Maharashtra Politics News live : फडणवीस यांनी खोटी माहिती देऊन सभागृह व जनतेची दिशाभूल केली

मुख्यमंत्र्यांनी प्रोटोकॉल सोडून अजित पवार यांच्या शासकीय बंगल्यावर जाऊन रात्री चर्चा केली व त्यातून धनंजय मुंडे यांचा राजीनामा झाला. सरकारला या प्रकरणाची सर्व माहिती होती पण त्यांनी ती लपवली. नागपूरच्या हिवाळी अधिवेशनातही मुख्यमंत्री फडणवीस यांनी खोटी माहिती देऊन सभागृह व जनतेची दिशाभूल केली. सरपंच हत्येमध्ये वाल्मिक कराड व त्याचे सहकारी आरोपी आहेत, पण सरकारने या प्रकरणातील माहिती लपवल्याने त्यांनाही सहआरोपी केले पाहिजे. असंही पटोलेंनी म्हटलं आहे.

संतोष देशमुख हत्या प्रकरणातील सहभागी आरोपींच्या विरोधात स्वतंत्र तपास करावा, अशी मागणी वकील संघाच्यावतीने केली गेली आहे. या हत्याकांडाचे फोटो व्हायरल झाल्यानंतर जनसामान्यांत प्रचंड संताप आहे.

कृषीमंत्री माणिकराव कारोटे उपमुख्यमंत्री अजित पवार यांच्या भेटीसाठी देवगिरी बंगल्यावर दाखल झाले आहेत. मंत्री धनंजय मुंडेंच्या राजीनाम्यानंतर अजित पवारांनी राष्ट्रवादीच्या सर्व नेत्यांची आज महत्वाची बैठक बोलावी आहे. या बैठकीला राष्ट्रवादीचे सर्व महत्वाचे नेते उपस्थित राहिले आहेत. अशातच आता माणिकराव कोकाटे देखील अजित पवारांच्या भेटीसाठी आले आहेत. तर कोकाटेंच्या शिक्षेवर उद्या कोर्टात सुनावणी सुरू आहे. त्यापूर्वी ते अजितदादांच्या भेटीला आल्यामुळे तर्कवितर्क लढवले जात आहेत.

धनंजय मुंडे यांच्या राजीनाम्यानंतर शिंदेंच्या शिवसेनेचे मंत्री संजय शिरसाट यांनी प्रतिक्रिया दिली आहे. यावेळी त्यांनी कोणालाही माफी दिली जाणार नसल्याच्या मुख्यमंत्री देवेंद्र फडणवीसांच्या वक्तव्याची आठवण करून दिली आहे. माध्यमांशी बोलताना शिरसाट म्हणाले, "मस्साजोग गावचे सरपंच संतोष देशमुख यांची निर्घृणपणे हत्या केल्याच्या घटनेचा सर्वांनीच निषेध नोंदवला होता. मुख्यमंत्री फडणवीस यांनी त्या घटनेवर भाष्य करताना या प्रकरणातील दोषींवर कठोर कारवाई होईल, कोणालाही माफी मिळणार नाही असं भाष्य केलं होतं."

पुण्यातील स्वारगेट बसस्थानकातील बलात्कार प्रकरणी मोठी अपडेट समोर आली आहे. ती म्हणजे या प्रकरणातील पीडितेचा आता न्यायालयात जबाब नोंदवण्यात आला आहे. पीडितेने हा जबाब इन कॅमेरा नोंदवला असून तो जबाब लिफाफा बंद पाकिटात न्यायालयात सादर करण्यात आला आहे.

सरपंच संतोष देशमुख यांच्या हत्या प्रकरणात सीआयडीकडून दोषारोप पत्र दाखल करण्यात आलं आहे. या दोषारोप पत्रातील देशमुख यांच्या हत्येचे संतापजनक फोटो समोर आल्यामुळे राज्यातील राजकीय आणि सामाजिक वातावरण चांगलंच तापलं होतं. त्यानंतर विरोधकांनी हत्या प्रकरणाचा मुख्य सुत्रधार असलेल्या वाल्मिक कराडशी जवळीक असलेले मंत्री धनंजय मुंडेंच्या राजीनाम्याची मागणी लावून धरली होती. त्यानंतर अखेर मंगळवारी (ता.04) मुख्यमंत्री देवेंद्र फडणवीस यांच्याकडे धनंजय मुंडे यांनी राजीनामा दिला. त्यानंतर आता राज्यपालांकडूनही धनंजय मुंडे यांचा राजीनामा मंजूर करण्यात आला आहे.

