Mahayuti Government : महायुती सरकारमध्ये मंत्रीच अस्वस्थ, अधिकार मिळेनात? CM फडणवीसांना साकडे!

Mahayuti Government News : महायुतीची सत्ता येऊन सहा महिन्याचा कालवाधी होत आला. विरोधकांकडे पुरेस संख्याबळ नसल्याने सरकारपुढे काही अडचण नसल्याचे चित्र आहे. मात्र, बाहेरील संकटांपेक्षा आतील संकटांचा सामना महायुती सरकारला आता करावा लागतोय.

महायुती सरकारमध्ये मंत्रिपद मिळाले मात्र अधिकार मिळाले नसल्याची तक्रार राज्यमंत्र्‍यांकडून करण्यात येत आहेत. कॅबिनेट मंत्र्यांकडून आपले अधिकार राज्यामंत्र्यांना देण्यासाठी टाळाटाळ करण्यात येत असल्याची बोलले जात आहे.

राज्यमंत्र्यांनी आपली तक्रार उपमुख्यमंत्री अजित पवार, उपमुख्यमंत्री एकनाथ शिंदे, मुख्यमंत्री देवेंद्र फडणवीस यांच्याकडे केली आहे. मुख्यमंत्री फडणवीस यांनी गृहराज्यमंत्री योगेश कदम यांना काही अधिकार दिले आहेत. मात्र, इतर खात्यांमध्ये राज्यमंत्र्यांना कॅबिनेट मंत्र्यांनी अधिकार दिले नसल्याची चर्चा आहे.

... तर कामकाजावर परिणाम

राज्यमंत्र्यांना अधिकार कॅबिनेट मंत्री देत नसल्याने थेट सरकारच्या कामकाजावर परिणाम होण्याची शक्यता आहे. राज्यमंत्र्यांमध्ये अस्वस्था वाढत असून पावसाळी अधिवेशनाच्या आधी यावर तोडगा निघाला नाही तर ही अस्वस्था आणखी वाढत जाण्याची शक्यता आहे.

मंत्रिमंडळ नसेल तरी फरक पडत नाही

नाशिक दौऱ्यावर असलेले शिवसेना उद्धव बाळासाहेब ठाकरे पक्षाचे खासदार संजय राऊत यांनी राज्यमंत्र्यांना अधिकार दिले जात नसल्याबाबत प्रतिक्रिया दिली आहे. ते म्हणाले, ज्यमंत्र्यांचे काय घेऊन बसला आहात?. राज्यातील कॅबिनेट मंत्र्यांना तरी कोणते अधिकार दिले आहेत. राज्यात आणि केंद्रात सगळीकडे मंत्र्यांना काहीही अधिकार नाहीत.