Maharashtra Politics Live Update : नाशिक भूकंपाच्या धक्क्यांनी हादरलं

डी.वाय.दादा आणि माझ्या वयात फार मोठं अंतर होतं. तरीसुद्धा राजकीय आणि सामाजिक जीवनात काम करत असताना फार वेळा त्यांचे माझे संबंध आले. आमचे सहकारातील गुरु शामराव भिवाजी पाटील आणि डी.वाय.दादांची फार मोठी मैत्री होती. आमदार असतात त्यांनी केलेलं काम आणि राजाराम सहकारी कारखाना कारखाना होण्यासाठी त्यांनी दिलेला लढा. एखाद्या राकट पाटील कसा असावा याचं उत्तम उदाहरण म्हणजे डी.वाय.पाटील होते, अशा शब्दात हसन मुश्रीफांनी डी.वाय. पाटलांच्या आठवणींना उजाळा दिला.

नाशिक-पुणे रेल्वे संगमनेर चाकणमार्गे व्हावी ही मागणी आहे. त्यात राजकारण आडवे आल्याने हा मार्ग बदलण्याचे प्रयत्न आहेत. त्याला आज लोकप्रतिनिधी थेट आव्हान देणार आहेत. नाशिक पुणे रेल्वे मार्ग प्रक्रिया सुरू असताना अचानक तो शिर्डी मार्गे वळविण्यात आला. त्या विरोधात या भागातील नागरिकांमध्ये संतापाचे वातावरण आहे. हा संताप आज रस्त्यावर उतरणार आहे.

काँग्रेस नेते बाळासाहेब थोरात यांच्या नेतृत्वाखाली आणि आवाहनाला प्रतिसाद म्हणून पाच ठिकाणी रास्ता रोको होणार आहे. संगमनेर (हिवरगाव) येथे थोरात आणि खासदार निलेश लंके नाशिक पुणे रेल्वे रास्ता रोको करतील. समृद्धी महामार्गावर आमदार सत्यजित तांबे यांच्या नेतृत्वाखाली रास्ता रोको होईल.

नवी मुंबईत भाजप नगरसेवक नवनाथ बन यांनी मनसे अध्यक्ष राज ठाकरे यांच्यावर केलेल्या टीकेनंतर मनसेकडून जोरदार पलटवार करण्यात आला आहे. नवनाथ बन यांनी राज ठाकरे हे मुलगा अमित ठाकरे यांचं राजकीय करिअर सेट करण्यासाठी तरुणांची गरज असल्याने त्यांच्यासोबत आंदोलन करत असल्याची टीका केली होती. यावर मनसे प्रवक्ते आणि पनवेल महानगर अध्यक्ष योगेश चिले यांनी नवनाथ बन यांच्यावर जहरी टीका केली. “फडणवीसांचे बूट चाटून नवनाथ बन यांची जीभ खराब झाली असून, ती अधिक खराब होऊन गळून पडेल,” असा घणाघात योगेश चिले यांनी केला.

डोंबिवली शास्त्रीनगर रुग्णालयातील डॉक्टर, नर्स आणि कर्मचाऱ्यांना मारहाण प्रकरणातील आरोपी नगरसेवक रमेश म्हात्रे यांची अखेर आधारवाडी कारागृहातून सुटका झाली आहे. हायकोर्टाच्या अटींची पूर्तता केल्यानंतर त्यांची सुटका करण्यात आली. मात्र चार्जशीट दाखल होईपर्यंत महाराष्ट्रात प्रवेश करण्यास बंदी असल्याने रमेश म्हात्रे थेट गोव्याला रवाना झाले आहेत.

पोलिसांनी आधुनिक तंत्रज्ञान वापर करून गुन्ह्यांचा तपास करावा, असं मत राज्याचे पोलिस महासंचालक सदानंद दाते यांनी व्यक्त केलं आहे. केंद्रीय गृहमंत्री दक्षता पदक जबाबदारीचे असून हे पदक ते बाळगताना परंपरांचे पालन करण्याची आवश्यकता आहे. नव्याने खात्यात येणाऱ्यांसाठी हे पदक आदर्श ठरणारे आहे. आपल्या कामात आधुनिक तंत्रज्ञान वापर करून गुन्ह्यांचा तपास केला गेला पाहिजे. यासाठी व्यवस्थात्मक रचना निर्माण करावी लागेल, असं दाते यांनी म्हटलं आहे. राज्यातील सन २०२३ व २०२४ मधील उत्कृष्ट अन्वेषणासाठी निवड झालेल्या एकूण २२ पोलिस अधिकारी व अंमलदार यांना भारत सरकार, केंद्रीय गृहमंत्रालय पुरस्कृत ‘सर्वोत्कृष्ट अन्वेषण पदक’ प्रदान करण्याचा पुरस्कार वितरण समारंभ पोलिस संशोधन केंद्रात पोलिस महासंचालक सदानंद दाते यांच्या हस्ते आयोजित करण्यात आला. त्याप्रसंगी ते बोलत होते.

पुण्यात ११ ऑगस्ट पासून दूध दरात दोन रुपयांची वाढ केली जाणार आहे. त्यामुळे दुग्धजन्य पदार्थही १० टक्क्यांपर्यंत महागणार आहेत. गायी आणि म्हशीच्या दुधात प्रति लिटर २ रुपयांनी वाढ होणार आहे. डिझेल, साखर, पॅकिंग साहित्य तसेच दूध खरेदी दरात झालेल्या वाढीमुळे उत्पादन खर्चात मोठी वाढ झाल्याने दूध विक्री दरात प्रतिलिटर दोन रुपयांची वाढ करण्याचा निर्णय दूध उत्पादक व प्रक्रिया कल्याणकारी संघाच्या सभासदांच्या बैठकीत घेण्यात आला आहे.

 मुख्यमंत्री देवेंद्र फडणवीस आज कोल्हापूर दौऱ्यावर असून या दौऱ्यात ते आष्ट्यासह कागलमधील विविध विकासकामाचं उद्धाटन करणार आहेत.

नाशिक जिल्ह्यात शनिवारी रात्री सुमारे दहा वाजण्याच्या सुमारास भूकंपाचे धक्के जाणवले. या भूकंपामुळे नागरिकांमध्ये भीतीचे वातावरण निर्माण झाले आहे. नाशिकच्या सुरगाणा तालुक्यातील सराड आश्रम शाळेच्या भिंतींना यापूर्वी ३.९ रिस्टर स्केलच्या धक्क्याने भेगा पडल्या होत्या. रात्री झालेल्या भूकंपाचे हादरे बसल्यावर आश्रम शाळेतील विद्यार्थी भयभीत होऊन बाहेर मोकळ्या जागेत आले. प्रशासनाने नागरिकांनी संयम ठेवण्याच्या आणि रात्री सुरक्षित ठिकाणी झोपण्याचं आवाहन केलं होतं. तसंच अफवा पसरवू नये असंही आवाहन रात्री प्रशासनाने नाशिककरांना केलं.