संतोष देशमुख हत्या प्रकरणाचा 90 दिवसांच्या आत तातडीने निकाल द्यावा, अन्यथा राज्यभरातील ग्रामपंचायतीचे सरपंच रस्त्यावर उतरणार असल्याचा इशारा अखिल भारतीय सरपंच परिषदेने सरकारला दिला आहे. सरपंच संतोष देशमुख यांची क्रूरपणे हत्या केल्यानंतर त्याचे फोटो सोशल मिडियावर व्हायरल झाले. त्यानंतर सरपंच परिषदेत संतापाचे वातावरण आहे.

माझ्या शब्दांचा विपर्यास करण्यात आला आहे. औरंगजेब रहमतुल्ला अलेह बद्दल जे इतिहासकार आणि लेखक म्हणतात तेच मी बोललो आहे. मी छत्रपती शिवाजी महाराज, छत्रपती संभाजी महाराज किंवा इतर कोणत्याही महापुरुषांबद्दल अपमानास्पद टिप्पणी केलेली नाही. या प्रकरणाचा राजकीय मुद्दा बनवला जात आहे आणि त्यामुळे महाराष्ट्र विधानसभेचे अर्थसंकल्पीय अधिवेशन बंद करणे म्हणजे महाराष्ट्रातील जनतेचे नुकसान आहे असे मला वाटते. 

येत्या 7 मार्चपर्यंत लाडक्या बहिणींच्या खात्यामध्ये फेब्रुवारी महिन्याचे दीड हजार आणि मार्च महिन्याचे दीड हजार असे एकूण तीन हजार रुपये जमा होणार आहेत. सरकारकडून या महिन्यात लाभार्थी महिलांना डबल गिफ्ट मिळणार आहे. याबाबत मंत्री आदिती तटकरे यांनी ट्विट करत माहिती दिली आहे.

विधानसभेच्या विरोधी पक्षनेते पदावर शिवसेनेने दावा केल्यानंतर आता भास्कर जाधव यांचे नाव यासाठी निश्चित झाल्याची माहिती आहे. आदित्य ठाकरे यांचेही नाव या पदासाठी चर्चेत होते. परंतु कोकणात पक्षाला पडलेले भगदाड पाहता जाधव यांच्या रुपाने पक्ष जिवंत ठेवण्याचा प्रयत्न त्यांना विरोधी पक्षनेते पद देऊन केला जात असल्याचे बोलले जाते. भास्कर जाधव हे आक्रमक नेते असल्यामुळे त्यांच्यावर ही जबाबादारी सोपवली जाण्याची दाट शक्यता आहे.

मुख्यमंत्री रात्री ताफा घेऊन अजित पवारांना भेटायला जातात, राजीनामा लिहून घेतात. राजीनामा आल्यानंतर त्यांनी थेट माध्यमांना येऊन सांगितलं. पण, नियमानुसार मुख्यमंत्र्यांनी सभागृहाला त्याबाबत सांगणं अपेक्षित होतं. त्यामुळे उद्या आम्ही मुख्यमंत्र्यांवर हक्कभंग आणणार आहोत, असे नाना पटोले यांनी म्हटले. 

उपमुख्यमंत्री अजित पवार यांच्या उपस्थितीत आज राष्ट्रवादी काँग्रेस पक्षाच्या राज्यातील जिल्हाध्यक्षांची बैठक होणार आहे. धनंजय मुंडे यांच्या राजीनाम्यानंतर होणाऱ्या या बैठकीकडे राजकीय वर्तुळाचे लक्ष लागून राहिले आहे.

शिवसेना पक्षप्रमुख उद्धव ठाकरे हे आज विधानभवनात दाखल झाले आहेत. विधान परिषदेतील विरोधी पक्षनेते अंबादास दानवे यांच्या दालनात ठाकरे हे थांबले असून त्यांना भेटण्यासाठी राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील आणि आमदार जितेंद्र आव्हाड हे दानवेंच्या दालनात गेले आहेत.

संतोष देशमुख यांना मारहाण करण्यासाठी वापरण्यात आलेले पाईपच्या पंधरा तुकड्यांचे फोटो सीआयडीने आरोपपत्रात दिले आहेत. त्याच पाईपने देशमुख यांना अमानुषणे मारहाण करण्यात आली होती. मारहाण करताना त्या पाईपचे पंधरा तुकडे झाले होते.

संतोष देशमुख यांची अतिशय क्रूर पद्धतीने हत्या करण्यात आली. त्यासंदर्भातील फोटो आता समोर आले आहेत. मात्र, धनंजय मुंडे यांचा हा राजीनामा खूप उशिरा आला आहे, तो याधीच झाला पाहिजे होता, अशी प्रतिक्रिया सोलापूरच्या खासदार प्रणिती शिंदे यांनी दिली आहे.

