Maharashtra Farmer Loan Waiver : महाराष्ट्रातील शेतकऱ्यांसाठी महत्त्वाची बातमी समोर आली आहे. पुण्यश्लोक अहिल्यादेवी होळकर शेतकरी कर्जमुक्ती योजना-2026 अंतर्गत कर्जमाफीसाठी पात्र ठरलेल्या 1 लाख 15 हजार 697 शेतकऱ्यांची चौथी यादी प्रसिद्ध करण्यात आली आहे. या शेतकऱ्यांना कर्जमाफीचा लाभ मिळवण्यासाठी आधार प्रमाणीकरण करावे लागणार आहे. सहकार मंत्री बाबासाहेब पाटील यांनी यासंदर्भात माहिती दिली.
या योजनेत एकापेक्षा अधिक बँकांमध्ये पीककर्ज खाती असलेल्या आणि 2 लाख रुपयांपेक्षा कमी कर्जथकबाकी असलेल्या पात्र शेतकऱ्यांचा समावेश करण्यात आला आहे. त्यामुळे चौथ्या यादीत नाव असलेल्या शेतकऱ्यांनी आपली कर्जखाती आणि थकबाकीची माहिती तपासून पुढील प्रक्रिया पूर्ण करणे आवश्यक आहे.
राज्य सरकारच्या माहितीनुसार, आतापर्यंत 15.85 लाख शेतकऱ्यांना या योजनेचा लाभ मिळाला आहे. पात्र शेतकऱ्यांच्या कर्जखात्यांवर एकूण 13,275 कोटी रुपये जमा करण्यात आले आहेत. दरम्यान, योजनेच्या पोर्टलवर बँकांकडून 31.17 लाख थकीत कर्जखात्यांची माहिती अपलोड करण्यात आली आहे.
कर्जमाफीच्या चौथ्या यादीतील पात्र शेतकऱ्यांना संबंधित बँक शाखा, विकास संस्था आणि ग्रामपंचायतींमध्ये यादी पाहता येणार आहे. शेतकऱ्यांनी 31 मार्च 2026 रोजीची कर्जथकबाकी तपासून जवळच्या आपले सेवा केंद्रात आधार प्रमाणीकरण करून घ्यावे. ही प्रक्रिया पूर्ण झाल्यानंतर नियमानुसार कर्जमाफीची रक्कम संबंधित कर्जखात्यावर जमा केली जाणार आहे.
योजनेत काही विशेष परिस्थितीतील लाभार्थ्यांसाठीही तरतुदी करण्यात आल्या आहेत. राष्ट्रीयीकृत आणि व्यापारी बँकांमधील काही पात्र कर्जखात्यांसाठी शासनाच्या ‘हेअरकट’ धोरणानुसार कर्जमुक्तीचा लाभ देण्याची व्यवस्था आहे. तसेच मृत, वयोवृद्ध आणि बोटांचे ठसे नोंदवताना अडचणी येणाऱ्या पात्र लाभार्थ्यांसाठी स्वतंत्र मानक कार्यप्रणाली लागू करण्यात आली आहे.
कर्जमाफीच्या पहिल्या, दुसऱ्या आणि तिसऱ्या याद्यांनंतर आता चौथी यादी जाहीर झाली आहे. त्यामुळे अद्याप लाभ न मिळालेल्या शेतकऱ्यांनी संबंधित बँक किंवा ग्रामपंचायतीशी संपर्क साधून आपले नाव तपासावे. यादीत नाव असल्यास आधार प्रमाणीकरणाची प्रक्रिया लवकर पूर्ण करावी, जेणेकरून पात्रतेनुसार कर्जमाफीचा लाभ मिळण्याचा मार्ग मोकळा होईल.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.