माजी खासदार विनायक राऊत यांच्या सुनेने आरोप केल्यानंतर फिरोजबाबा याला शनिवारी रात्री अकरा वाजता ठाणे पोलिसांनी ताब्यात घेतले. गीतेश राऊत आणि विनायक राऊत यांच्यावर जादूटोणा आणि अघोरी कृत्य केल्याचे तक्रारीत आरोप आहे. सावंतवाडी कोलगाव येथील फिरोजबाबा याच्यामार्फत विनायक राऊत व गीतेश राऊत यांनी अघोरी कृत्य केल्याचे आरोप सुनेने केले आहेत. या आरोपीच्या अनुषंगाने सावंतवाडी पोलिसांच्या मदतीने ठाणे पोलिसांनी फिरोजबाबाला ताब्यात घेतलं आहे.
ठाणे जिल्हा बँक निवडणुकीत बविआ आघाडीच्या उमेदवाराचा पराभव करत अरुण पाटील यांनी विजय मिळवला तर, उपाध्यक्षपदी काँग्रेसचे उमेदवार भाग्यश्री भोईर विजयी झाल्या आहेत.
आषाढी वारीदरम्यान एका वारकऱ्याला अचानक हृदयविकाराचा झटका आल्याने गंभीर आपत्कालीन परिस्थिती निर्माण झाली. मात्र, आरोग्य विभागाच्या तत्परतेमुळे संबंधित वारकऱ्याला तातडीने जीवनरक्षक उपचार मिळाले. कम्युनिटी हेल्थ ऑफिसर, आरोग्यवर्धिनी केंद्र दिवे तसेच त्यांच्या समर्पित आरोग्य पथकाने प्रसंगावधान राखत तात्काळ सीपीआर (Cardio Pulmonary Resuscitation) देऊन प्राथमिक जीवनरक्षक उपचार सुरू केले. त्यानंतर रुग्णाला पुढील उपचारासाठी त्वरित वैद्यकीय संस्थेत हलविण्यात आले.
पंढरपूरमध्ये आज सायकल दिंड्या दाखल झाल्या आहेत. नागपूर ,नाशिक, जळगाव , कोल्हापूर , सांगली , पुणे , ठाणे अशा 17 जिल्ह्यातून आलेल्या सायकल स्वरांची एकत्रित आज पंढरपूर शहरातून सकाळी दिंडी काढली. पर्यावरणाचा संदेश देणारे तब्बल 4 हजार सायकल स्वार सायकल दिंडीत सहभागी झाले होते. गेल्या सहा वर्षापासून पंढरपुरात सायकल दिंडी आणि सायकल वारीचा आयोजन केले जाते.
अयोध्या येथील श्रीराम जन्मभूमी तीर्थक्षेत्र ट्रस्टमध्ये कथित गैरव्यवहार झाल्याच्या आरोपांच्या पार्श्वभूमीवर साताऱ्यात शिवसेना उद्धव बाळासाहेब ठाकरे पक्ष, शरद पवार राष्ट्रवादी काँग्रेस आणि महाराष्ट्र नवनिर्माण सेना यांच्या संयुक्त विद्यमाने 'राम रक्षा' आंदोलन करण्यात आले. पावन हनुमान मंदिर परिसरात झालेल्या या आंदोलनातून संबंधित प्रकरणाची निष्पक्ष व सखोल चौकशी करण्याची मागणी करण्यात आली.
आषाढी पालखी सोहळ्यात सहभागी होणाऱ्या वारकऱ्यांचा पायी प्रवास सुखकर, सुरक्षित आणि आरोग्यदायी व्हावा, या उद्देशाने मुख्यमंत्री देवेंद्र फडणवीस यांच्या संकल्पनेनुसार मुख्यमंत्री साहाय्यता निधी कक्षामार्फत 'चरणसेवा' उपक्रम सातत्याने राबविण्यात येत आहे. या उपक्रमांतर्गत अहिल्यानगरच्या नेवासा इथले पी. व्ही. बेल्हेकर आयुर्वेदिक मेडिकल कॉलेज अँड हॉस्पिटल तसेच डॉ. विखे पाटील मेमोरियल हॉस्पिटल अँड मेडिकल कॉलेज यांच्या माध्यमातून दोन ठिकाणी चरणसेवा व आरोग्य सेवा उपक्रमांचे आयोजन करण्यात आले.
