दी केल्यामुळे डॉक्टरांनी नातेवाईकांना बाहेर जाण्यास सांगितले होते. त्याचा राग आल्याने काही नातेवाईकांनी डॉ. गादिया यांना कानशिलात लगावत खाली पाडले आणि लाथाबुक्क्यांनी मारहाण केली. या मारहाणीत डॉक्टरांच्या कानाचा पडदा फाटला असून नाकातून रक्तस्त्रावही झाला आहे. पोलिसांनी दोघा संशयित हल्लेखोरांना ताब्यात घेतले आहे.

अतिवृष्टीमुळे शेतकऱ्यांच्या जमिनी वाहून गेल्या आहेत. नुकसानग्रस्तांचं पुनर्वसन आवश्यक आहे. यावर सरकारने त्यांची भूमिका स्पष्ट केली पाहिजे. पक्षाच्यावतीने खासदार सुप्रिया सुळे यांनी केंद्रीय मंत्री कृषी शिवराज चव्हाण यांची भेट घेतली असून, महाराष्ट्रातील अतिवृष्टीमुळे झालेल्या नुकसानीची माहिती त्यांच्या कानावर घातली आहे. अपेक्षा अशी आहे त्यांच्याकडून लवकरात लवकर निर्णय होतील, अन् नुकसानग्रस्तांना उभे करण्यासाठी सरकार हातभार लावेल, अशी प्रतिक्रिया शरद पवार यांनी म्हटले आहे.

एकनाथ शिंदे यांच्या शिवसेनेचे करमाळा इथले जिल्हाप्रमुख महेश चिवटे यांच्यावर जीवघेणा हल्ला झाला आहे. महेश चिवटे हे शिंदेंचे स्वीय सहायक मंगेश चिवटे यांचे बंधू आहे. रश्मी बागल, दिग्विजय बागल यांच्या सांगण्यावरून हल्ला झाल्याचा आरोप महेश चिवटे यांनी केला आहे

ठाकरेंच्या शिवसेनेचे प्रमुख उद्धव ठाकरे आज पुणे दौऱ्यावर असून दुपारी बारा वाजता ते पुणे श्रमिक पत्रकार संघ वार्तालाप करणार आहेत. त्यानंतर 1 वाजता अजित नागरी पतसंस्था महिला मेळाव्याला संबोधित करतील. तर पद्मावती येथील अण्णाभाऊ साठे सभागृहात शिवसेना शाखा प्रमुख व पदाधिकाऱ्यांची बैठकीत ते मार्गदर्शन करणार आहेत.

डोनाल्ड ट्रम्प हे मोदींना विश्वगुरू नव्हे तर चपराशी समजत असल्यामुळे त्यांनी अमेरिकेतून भारतीयांना हकलण्याचं धोरण स्वीकारलं आहे. मोदींना जागतिक पातळीवर किंमत नसल्याने जगातील बहुसंख्य देश पाकिस्तानच्या बाजूने उभे राहत आहेत, अशी टीका वंचित बहुजन आघाडीचे सर्वेसर्वा ॲड. प्रकाश आंबेडकर यांनी केली आहे. ते अकोला येथे भारतीय बौद्ध महासभेने आयोजित केलेल्या धम्मचक्र प्रवर्तन दिनाच्या कार्यक्रमात बोलत होते.

मुख्यमंत्री देवेंद्र फडणवीसांच्या अध्यक्षतेखाली आज मुंबईत कुंभमेळा आढावा बैठक घेण्यात येणार आहे. यावेळी नाशिक जिल्ह्यातील वरिष्ठ अधिकाऱ्यांकडून कामाचा आढावा घेतला जाणार आहे. या बैठकीला उपमुख्यमंत्री, कुंभमेळा मंत्री, यांच्यासह मंत्री समितीचे सदस्य राहणार उपस्थित राहणार आहेत.

पुण्यातील मुंबई-बंगळूरू राष्ट्रीय महामार्गावरील वडगाव पुलाजवळ 30 सप्टेंबर रोजी एका एका रिक्षाला गौतमी पाटीलच्या भरधाव कारनं जोरदार धडक दिली. या अपघातात रिक्षाचालकासोबतच रिक्षातील दोन प्रवासीही गंभीर जखमी झाले होते. पोलिसांना अपघाताबाबत माहिती मिळताच तात्काळ घटनास्थळी धाव घेतली. तर कोथरूडचे आमदार चंद्रकांत पाटील यांनी आता थेट डीसीपी संभाजी कदम यांना फोन लावत दोषींवर कडक कारवाई करण्याची निर्देश दिल्यामुळे आता गौतमी पाटीलवर काय कारवाई होणार याकडे सर्वांचं लक्ष लागलं आहे.

मोदींना टाटा बाय बाय करून देशाला वाचवा असे, असं म्हणत वंचित बहुजन आघाडीचे अध्यक्ष ॲड. प्रकाश आंबेडकर यांनी पंतप्रधान नरेंद्र मोदींवर हल्लाबोल केला आहे. तसंच ओबीसींचा घात आरएसएस-भाजपने केला आहे. एवढं तरी ओबीसींनी डोक्यात घ्यावे, तरच ओबीसी आरक्षण वाचेल स्थानिक पातळीवर ओबीसी नेतृत्वाला संधी देणारे आरक्षण आता हातातून जाण्याची शक्यता असून नुसते राजकीय आरक्षण जाणार नाही, तर शैक्षणिक आरक्षण सुद्धा जाईल. त्यामुळे ओबीसींनी वेळीच सावध व्हावं, असा इशारा देखील आंबेडकर यांनी दिला आहे.