Devendra Fadnavis : दुष्काळग्रस्तच्या पहिल्या यादीत नसलेल्या तालुक्यांसाठी मोठी बातमी; CM फडणवीसांनी दिला शब्द...

दुष्काळाच्या पहिल्या यादीत नाव नसलेल्या तालुक्यांसाठीही सरकारकडून दिलासा मिळण्याची शक्यता आहे. मुख्यमंत्री देवेंद्र फडणवीस यांनी दुष्काळी परिस्थितीबाबत महत्त्वाचे निर्देश दिले असून, केवळ तांत्रिक निकषांवर निर्णय न घेता प्रत्यक्ष पिकांच्या नुकसानीची पाहणी करण्याचे स्पष्ट केले आहे.

दुष्काळग्रस्त तालुक्यांसाठी मोठी बातमी

राज्यात यंदा पावसाच्या अनियमिततेमुळे अनेक भागांमध्ये दुष्काळसदृश परिस्थिती निर्माण झाली आहे. सुरुवातीच्या काळात काही भागांत चांगला पाऊस झाला. मात्र त्यानंतर पावसाने मोठी उघडीप दिल्याने अनेक ठिकाणी पिकांना फटका बसला. पावसाअभावी उभी पिके करपल्याने शेतकऱ्यांचे मोठे नुकसान झाले आहे.

राज्यातील 358 पैकी 265 तालुक्यांमध्ये ट्रिगर 1 लागू झाल्याने या तालुक्यांना दुष्काळग्रस्त म्हणून घोषित करण्यात आले आहे. म्हणजेच राज्यातील सुमारे 75 टक्के भाग दुष्काळाच्या कक्षेत आला आहे. या तालुक्यांसाठी शासनाने विविध सवलती आणि उपाययोजनांची घोषणा केली आहे.

मात्र ज्या तालुक्यांमध्ये ठराविक तांत्रिक निकष पूर्ण झाले नाहीत, अशा भागातील शेतकऱ्यांना दुष्काळी मदतीपासून वंचित राहण्याची शक्यता निर्माण झाली होती. त्यामुळे मंत्रिमंडळ बैठकीत अनेक मंत्र्यांनी आपापल्या भागातील शेतकऱ्यांच्या नुकसानीचा मुद्दा मांडला.

फक्त कागदावरील आकडे नकोत; प्रत्यक्ष पाहणी होणार

या पार्श्वभूमीवर मुख्यमंत्री देवेंद्र फडणवीस यांनी महत्त्वाची भूमिका स्पष्ट केली. केवळ कागदोपत्री निकषांच्या आधारे दुष्काळाचा निर्णय न घेता प्रत्यक्ष परिस्थितीची पाहणी करण्याचे निर्देश देण्यात आले आहेत. ज्या भागात पिकांचे मोठ्या प्रमाणावर नुकसान झाले आहे, त्या ठिकाणी प्रत्यक्ष शेतावर जाऊन पाहणी केली जाणार आहे. त्यामुळे सुरुवातीच्या दुष्काळग्रस्त यादीत नाव नसलेल्या तालुक्यांनाही दिलासा मिळण्याची शक्यता आहे.

विशेष म्हणजे ही पाहणी केवळ तालुका पातळीवर मर्यादित न ठेवता मंडळ स्तरावरही करण्याचा विचार आहे. त्यामुळे एखाद्या तालुक्यातील काही भागात मोठे नुकसान झाले असेल, तर त्या भागातील शेतकऱ्यांची परिस्थिती स्वतंत्रपणे तपासता येणार आहे. यामुळे दुष्काळग्रस्त यादीत नसलेल्या तालुक्यांतील शेतकऱ्यांसाठी सरकारचा हा निर्णय महत्त्वाचा ठरणार आहे.