निवडणूक आयोग आचारसंहिता शिथिल करण्यासाठी कोर्टात जाणार असल्याची माहिती समोर येत आहे. येत्या 21 डिसेंबरला मतमोजणी होऊन निकाल जाहीर केला जाणार आहे. पण कोर्टाचे निकाल लागेपर्यंत आचारसंहिता कायम ठेवण्याचे आदेश आहेत. मात्र, मतदान प्रक्रिया पार पडलेल्या ठिकाणची आचारसंहिता शिथिल करण्यासाठी आयोग न्यायालयाकडे परवानगी मागणार आहे.
उपमुख्यमंत्री एकनाथ शिंदे यांना ठाण्यात मोठा धक्का बसला आहे. शिवसेनेचे उपविभागप्रमुख रामचंद्र पिंगुळकर यांनी समर्थकांसह शिवसेना उद्धव बाळासाहेब ठाकरे पक्षात प्रवेश केला. यावेळी पक्षप्रमुख उद्धव ठाकरे यांनी त्यांचं स्वागत केलं. ह्यावेळी शिवसेना नेते राजन विचारे, उपनेत्या किशोरी पेडणेकर, जिल्हाप्रमुख केदार दिघे तसेच इतर पदाधिकारी आणि शिवसैनिक उपस्थित होते.
रायगडमधील महाड नगरपरिषद निवडणुकीच्या मतदानावेळी झालेल्या राड्यानंतर मंत्री भरत गोगावले यांनी राष्ट्रवादी काँग्रेसचे प्रदेशाध्यक्ष सुनील तटकरेंवर गंभीर आरोप केला आहे. ते म्हणाले, विकास गोगावले आणि आमच्या कार्यकर्त्यांवर हल्ला करणारे गुंड हे सुनील तटकरे यांनीच पाठवले होते. जे आम्हाला गुंड म्हणतात, तेच स्वतः गुंड पाठवून षडयंत्र रचत आहेत. पण आमच्या कार्यकर्त्यांनी त्यांना जशास तसं उत्तर दिल्याचंही गोगावले म्हणाले.
सिंधुदुर्ग जिल्ह्यातील तीन नगरपरिषद आणि एका नगरपंचायतीसाठी मतदान प्रक्रिया पार पडली असून जिल्ह्यात सुमारे 74.25 टक्के एवढे मतदान झाले आहे. दरम्यान राज्य निवडणूक आयोगाच्या सुधारीत निवडणूक कार्यक्रमानुसार उद्या बुधवार (ता. 3) जाहीर होणारे निकाल मात्र आता ते 21 डिसेंबरला जाहीर होणार आहेत. कणकवली नगरपंचायतीसाठी विक्रमी असे 79 .71 टक्के एवढे मतदान झाले असून सावंतवाडी नगर परिषदेसाठी 69 टक्के वेंगुर्ले नगर परिषदेसाठी 74.28 टक्के आणि मालवण नगर परिषदेसाठी 74.4 टक्के एवढे मतदान झाले आहे.
पंढरपूर जिल्ह्यातील अकलूज नगरपालिका निवडणुकीमध्ये प्रभाग क्रमांक सातमध्ये भाजपच्या उमेदावारच्या पतीने बॅलेट युनीटवर आपला राग काढला आहे. मतदान प्रक्रिया सुरू असताना. बटन दाबले जात नाही. या कारणाने अंबादास पाटोळे या भाजप महिला उमेदवाराच्या पतीने बॅलेट युनिट उचलून फेकल्याची घटना घडली आहे. या घटनेनंतर अकलूजमध्ये प्रभाग क्रमांक सात व परिसरात काही काळ तणावपूर्ण वातावरण होते. यानंतर प्रभाग क्रमांक सातमधील क्रांतीसिंह माने पाटील या उमेदवाराने बॅलेट युनिट मशीनची तपासणी करून एक तास वाढीव मतदानाला वेळ द्यावा अशी मागणी केली आहे.
