Maharashtra Live Update : काँग्रेस पक्ष कार्यालयात घुसत पोलिसांनी NSUIच्या कार्यकर्त्यांना केलेल्या अटकेवरून यशोमती ठाकूर यांचा संताप

नागपूर पदवीधर मतदारसंघातील समीकरणे चांगलीच बदलली आहेत. एका बाजूला काँग्रेसचे अभिजित वंजारी, दुसऱ्या बाजूला भाजपचे सुधाकर कोहळे, तर अपक्ष म्हणून नितेश कराळे आणि अनिल सोले मैदानात उतरण्याची शक्यता आहे.

शिवसेना उद्धव बाळासाहेब ठाकरे पक्षाने आपले विधान परिषद शिक्षक आणि पदवीधर मतदारसंघातून आपले उमेदवार जाहीर केले आहेत. अमरावती पदवीधरमधून ठाकरेंच्या शिवसेनेकडून दत्तात्रय लहाने यांना उमेदवारी जाहीर केली आहे. तर, छत्रपती संभाजीनगर पदवीधरमधून दिलीप घुगेंच्या नावाची घोषणा करण्यात आली आहे. घुगे हे आज आपला उमेदवारी अर्ज दाखल करणार आहेत.

आमच्या पक्ष कार्यालयात घुसून ताब्यात घेण्याचे अधिकार पोलिसांना अजिबात नाही. हे तुम्ही कशासाठी करता आहेत? याला काय म्हटलं पाहिजे हे जनता ठरवेल. आम्ही घाबरणारे नाही. आमच्या लेकरांना जर इजा झाली तर आम्ही मोठ्या प्रमाणात परत रस्त्यावर येऊ, हे लक्षात ठेवा. तुमची दादागिरी आम्ही खपवून घेणार नाही. लोकशाहीमध्ये आंदोलन करण्याचा अधिकार सर्वांना आहे आणि तो अधिकार प्रत्येक नागरिकाचा आहे. तुम्ही जर तो अधिकार हिसकावून घेणार असेल तर आम्ही आणखी मोठ्या प्रमाणात रस्त्यावर येऊ, असा इशारा काँग्रेस नेत्या यशोमती ठाकूर यांनी दिला.

सांगली जिल्ह्यातील ईश्वरपूर येथील कामेरी रस्त्यावरील एका लॉजवर नेऊन शीत पेयातून दारू पाजून महाविद्यालयात शिक्षण घेणाऱ्या वीस वर्षे विद्यार्थिनीवर दोघांनी बलात्कार केल्याची धक्कादायक घटना उघडकीस आली आहे. याप्रकरणी वाळवा तालुक्यातील दोघांना पोलिसांनी अटक केली आहे. पीडित विद्यार्थिनी पर जिल्ह्यातील असून येथे शिक्षण घेत होती. पीडित विद्यार्थ्यानीने ईश्वरपूर पोलीस ठाण्यात फिर्याद दिली आहे. या घटनेमुळे जिल्ह्यात खळबळ उडाली आहे.

वारंवार तक्रार करून प्रशासन लक्ष देत नसल्याने गाव अध्यक्ष आणि त्याच्या पत्नीने हातात कुदळ-फावडे घेत गावच्या रस्त्यावरील खड्डे बुजवले. रायगडच्या म्हसळा तालुक्यातील गायरोणे या गावात जाणाऱ्या रस्त्याची अत्यंत दयनीय अवस्था झाली आहे. रस्त्यावर पडलेल्या खड्डे आणि चिखलामुळे गावकऱ्यांना जीव मुठीत धरून प्रवास करावा लागत आहे. शाळकरी मुलांपासून ते वयोवृद्धांपर्यंत सर्वांनाच या रस्त्याचा नाहक त्रास सहन करावा लागत होता. प्रशासनाकडे वारंवार तक्रारी करूनही कोणीच दखल घेत नसल्याने अखेर गायरोणे गावचे अध्यक्ष संदीप जाधव यांनी स्वतः आणि त्यांच्या पत्नीने हातात कुदळ-फावडे घेऊन रस्त्याच्या दुरुस्तीचे काम केले. त्यांच्या या कृतीचे जोरदार कौतुक होत असून प्रशासनाच्या निष्क्रियतेचे वाभाडे काढले जात आहेत.

सांगलीच्या मिरजेतील शासकीय रुग्णालयाची कमाल कोसळल्या प्रकरणी ठेकेदार व संबंधित दोषींना वाचवण्याचा प्रयत्न केला जात असल्याचा आरोप स्वाभिमानी आंबेडकरी संघटनेचे नेते डॉ. महेशकुमार कांबळे यांनी केला आहे. प्रशासनाने यांच्यावर गुन्हे दाखल न केल्यास तीव्र आंदोलन छेडण्याचा इशारा कांबळे यांनी दिला आहे.