काही दिवसांपूर्वी नामदेव शास्त्री यांनी धनंजय मुंडे यांची पाठराखण केली होती. पण आता मुंडे यांच्या राजीनाम्यावर प्रतिक्रिया देण्यास शास्त्री यांनी नकार दिला आहे.

छत्रपती शिवाजी महाराज आणि छत्रपती संभाजी महाराज हे महाराष्ट्राचे अराध्य दैवत आहेत. औरंगजेबाचे उदात्तीकरण करणे अयोग्य आहे, असे उपमुख्यंत्री एकनाथ शिंदे म्हणाले.

यापूर्वी मी देखील नैतिकेच्या आधारे राजीनामा दिला होता. धनंजय मुंडे यांनी ही नैतिकता आधीच दाखवायला हवी होती, अशी प्रतिक्रिया माजी मंत्री एकनाथ खडसे यांनी दिली.

संतोष देशमुख हत्येच्या निषेधार्थ मराठवाड्यात विविध ठिकाणी नागरिक आक्रमक झाले आहेत. लातूर, केज, बीडमध्ये नागरिकांनी जाळपोळ केली आहे. टायर जाळून नागरिकांकडून निषेध केला आहे. बीड जिल्हा बंदची हाक देण्यात आली आहे. या संपूर्ण हत्येचा निषेध व्यक्त करण्यासाठी केज मध्ये धारूर चौकात कार्यकर्त्यांनी टायर जाळून निषेध व्यक्त केला तसेच आरोपींना फाशीची शिक्षा देण्याची मागणी केली जात आहे.

राजीनाम्यानंतर धनंजय मुंडेंचं पहिलं ट्विट संतोष देशमुख यांच्या हत्याप्रकरणात धनंजय मुंडे यांनी राजीनामा दिल्यानंतर टि्वट केले आहे. देशमुख यांच्या निर्घृण हत्येतील आरोपींना कठोरात कठोर शिक्षा व्हावी, ही माझी पहिल्या दिवसापासूनची ठाम मागणी आहे.काल समोर आलेले फोटो पाहून तर मन अत्यंत व्यथित झाले. या प्रकरणाचा तपास पूर्ण झाला असून आरोपपत्र न्यायालयात दाखल झाले आहे.तसेच, न्यायालयीन चौकशीही प्रस्तावित आहे. माझ्या सदसद् विवेक बुद्धीला स्मरून आणि मागील काही दिवसांपासून माझी प्रकृती ठीक नसल्याने पुढील काही दिवस उपचार घेण्याचा सल्ला डॉक्टरांनी दिला आहे, असे त्यांनी म्हटलं आहे.

भाजपचे आमदार सुरेश धस यांनी यावर प्रतिक्रिया आली आहे. "धनंजय मुंडे यांना सहआरोपी करा असं मी लगेच म्हणणार नाही. एसआयटीचे मी मनापासून आभार मानीन. चार्जशीटची 32 पानं माझ्याकडे आहेत. पुरवणी आरोपपत्र दाखल करण्याचा हक्क एसआयटीने अबाधित ठेवलाय. एसआयटीने पुढील तपास करावा. संतोष देशमुख आणि मस्साजोगच्या ग्रामस्थांनी सात मागण्यांच पत्र दिलं आहे. त्यातील एक मागणी मान्य झाली. इतर सहा मागण्यांचा तपास झाला पाहिजे" अशी मागणी सुरेश धस यांनी केली आहे

संतोष देशमुख हत्या प्रकरणी धनंजय मुंडे यांनी राजीनामा दिला आहे. मुख्यमंत्री देवेंद्र फडणवीस यांनी त्यांचा राजीनामा स्वीकारला आहे.

सरपंच संतोष देशमुख हत्याप्रकरणाचे आता तीव्र पडसाद उमटले असून राज्यभर संतापाची लाट उसळली आहे. बीडमध्ये बंदची हाक देण्यात आली असून मराठा आंदोलन मनोज जरांगे यांच्यासह सुरेश धस यांनी सरकारवर जोरदार निशाना साधत धनंजय मुंडेंच्या राजीनाम्याची मागणी केली आहे. यादरम्यान आता धनंजय मुंडे आपला राजीनामा आजच देण्याची शक्यता व्यक्त केली जातेय. ते आपला राजीनामा मुख्यमंत्री देवेंद्र फडणविसांकडे राजीनामा सुपूर्त करण्याची शक्यता आहे. तर 'सातपुडा' बंगल्याच्या पोलीस सुरक्षेतही वाढ करण्यात येत आहे.

