Maratha Reservation: मराठा आरक्षणावर आज तोडगा निघणार? दोन नेत्यांच्या भेटीकडे लक्ष

Mumbai News : मराठा आरक्षण मिळवून परत येणार, असा ठाम निर्धार करुन मराठा आंदोलन मनोज जरांगे (Manoj Jarange)हे मुंबईच्या दिशेने निघाले आहेत. त्यांच्यासोबत हजारो आंदोलक आहेत. मराठा उपसमितीचे अध्यक्ष राधाकृष्ण पाटील, आणि शिवसेनेचे मंत्री उदय सामंत यांच्यामध्ये बैठक होणार आहे.

मुंबईत सकाळी अकरा वाजता दोन्ही नेत्यामध्ये ही चर्चा होईल. जरांगे यांचे आंदोलन, मराठा समाजाची आरक्षणाची मागणी याबाबत या बैठकीत चर्चा होणार असल्याची माहिती आहे. बंद दाराआड चर्चा होणार नाही, असे जरांगे यांनी गणेशचर्तुथीच्या दिवशी जाहीर केले आहे.

मंत्री उदय सामंत यांच्याबरोबर मनोज जरांगे पाटील यांची भेट घेणार असल्याची चर्चा आहे, या प्रश्नावर मंत्री विखे पाटील यांनी बुधवारी माध्यमांशी बोलताना सांगितले की सामंत यांच्या भेटीबाबत प्रयोजन नाही. अशा कुठल्या भेटी संदर्भात माझं अन् मंत्री उदय सामंतांशी बोललं झालेलं नाही. पण आज पुन्हा या दोन्ही नेत्यांमध्ये चर्चा होणार असल्याची माहिती सुत्रांनी दिली.

मराठवाड्यातील आठही जिल्ह्यातील मराठा समाजातील नागरिकांनी महिनाभर पुरेल एवढे धान्य घेऊन आंदोलनात सहभागी झाले आहेत. गहु, ज्वारी, किराणा, गॅस आदी साहित्य घेऊन आंदोलक मोर्चात सहभागी झाले आहेत.मनोज जरांगे पाटील यांचा मुक्काम सध्या जुन्नरमध्ये आहे. येथे आज सभा होणार असून त्यानंतर ते मुंबईच्या दिशेने निघणार आहेत.

मनोज जरांगे पाटील यांच्या आंदोलनाला राज्यातून पाठिंबा वाढत आहे. जालन्यातून हजारो मराठा बांधव रेल्वेने मुंबईकडे रवाना झाले आहेत. उद्या (ता.29) सकाळी मुंबईच्या आझाद मैदानावर उपोषण करणार आहेत.त्या पार्श्वभूमीवर जालना जिल्ह्यातून हजारो मराठा बांधव रेल्वेने मुंबईकडे रवाना झाले आहेत.

मराठा समजाला ओबीसींतून आरक्षण घेऊन परतणार, हा त्यांचा निर्धार आहे. मराठा समाजाच्या न्यायहक्काची लढाई जरांगे यांनी अधिक तीव्र केली. हजारो आंदोलकांचे हे वादळ मुंबईत धडकणार आहे.