Prithviraj Chavan on Kharge statement : खर्गेंना विरोध, भाजपवरही निशाणा; पृथ्वीराज चव्हाणांच्या भूमिकेने राजकीय चर्चेला नवे वळण

Prithviraj Chavan reacts to Mallikarjun Kharge : पंतप्रधान नरेंद्र मोदी यांच्याविषयी काँग्रेसचे राष्ट्रीय अध्यक्ष मल्लिकार्जुन खर्गे यांनी केलेल्या वादग्रस्त विधानावरून राजकीय वातावरण तापले आहे. खर्गे यांच्या विधानाला काँग्रेसचे ज्येष्ठ नेते आणि महाराष्ट्राचे माजी मुख्यमंत्री पृथ्वीराज चव्हाण यांनी चुकीचे ठरवत पक्षालाच घरचा आहेर दिला आहे.

राजकीय नेत्यांनी सार्वजनिक व्यासपीठावर बोलताना सभ्य भाषेची मर्यादा पाळली पाहिजे, असे स्पष्ट मत चव्हाण यांनी व्यक्त केले. त्यांच्या या भूमिकेमुळे काँग्रेसमधील अंतर्गत मतभेदांची चर्चा सुरू झाली असून, भाजपलाही काँग्रेसवर टीका करण्याची संधी मिळाली आहे.

पाटणा येथील कार्यक्रमात मल्लिकार्जुन खर्गे यांनी केलेले विधान अनावश्यक होते, असे पृथ्वीराज चव्हाण (Prithviraj Chavan) यांनी म्हटले आहे. खर्गे यांनी या विधानाबाबत स्पष्टीकरण देऊन आपली बाजू मांडावी, असेही त्यांनी सुचवले. राजकीय विरोध कितीही तीव्र असला, तरी नेत्यांनी भाषेचे भान राखणे आवश्यक असल्याचे चव्हाण यांच्या भूमिकेतून स्पष्ट झाले.

मात्र, राजकीय वक्तव्यांबाबत एकाच बाजूने निकष लावणे योग्य नसल्याचे सांगत चव्हाण यांनी भाजपच्या (BJP) नेत्यांनाही लक्ष्य केले. केंद्रीय गृहमंत्री अमित शाह यांनी राहुल गांधी यांच्याविषयी यापूर्वी केलेली टिप्पणी, तसेच पंतप्रधान नरेंद्र मोदी यांनी सोनिया गांधी यांच्याविषयी केलेले वक्तव्यही अनुचित असल्याचे त्यांनी नमूद केले. त्यामुळे राजकीय नेत्यांच्या वक्तव्यांवर टीका करताना सर्वांनीच सभ्यतेची मर्यादा पाळावी, असा संदेश त्यांनी दिला.

सध्याच्या राजकीय वातावरणाबाबत चिंता व्यक्त करताना पृथ्वीराज चव्हाण यांनी संसदेतील पूर्वीच्या राजकीय संस्कृतीचा दाखला दिला. माजी पंतप्रधान अटलबिहारी वाजपेयी, सुषमा स्वराज आणि जसवंत सिंह यांच्याशी तीव्र राजकीय मतभेद असतानाही सभागृहाबाहेर सौहार्दपूर्ण संबंध कायम होते, असे त्यांनी सांगितले. मात्र, सध्याच्या राजकारणात सत्ताधारी आणि विरोधक एकमेकांकडे राजकीय प्रतिस्पर्धी म्हणून नव्हे, तर कट्टर शत्रू म्हणून पाहत असल्याची खंत त्यांनी व्यक्त केली. लोकशाहीत वैचारिक मतभेद असणे स्वाभाविक असले, तरी त्यातून वैयक्तिक कटुता वाढू नये, असा त्यांचा सूर होता.

केंद्राच्या आर्थिक अन् परराष्ट्र धोरणांवरही टीका

दरम्यान, पृथ्वीराज चव्हाण यांनी केंद्र सरकारच्या आर्थिक आणि परराष्ट्र धोरणांवरही प्रश्न उपस्थित केले. चीनने अरुणाचल प्रदेश आणि लडाखमधील काही भागांवर ताबा मिळवल्याचा दावा करत, या मुद्द्यावर पंतप्रधान नरेंद्र मोदी ठामपणे भूमिका मांडत नसल्याची टीका त्यांनी केली. पंतप्रधान दबावाखाली काम करत असतील, तर त्याचे परिणाम देशातील शेतकरी आणि लघुउद्योजकांना भोगावे लागू शकतात, असेही चव्हाण म्हणाले. केंद्र सरकारची धोरणे सदोष असल्याचा आरोप करत काँग्रेसला सत्ताबदल का हवा आहे, यामागची भूमिकाही त्यांनी स्पष्ट केली.

खर्गेंच्या विधानावरून काँग्रेसमध्ये नवा पेच?

मल्लिकार्जुन खर्गे यांच्या विधानानंतर काँग्रेसमधील अनेक नेते त्यांच्या समर्थनार्थ भूमिका मांडत असताना पृथ्वीराज चव्हाण यांनी त्याच विधानावर आक्षेप घेतला आहे. त्यामुळे पक्षाच्या अधिकृत भूमिकेबरोबरच वैयक्तिक पातळीवर नेत्यांची भूमिका किती वेगळी असू शकते, याची चर्चा सुरू झाली आहे. चव्हाण यांनी खर्गे यांच्या विधानाला विरोध करतानाच भाजपच्या नेत्यांच्या वक्तव्यांवरही बोट ठेवल्याने, हा मुद्दा केवळ काँग्रेसमधील मतभेदांपुरता मर्यादित राहिलेला नाही. विविध मुद्द्यांवरून आता राजकीय संघर्ष अधिक तीव्र होण्याची शक्यता आहे.