Maharashtra Political Live Update : शिर्डी दौऱ्यावर असलेले गृहमंत्री अमित शाह 11 वाजता साईबाबांचं दर्शन घेणार

पुण्यातील वडगाव शेरी विधानसभा मतदारसंघाचे आमदार बापूसाहेब पठारे यांना करण्यात आलेल्या मारहाणीच्या घटनेचा तीव्र निषेध, असे ट्विट रोहित पवार यांनी केले आहे. ते म्हणाले, लोकप्रतिनिधीला धक्काबुक्की होत असेल तर तिथं सामान्य माणसाचं काय? असा प्रश्न यानिमित्ताने उपस्थित होतो. पोलिसांनी या घटनेची गंभीर दखल घेऊन दोषींवर कठोर कारवाई करावी.

 नृत्यांगणा गौतमी पाटीलच्या ड्रायव्हरच्या अपघात प्रकरणात मोठी माहिती समोर आली आहे. ड्राइव्हरने मद्यसेवन केले होते की नाही याचा मेडिकल रिपोर्ट पोलिसांना ससूनमधून मिळाला आहे. ससूनच्या प्राथमिक अहवालात ड्रायव्हरने मद्यसेवन केले नसल्याचा स्पष्ट झाले आहे.

मुख्यमंत्री यांनी सह्याद्री अतिथीगृह, मुंबई येथे आयोजित केलेल्या बैठकीत सकारात्मक तोडगा न निघाल्याने १० ऑक्टोबर रोजी नागपूरात सकल ओबीसी महामोर्चा निघणारचं, असे काँग्रेस नेते विजय वडेट्टीवार यांनी सांगितले. २ सप्टेंबरचा GR रद्द झालाच पाहिजे, २०१४ पासून दिलेल्या कुणबी जात प्रमाणपत्र आणि जात पडताळणी प्रमाणपत्र याची श्वेतपत्रिका काढण्यात यावी अशा आमच्या प्रमुख मागण्या आहेत, असे देखील त्यांनी सांगितले.

केंद्रीय गृहमंत्री अमित शाह आज शिर्डी दौऱ्यावर आहेत. ते थोड्याच वेळात 11 च्या सुमारास साईबाबांचे दर्शन घेत आपल्या दौऱ्याची सुरुवात करणार आहेत. त्यानंतर लोणी (प्रवरानगर) येथे कारखान्याच्या नूतनीकरणासह पद्मश्री डॉ. विठ्ठलराव विखे पाटील आणि पद्मभूषण बाळासाहेब विखे पाटील यांच्या पुतळ्यांचे अनावरण त्यांच्या हस्ते होणार आहे.

शुक्रवारी सायंकाळी सिंधुदुर्ग जिल्ह्यातील शिरोडा-वेळागर समुद्र किनाऱ्यावर पर्यटनासाठी आलेले नऊ पर्यटक समुद्रात बुडाले होते. यापैकी 5 पर्यटकांचे मृतदेह आतापर्यंत सापडले आहेत. तर दोघे पर्यटक सुखरूप बचावलेत. उर्वरित दोन पर्यटकांचा शोध अद्याप सुरूच आहे.

दिवाळीच्या तोंडावर महावितरणने वीज दरवाढ केली आहे. त्यानुसार 1 ते 100 युनिट वापरावर प्रति युनिट 35 पैसे आणि 500 युनिटपेक्षा अधिक वापरावर 95 पैसे प्रति युनिट जास्त द्यावे लागणार आहे. 1 ऑक्टोबर रोजी महावितरणने याबाबतचे सर्क्युलर जारी करत सप्टेंबरमध्ये झालेल्या वीज वापराबाबत इंधन समायोजन शुल्क आकारण्याचे आदेश दिलेत. 

सुषमा अंधारे यांनी रामदास कदमांना मानसिक उपचारांची गरज असल्याचं म्हटलं आहे. शिवाय रामदास ते फर्स्टेट झालेत. कारण त्यांना सतत वाटतं की एकनाथ शिंदे त्यांच्या पाठिशी नाहीत. कोकणात उदय सामंतांचं प्रस्थ वाढतंय मात्र दुसरीकडे कदमांचं दमन होतंय. त्यामुळे आपल्या मुलाचं काय होणार? असं त्यांना वाटतंय कारण त्यांच्या मुलाच्या बारवर रेड पडली ती रेड एकनाथ शिंदे थांबवू शकले नसते का?' असा सवालही अंधारे यांनी उपस्थित केला.

मुंबईत आज मध्य रेल्वेच्या नियमित देखभाल आणि अभियांत्रिकी कामांसाठी मेगा ब्लॉक घेण्यात येणार आहे. प्रवाशांच्या सुरक्षिततेसाठी आणि पायाभूत सुविधांच्या देखभालीसाठी हे ब्लॉक आवश्यक असून प्रवाशांना होणाऱ्या गैरसोयीबद्दल रेल्वे प्रशासनाने दिलगीरी व्यक्त केली आहे.

पुण्यात शरद पवारांच्या राष्ट्रवादीचे वडगाव शेरीचे आमदार बापू पठारे यांना लोहगावात धक्काबुकी झाल्याची धक्कादायक घटना समोर आली आहे. ही धक्काबुक्की अजित पवारांच्या राष्ट्रवादीचे बंडू खांदवे यांच्याशी झालेल्या वादानंतर झाल्याची माहिती समोर आली आहे. या प्रकरणी लोहगाव पोलीस ठाण्यात परस्परविरोधीत तक्रारी दाखल करण्यात आली आहे.

केंद्रीय गृह तथा सहकारमंत्री अमित शहा महाराष्ट्र दौऱ्यावर असून काल रात्री ते शिर्डीत पोहोचले आहेत. त्यानंतर आज लोणी व कोपरगाव येथे त्यांची सभा होणार आहे. या सभेसाठी भाजपने शक्तिप्रदर्शन करण्याचे नियोजन केले आहे. कोपरगावमध्ये शेतकरी मेळावा, तसंच देशातील पहिला सहकारी साखर कारखान्याच्या वतीने, क्रॉम्प्रेस बायोगॅस प्रकल्पाचे उद्घाटन शहांच्या हस्ते केलं जाणार आहे.