Maharashtra Politics Live Update: मनसे शहराध्यक्ष अविनाश जाधव यांना सुरक्षा देण्याची मागणी

ठाण्यातील भ्रष्टाचार आणि गैरवहारांसोबत अत्याचाराच्या मुद्द्यावर आवाज उठवणाऱ्या अविनाश जाधव यांना पोलीस सुरक्षा देण्यात यावी अशी मागणी मनसेने केली आहे.

महाराष्ट्र नवनिर्माण सेनेने पोलीस आयुक्तांना पत्र लिहित मागणी केली आहे. पोलीस आयुक्तांसह राज्याचे गृहमंत्री आणि मुख्यमंत्र्यांकडे देखील सुरक्षेसंदर्भात मागणी केल्याची माहिती आहे. गेल्या ६ महिन्यात 60 हत्या ठाण्यात झाल्याचा दावा मनसेने केला असून त्यापार्श्वभूमीवर अविनाश जाधव यांना सुरक्षा देण्याची मागणी मनसेने केली आहे.

अल्पसंख्यांक शैक्षणिक संस्थांमधील शिक्षक आणि शिक्षकेतर कर्मचाऱ्यांच्या नियुक्त्या पवित्र पोर्टलद्वारे करणे तसेच त्यासाठी पूर्वपरवानगी घेणे बंधनकारक नसल्याचा निर्णय मुंबई उच्च न्यायालयाच्या नागपूर खंडपीठाने दिला आहे. यामुळे अल्पसंख्यांक संस्थांना दिलासा मिळाला आहे. आमदार धर्मरावबाबा आत्राम सचिव असलेल्या भगवंतराव स्मृती शिक्षण संस्थेलाही अल्पसंख्यांक संस्थेचा दर्जा मिळाला आहे.

पिंपरी-चिंचवडमध्ये अमली पदार्थांच्या विक्रीविरोधात हिंजवडी पोलिसांनी कारवाई केली आहे. वाकड परिसरात एमडी या प्रतिबंधित अमली पदार्थाची विक्री करण्यासाठी आलेल्या आरोपीला पोलिसांनी सापळा रचून ताब्यात घेतले. त्याच्याकडून १२ लाख ४५ हजार रुपये किमतीचे २४९ ग्रॅम एमडी, एक मोटारसायकल आणि दोन मोबाईल फोन जप्त करण्यात आले. या कारवाईत एकूण १३ लाख ४५ हजार रुपयांचा मुद्देमाल हस्तगत करण्यात आला असून, या प्रकरणात दोघांना अटक करण्यात आली आहे.

दिल्लीतील कनॉट प्लेस येथील सेंट्रल पार्क आजपासून दोन दिवस, म्हणजेच १६ आणि १७ ऑक्टोबर रोजी सर्वसामान्यांसाठी बंद ठेवण्यात येणार आहे. नवी दिल्ली महानगरपालिकेने प्रशासकीय कारणास्तव हा निर्णय घेतला आहे. दरम्यान, CJPचे संस्थापक अभिजीत दिपके यांनी याच ठिकाणी ‘लहरा दो तिरंगा’ मोर्चाचं आवाहन केलं आहे. CJPच्या आंदोलनाच्या पार्श्वभूमीवर दिल्लीमध्ये सुरक्षा व्यवस्था वाढवण्यात आली असून, परिसरात प्रतिबंधात्मक आदेश लागू आहेत.

पुणे जिल्ह्यात पीक नुकसानीचे ८० टक्के पंचनामे पूर्ण झाल्याची माहिती जिल्हाधिकारी डुडी यांनी दिली. परिस्थितीच्या 'दुष्काळी पार्श्वभूमीवर, पीक नुकसानीचे पंचनामे युद्धपातळीवर सुरू असून, आतापर्यंत जिल्ह्यातील सुमारे ८० टक्के पंचनामे पूर्ण झाले आहेत.

पुणे : पुणे शिक्षक मतदारसंघाच्या निवडणुकीवरून महायुतीमधील अंतर्गत संघर्ष समोर आला आहे. मुख्यमंत्री देवेंद्र फडणवीस यांनी विधान परिषदेच्या पाचही जागा महायुती लढवणार असल्याचा दावा केला असला, तरी उपमुख्यमंत्री एकनाथ शिंदे यांनी काही ठिकाणी मैत्रीपूर्ण लढत होण्याची शक्यता व्यक्त केली आहे. पुणे शिक्षक मतदारसंघात अपक्ष उमेदवार सचिन सानप यांना शिंदे यांच्या शिवसेनेने पाठिंबा दिला आहे. त्यामुळे भाजपचे उमेदवार कौस्तुभ गावडे यांच्यासमोर सानप यांचे आव्हान उभे राहिले आहे. महायुतीतील घटक पक्षांकडूनच वेगवेगळ्या भूमिका घेतल्या जात असल्याने राजकीय वर्तुळात चर्चांना उधाण आले आहे. सानप विरुद्ध गावडे या लढतीकडे आता सर्वांचे लक्ष लागले आहे.