Maharashtra Breaking News LIVE : अमरनाथ यात्रेचा पहिला पाच हजारांहून अधिक भाविकांचा ताफा रवाना

जम्मू-काश्मीरचे नायब राज्यपाल मनोज सिन्हा यांनी गुरुवारी कडेकोट सुरक्षा व्यवस्थेत भगवतीनगर तळावरून अमरनाथ यात्रेच्या पहिल्या तुकडीला हिरवा झेंडा दाखवला. ही 57 दिवसांची यात्रा तीन जुलैपासून पहलगाम आणि बालटाल या दोन्ही मार्गांनी सुरू होणार असून 28 ऑगस्टला तिची सांगता होईल. ‘हर हर महादेव’च्या जयघोषात पाच हजारांहून अधिक भाविकांचा ताफा रवाना झाला. यात्रेकरूंनी प्रशासन आणि सुरक्षा यंत्रणांनी केलेल्या व्यवस्थेचे कौतुक केले.

तिरुअनंतपुरम इथल्या शबरीमला मंदिरातील सोने हरविल्याप्रकरणी 2025 मध्ये मंदिरातील धातूच्या कलाकृतींचे पुनर्प्लेटिंग करण्यासाठी मुख्य आरोपी उन्नीकृष्णन पोट्टी याच्याशी संगनमत केल्याचा आरोप त्रावणकोर देवस्वम मंडळाचे माजी अध्यक्ष पी. एस. प्रशांत यांनी फेटाळला. 2019 मधील पुनर्प्लेटिंगची माहिती 2025 मध्ये न्यायालयीन कागदपत्रांमधूनच समजल्याचा दावा त्यांनी केला. या प्रकरणी ‘एसआयटी’ तपास सुरू आहे.

मुसळधार पावसामुळे नद्यांच्या पाणीपातळीत झपाट्याने मोठी वाढ होताना दिसत आहे. काल रात्रीपासून रायगडमध्ये पावसाचा जोर वाढला आहे. केंद्रीय जल आयोगाकडून प्रमुख नद्यांची पाणी पातळी, प्रवाह यांची मापणी केली जात आहे. काउंटर आणि कर मशीनच्या सहाय्याने सध्या नद्यांची पाणी पातळी आणि पाण्याचा प्रवाह मोजला जात आहे.

मुंबईच्या पश्चिम उपनगरात पुन्हा एकदा जोरदार पावसाला सुरुवात झाली आहे. सकाळपासून पश्चिम उपनगरात रिप रिप पाऊस सुरूच आहे. आता जोर वाढला आहे. मात्र मागील 20 मिनिटांपासून पुन्हा जोरदार पावसाला सुरुवात झाली आहे.

सकाळपासून सुरु असलेल्या पावसामुळे मुंबई गोवा महामार्गावर माणगावमध्ये पावसाचे पाणी रस्त्यावर साचले आहे. पहिल्या पावसा पासून आजही हि परिस्थिती कायम आहे. रस्त्यावर साचलेल्या या पाण्यामधुन मार्ग काढताना वाहन चालकांना कसरत करावी लागत आहे. महामार्गावर साचत असलेल्या या पाण्याकडे आणि येथे निर्माण होणाऱ्या परिस्थितीकडे प्रशासनाचे दुर्लक्ष होत आहे.