Maharashtra Cabinet expansion : विधान परिषदेच्या निकाल लागताच राज्य मंत्रिमंडळ विस्तार? कोणाला लॉटरी लागणार?

Mumbai News, 13 July : शिंदे सरकारचा पुढील आठवड्यात मंत्रिमंडळ विस्तार होण्याची दाट शक्यता आहे. याबाबतची माहिती विश्वसनीय सूत्रांनी दिली असून त्यानुसार येत्या मंगळवारी किंवा बुधवारी मंत्रिमंडळ विस्तार होईल असं सांगितलं जात आहे. त्यामुळे या मंत्रीमंडळ विस्तारात कोणत्या नेत्यांना लॉटरी लागणार याबाबतची उत्सुकता आहे.

शिवाय या पार्श्वभूमीवरच राष्ट्रवादी काँग्रेसच्या नेते दिल्लीला जाणार असल्याची माहिती देखील सुत्रांनी दिली आहे. लोकसभा निवडणुका जाहीर झाल्यापासून राज्यातील मंत्रिमंडळाचा विस्तार होणार असल्याचं बोललं जात आहे.

पावसाळी अधिवेशनाच्या (Monsoon sessions) आधी देखील या चर्चांना उधाण आलं होतं. पण अद्याप मंत्रिमंडळ विस्तार झालाच नाही. मात्र, आता पुढील आठवड्यात मंत्रिमंडळ विस्तार होणार असल्याची माहिती समोर येत आहे. पावसाळी अधिवेशनापूर्वीच राज्य मंत्रिमंडळाचा विस्तार पार पडेल, असं बोललं जात होतं. मात्र विधान परिषदेच्या निवडणुकीमुळे तो न केल्याचं सांगितलं जात आहे.

नुकताच विधान परिषदेचा निकाल समोर आला आहे. यात महायुतीने चांगली कामगिरी केली आहे. त्यामुळे विधानसभेसाठीची राजकीय गणितं डोक्यात ठेवून महायुतीतील वरिष्ठ योग्य त्या नेत्यांना मंत्रि‍पदाची संधी देण्याची शक्यता आहे. अजित पवार शिंदे-फडणवीस सरकारमध्यए सामील झाल्यानंतर मंत्रिमंडळ विस्तारात अजितदादांच्या (Ajit Pawar) गटातील नेत्यांना मोठ्याप्रमाणावर संधी देण्यात आली होती. त्यानंतर आणखी मंत्रिमंडळ विस्तार केला जाईल अशा चर्चा सुरु होत्या. मात्र अद्याप काही मंत्रिमंडळ विस्तार झाला नाही.

लोकसभा (Lok Sabha) निवडणुका त्यानंतर लगेच पावसाळी अधिवेशन आणि विधान परिषदेच्या निवडणुका पार पडल्या आहेत. शिवाय दोन महिन्यात विधानसभेच्या निवडणुका लागणार असल्यामुळे आता काहीही करुनमंत्रिमंडळ विस्तार केला जाणार असल्याचं सांगितलं जात आहे. तर येत्या आठवड्यातच तो विस्तार होऊ शकतो असं सुत्रांकडून सांगण्यात येत आहे.

त्यामुळे आता भाजप, शिंदे गट आणि अजितदादा गटाकडून कोणत्या आमदारांना मंत्रीपदाची संधी दिली जाणार, याकडे सर्वांच्या नजरा लागल्या आहेत. या विस्तारामुळे विधानसभा निवडणुकीपूर्वी महायुतीच्या घटकपक्षांमधील नेत्यांमध्ये उत्साह निर्माण होईल यात शंका नाही.