शिवसेना ठाकरे पक्षाचे खासदार संजय राऊत यांनी उपमुख्यमंत्री एकनाथ शिंदे आणि महायुतीमधील संभाव्य बदलांविषयी केलेल्या विधानावर एकनाथ शिंदे शिवसेनेचे आमदार नरेंद्र भोंडेकर यांनी जोरदार पलटवार केला. संजय राऊत हे काही ज्योतिष नाहीत, त्यांचं काम फक्त भांडणं लावण्याचं असल्याची टीका भोंडेकर यांनी केली. भोंडेकर यांनी राऊतांचा चांगलाच समाचार घेताना संजय राऊत यांचं फक्त ज्योतिष होणे बाकी होते, तेही आता झालेत. पण, ते कोणतेही ज्योतिष वगैरे नाहीत. महायुतीमध्ये कोण मुख्यमंत्री होणार आणि कोण नाही, हे ठरवण्यासाठी महायुतीचे सर्व वरिष्ठ नेते पूर्णपणे सक्षम मुख्यमंत्री कोण असेल, हे महायुतीचे नेते योग्य वेळी ठरवतील, असा टोला भोंडेकर यांनी संजय राऊत यांना लगावला.
ज्येष्ठ नेते एकनाथ खडसे पुन्हा घरवापसी करण्याच्या तयारीत होते. मात्र, त्यांनी आता भाजपमध्ये जाण्यात त्यांना आता कोणताही इंटरेस्ट नसल्याचं म्हटलं आहे. भाजप प्रवेशामध्ये आता मला इंटरेस्ट राहिलेला नाही. मी शरद पवारांबरोबर आहे आणि त्यांच्याबरोबरच राहीन. माझ्या भाजप प्रवेशासाठी माझे काही कार्यकर्ते इच्छूक आहेत, हे मी मान्य करणार नसल्याचं खडसे यांनी स्पष्ट केलं आहे.
शिवसेना उद्धव बाळासाहेब ठाकरे यांच्या शिवसेनेचे ज्येष्ठ नेते आणि माजी खासदार विनायक राऊत यांच्यावर त्यांच्या सुनेने अतिशय गंभीर आणि खळबळजनक आरोप केले आहेत. गिरीजा राऊत यांनी दिलेल्या तक्रारीवरून ठाण्यातील कापूरबावडी पोलीस ठाण्यात कौटुंबिक छळासोबतच 'जादूटोणा विरोधी कायद्यान्वये' राऊत कुटुंबियांविरोधात गुन्हा दाखल करण्यात आला आहे.
विधिमंडळात गाजलेल्या शालार्थ आयडी घोटाळ्याला काल वेगळे वळण लागले. केंद्रीय राज्यमंत्री रामदास आठवले यांच्या पक्षाचा नेताच या घोटाळ्याचा मास्टरमाइंड निघाला. त्यामुळे शिक्षण विभागातील या घोटाळ्याचा राजकारणाशी थेट संबंध समोर आला आहे. तर शालार्थ आयडी घोटाळ्याचा मास्टरमाईंड प्रशांत वाडीले याला धुळे येथून अटक झाली.
नंदुरबार जिल्ह्यातील शहादा शहरातील समाज कल्याण वस्तीगृहात विद्यार्थ्यांना अन्नातून विषबाधा झाल्याची घटना समोर आली आहे. वस्तीगृहातील 40 ते 50 विद्यार्थ्यांना अन्न विषबाधा झाली असून 3 विद्यार्थ्यांची प्रकृती चिंताजनक आहे.
पुण्यातील मोशी इमारत दुर्घटनेचं शोधकार्य जवळपास चार दिवसांनी पूर्ण झालं आहे. या दुर्घटनेत 9 कामगारांचा मृत्यू झाला आहे. तर 14 कामगार बचावले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.