शिरूर तालुक्यातील पिंपरी दुमाला परिसरात मध्यरात्री चोरांनी तीन घरे फोडली. रोख रकमेसह वस्तूंची चोरी झाल्याचे समोर आले आहे. एकाच रात्री तीन ठिकाणी चोरीच्या घटना घडल्याने परिसरात खळबळ उडाली आहे. काही घरांतून रोख रक्कम, तर काही ठिकाणांहून इतर वस्तू चोरीला गेल्याची प्राथमिक माहिती आहे. आधीच दुष्काळाचा सामना करणाऱ्या शेतकरी आणि नागरिकांसमोर आता चोरीच्या घटनांचं संकट उभं राहिलं आहे. चोरांचा बंदोबस्त करण्यासाठी पोलिसांनी तातडीने तपास करावा आणि रात्रीची गस्त वाढवावी, अशी मागणी नागरिकांकडून होत आहे.

रायगड जिल्ह्यात महायुतीमध्ये अजूनही खटके उडत असून आलबेल नसल्याचे चित्र आहे. विकास कामांच्या श्रेयावरून एकनाथ शिंदे शिवसेनेचे अलिबागचे आमदार महेंद्र दळवी यांनी खासदार सुनील तटकरे यांना लक्ष्य केले होते. आपण निधी दिलेला असताना उद्घाटन तटकरेंनी केले, त्या कार्यक्रमाला सुद्धा बोलावलं नाही, असा टोला आमदार दळवींनी सुनिल तटकरे यांना लगावला. त्याला आमदार अनिकेत तटकरे यांनी जोरदार प्रत्युत्तर दिले आहे. निवडणुका आल्या की तटकरे यांच्या पायाशी येतात, निवडणूक संपली की कोण तटकरे, असे विचारू लागतात. आमची जर मतदार संघात ताकद नसेल, तर आमच्यावर टीका करण्यात वेळ घालवण्यापेक्षा लोकांच्या विकासकामांकडे लक्ष द्या, असा सल्ला अनिकेत तटकरेंनी आमदार दळवींना दिला.

विरारच्या क्रीडा संकुल आणि नाट्यगृहाच्या उद्घाटनावरून भाजप विरुद्ध बहुजन विकास आघाडी असा श्रेयवादाचा सामना रंगला आहे. उद्घाटनाच्या मुद्द्यावरून दोन्ही पक्षांचे नेते आणि कार्यकर्ते आपापसात भिडल्याने काही काळ परिसरात तणावाचे वातावरण निर्माण झाला होता. दरम्यान, भाजपचे दोन आमदार आणि जिल्ह्याचे खासदार यांनी उद्घाटनावरून क्रीडा संकुलाच्या इमारतीच्या तळमजल्यात तब्बल पाच तास ठिय्या मांडला होता. यावेळी बहुजन विकास आघाडीचे महापौर अजीव पाटील यांनी शिष्टाचाराचा भंग केल्याचा आरोप खासदारांनी केला आहे. मात्र, “आम्ही कोणत्याही शिष्टाचाराचा भंग केलेला नाही,” असे महापौर अजीव पाटील यांनी पत्रकार परिषद घेऊन स्पष्ट केले आहे.

नवी मुंबईतील वाशी येथील विष्णुदास भावे नाट्यगृहात मानव विकास ट्रस्टच्या वतीने सामाजिक बांधिलकी जपत 'प्लास्टिकमुक्त महाराष्ट्र' अभियानाचा अधिकृत प्रारंभ करण्यात आला. यावेळी मानव विकास ट्रस्टने मुख्यमंत्री सहाय्यता निधीसाठी 1 लाख 11 हजार 111 रुपयांची आर्थिक मदत नवी मुंबई महानगरपालिका आयुक्त कैलास शिंदे यांच्याकडे धनादेशाद्वारे सुपूर्द केला.

शिवसेना उद्धव बाळासाहेब ठाकरे सेना पक्षाचे सोलापुरातील उपनेते शरद कोळी यांच्यावर सोलापूर ग्रामीण पोलिसांनी स्थानबद्धतेची कारवाई केली आहे. MPDA कायद्यानुसार शरद कोळी यांच्यावर ही कारवाई करण्यात आली आहे. आठवडाभरापूर्वीच शरद कोळी यांच्यावर MPDA कायद्यानुसार कारवाईचा आदेश जारी करण्यात आला होता. कारवाईचे आदेश जाहीर झाल्यापासून शरद कोळी पसार होते. मात्र सोलापूर ग्रामीण पोलिसांच्या स्थानिक गुन्हे शाखेने कोळी यांना सांगलीतून ताब्यात घेतले.