सांगली जिल्ह्यातल्या आठ नगरपरिषद व नगरपंचायतीसाठी सुरू असलेली मतदान प्रक्रिया साडेपाचनंतर देखील सुरूच आहे. अत्यंत चुरशीने ठीक ठिकाणी मतदान पार पडले असून सायंकाळ ५.३० वाजेनंतरही मतदान केंद्रांबाहेर मतदारांच्या रांगा लागल्या होत्या. त्यामुळे वेळ संपल्यानंतर अनेक ठिकाणी मतदान केंद्राच्या आत मतदार असल्याने उशिरापर्यंत मतदान प्रक्रिया सुरू ठेवण्यात आली. जिल्ह्यातील तासगाव, जत, पलूस आणि ईश्वरपूर या ठिकाणी घडलेले वादावादीचे प्रकार वगळता इतर ठिकाणी शांततेमध्ये मतदान प्रक्रिया पार पडली. या निवडणुकीमध्ये जवळपास 75% पर्यंत सरासरी मतदानाची नोंद होईल,अशी शक्यता व्यक्त केली जात आहे.
निवडणूक आयोगाची यंत्रणा पूर्णपणे पारदर्शक झाली. दोन दिवसांपूर्वीच काही नगरपरिषदांच्या निवडणुका पुढे ढकलल्या जातात तर आज मतदान चालू असताना निवडणुकीचा निकाल पुढे ढकलला जातो. मात्र, एवढे दिवस असताना या गोष्टी तुम्ही आधी करायला पाहिजे होत्या. आता यामुळे लोकांमध्ये संभ्रम निर्माण होतोय. वोट चोरी, मतदान यंत्रे सुरक्षित नाहीत. यामुळे लोकांमध्ये संभ्रम निर्माण होत आहे. आम्ही या सर्व गोष्टी बाजूला ठेवून त्या मतपेट्या राखणार आहोत.
भंडारा शहरासह तुमसर पवनी आणि साकोली येथे मतदान प्रक्रिया पार पडत आहे. भंडारा शहरातील प्रभाग क्रमांक 3 च्या महिला समाज महाविद्यालयांमध्ये मतदान प्रक्रिया साडेपाच वाजता बंद करण्याच्या वेळेवर आता मतदारांच्या प्रचंड रांगा बघायला मिळत आहे. या एका शाळेमध्ये तीन मतदान केंद्र आहे आणि तिन्ही ठिकाणी मोठ्या प्रमाणात महिला आणि पुरुष सोबतच तरुणही मतदानासाठी पोहोचले असून ही संपूर्ण मतदान प्रक्रिया राबविण्यासाठी आता प्रशासनाची चांगलीच तारांबळ उडणार आहे.
बोगस मतदान कुठं झालं आहे. मतदारयादीत नाव असेल तर बोगस मतदान कुठं होईल. यादीत नाव असेल तर त्यांना मतदान करण्याचा अधिकार आहे ना. मुक्ताईनगरमध्ये एकनाथ खडसे आणि रोहिणी खडसेंचा संबंध नाही. इथे भाजपचा उमेदवार आहे. लोकांना भ्रमांत काढून स्वतःचा फायदा करून घेण्याचा प्रयत्न केला जात आहे. निवडणूक अधिकाऱ्यांनी ही चुकीचं आहे, असं सांगितल तर आम्ही मान्य करू. पण आम्ही तानाशाही चालू देणार नाही. शिवसेना आमदारांची आमदार चंद्रकांत पाटलांचे लोक इथ मत टाका, हे बटण दाबा असं सांगत आहेत. चुकीचं होत असेल तर ते थांबवणं माझं काम आहे, असेही रक्षा खडसे यांनी सांगितले.
सांगली जिल्ह्यातील तासगाव येथे आमदार रोहित पाटील आणि माजी खासदार संजयकाका पाटील गट आमने सामने आले होते. मात्र पोलिसांनी वेळीच हस्तक्षेप केल्याने हा वाद टळला. तासगाव पोलिसांनी दोन्ही गटाला मतदान केंद्रापासून दूर नेले.
परभणी जिल्ह्यातील जिंतूरमधील मतदान केंद्रावरील अधिकारी हे मतदान केंद्राचा दरवाजा बंद करून आतमध्ये जेवायला बसले होते. विशेष म्हणजे बाहेर मतदारांच्या रांगा लागलेल्या होत्या, त्यावेळीच हे अधिकारी दरवाजा बंद करून आतमध्ये जेवायला बसले होते. पण मतदारांनी गोंधळ केल्याने पुन्हा मतदान प्रक्रियेला सुरुवात करण्यात आली आहे.