सरपंच संतोष देशमुख यांच्या हत्येचे फोटो व्हायरल झाल्यानंतर आता संतापाची लाट उसळली आहे. यावरून सरकारवर विरोधकांनी जोरदार टीका केली आहे. तर याच मुद्द्यावरून भाजप आमदार सुरेश धस यांनी देखील प्रतिक्रिया दिली असून देशमुख यांची ज्या पद्धतीने हत्या झाली हे विकृतीचं लक्षण असल्याचे त्यांनी म्हटलं आहे. तसेच सुरेश धस यांनी, अशी विकृती आणि क्रूर मानसिकता आपल्याला लवकरच ठेचावी लागेल. आता दुसरा संतोष देशमुख होऊ द्यायचा नसेल तर आरोपींना फाशीची शिक्षा द्या, अशीही मागणी सुरेश धस यांनी केली आहे.

सरपंच संतोष देशमुख हत्या प्रकरणातील फोटो समोर आल्यानंतर बीड जिल्हा बंदची हाक देण्यात आली आहे. त्याला आता सुरुवात झाली असून शहरातील मुख्य मार्केटमध्ये शुकशुकाट आहे. येथील सुभाष रोडवरील सर्व दुकाने बंद ठेवण्यात आली आहेत. मध्यरात्री उशिरा बंदची हाक देण्यात आली होती.

संभाजी महाराज यांना त्रास देणाऱ्या औरगंजेब याची स्तुती करणाऱ्या अबू आझमी यांच्यावर देश द्रोहाचा गुन्हा दाखल करण्याची मागणी शिवसेनेचे खासदार नरेश म्हस्के यांनी केली आहे. तर याबाबत विरोधात राज्यपालांकडे देखील तक्रार करणार असल्याचेही म्हस्के यांनी आहे.

सरपंच संतोष देशमुख यांच्या हत्या प्रकरणातील फोटोज माध्यमात वायरल झाल्यानंतर बीड जिल्हा बंदची हाक देण्यात आली आहे. यातील आरोपींना फाशी द्या अशी मागणी ग्रामस्थांनी केली आहे. यादरम्यान जनतेने कायदा हातात घेऊ नये असे आवाहन पोलीस अधीक्षक नवनीत कॉवत यांनी केले आहे.

संतोष देशमुख यांच्या हत्याप्रकरणामुळे अख्खा महाराष्ट्र हादरला आहे. या प्रकरणाचे फोटो समोर आले असून मंत्री धनंजय मुंडे यांचा राजीनामा निश्चित मानला जात आहेत. दरम्यान मराठा आंदोलन मनोज जरांगे यांनी देशमुख कुटुंबियांची भेट घेतली. यावेळी धनंजय देशमुख मनोज जरांगे यांच्यासमोर ढसाढासा रडले. तसेच माझ्या भावाला किती वेदना झाल्या असतील. मला आता वेदना सहत नाहीत, मला आई समोर बसल्याने, मुलं येथे असल्याने मला रडताही येत नाही. मला भावाला वाचवता आले नाही, अशी खंत धनंजय देशमुख यांनी व्यक्त केली आहे.

संतोष देशमुख यांची क्रूर हत्या करण्यात आल्याचे फोटो आता समोर आले आहेत. यामुळे राज्यभर संतापाची लाट उसळली आहे. बीड जिल्ह्यातील राज्यातील वातावरण या प्रकरणामुळे आणखी तापणार असून अधिवेशनात देखील याचे पडसाद उमटण्याची शक्यता आहे. दरम्यान मराठा आंदोलन मनोज जरांगे देखील मस्सा जोगमध्ये दाखल झाले असून त्यांनी देशमुख कुटुंबियांची भेट घेतली आहे. त्यांनी धनंजय देशमुख आणि कुटुंबियांनी धीर दिला आहे.

संतोष देशमुख यांच्या हत्येच्या फोटो समाज माध्यमांवर मोठ्या प्रमाणात व्हायरल झाले आहेत. यामुळे राज्यभर संतापाची लाट उसळली आहे. यानंतर बीड जिल्ह्यातील नागरिक आक्रमक झाले असून बीड बंदची हाक देण्यात आली आहे. याबाबत पोस्ट सोशल मीडियावर पोस्ट व्हायरल झाली आहे. दरम्यान आज मराठा आंदोलन मनोज जरांगे देखील मस्सा जोगमध्ये जाऊन देशमुख कुटुंबियांची भेट घेणार आहेत.

राज्याच्या अर्थसंकल्पीय अधिवेशनाचा आज दुसरा दिवस असून संतोष देशमुख हत्या प्रकरणाचे धक्कादायक फोटो आणि व्हिडीओ समोर आले आहेत. यामुळे धनंजय मुंडेंच्या अडचणीत वाढ होण्याची शक्यता असून बीड बंदची हाक देण्यात आली आहे. तर आज मुंडेंच्या राजीनाम्याच्या मागणीवरुन अधिवेशनात गदारोळ होण्याची शक्यता आहे.