तुळजापूर नगरपरिषदेसाठी मतदानास आलेल्या महिलेचा मृत्यू झाला आहे. संबंधित महिला मतदानासाठी केंद्रावर आली होती. मतदान करून ते परत जात असताना तिला चक्कर आली. तिला तातडीने रुग्णायात दाखल करण्यात आले. पण उपचारादरम्यान त्या महिलेचा मृत्यू झाला आहे.
नगरपरिषद निवडणुकीच्या मतमोजणीची तारीख पुढे ढकलण्याची याचिका भाजपचे वर्धा येथील नगरसेवक पदाचे उमेदवार प्रदीपसिंह ठाकूर यांनी मुंबई उच्च न्यायालयाच्या नागपूर खंडपीठात दाखल केली होती. जे कोणी तीन तारखेला निवडून येतील आणि माझा प्रभागातील निवडणूक वीस तारखेला होणार होती. त्यावर प्रभाव पडू नये म्हणून आम्ही ही मतमोजणी पुढे ढकलण्यात यावी, अशी याचिका दाखल केली होती. त्यावर तीन तारखेला होणारी मतमोजणी आता २१ जानेवारी होणार आहे, असे याचिकाकर्ते प्रदीपसिंह ठाकूर यांनी सांगितले.
शिवसेनेचे आमदार संतोष बांगर यांनी मतदान करताना ते मोबाईल शूट केले. तसेच, महिला मतदारांना कुठे मतदान करायचं हेही सांगितले होते. त्याची दखल निवडणूक आयोगाने घेतली आहे. आमदार बांगर यांनी केलेल्या कृत्याची चौकशी करण्याचे आदेश आयोगाने दिले आहेत. ज्या ठिकाणी संतोष बांगर यांनी मतदारांना मतदान कोठे करायचे हे सांगितले, तेथील निवडणूक निर्णय अधिकाऱ्याची बदली होण्याची शक्यता वर्तविण्यात येत आहे.
नाशिकचा पालकमंत्री मीच आहे, असे समजा, असे विधान उपमुख्यमंत्री अजित पवार यांनी नाशिकमध्ये बोलताना केले होते. त्यावर भाजपचे ज्येष्ठ नेते आणि माजी केंद्रीय मंत्री रावसाहेब दानवे पाटील यांनी उत्तर दिले आहे. या राज्याचा खरा पालकमंत्री देवेंद्र फडणवीस आहेत, त्यानंतर कोण म्हणत असेल की मी पालकमंत्री आहेत, तर त्यात काही चूक नाही. कारण तेही मंत्री आहेत, असे दानवे म्हणाले.
मतदानाचा हक्क बजावण्यासाठी चक्क सात समुद्र पार करत एक युवक सांगलीच्या शिराळामध्ये दाखल झाला. मतदान हे श्रेष्ठ दान असल्याचं सांगत मतदानाचा हक्क बजावला आहे. अन्सार कासिम मुल्ला असे या युवक मतदाराचे नाव असून, तो ऑस्ट्रेलियातील मेलबॉर्न मध्ये नोकरी करतो. मतदानासाठी आपला मित्र आल्याचे कळताच त्याच्या मित्रांनी फटाक्यांचं आतिषबाजी करत स्वागत केले, त्यानंतर अन्सारने मतदानाचा हक्क बजावला. यानिमित्ताने शिराळा तहसीलदार शामला खोत यांनी त्यांचा सत्कार केला.
परभणीच्या सोनपेठ नगरपरिषदेमध्ये अजित पवार राष्ट्रवादी काँग्रेसविरुद्ध भाजप-शिवसेना आणि इतर पक्षांची सोनपेठ शहर परिवर्तन विकास आघाडी यांच्यात निवडणूक होत आहे. याच दरम्यान राष्ट्रवादीचे आमदार राजेश विटेकर आणि परिवर्तन विकास आघाडीचे माजी आमदार वेंकटराव कदम यांच्यात बाचाबाची झाली. यामुळे तणाव निर्माण झाला होता. पोलिसांनी मध्यस्थी करून हा वाद थांबवला. त्यामुळे सोनपेठ मध्ये तणावपूर्ण शांतता पाहायला मिळत आहे.
बीड शहरातील शाहूनगर भागातील दोन गट आमने-सामने येत दगडफेक केली. वादानंतर आमदार संदीप क्षीरसागर यांची मतदार केंद्रावर भेट दोन्ही गटाच्या कार्यकर्त्यांना शांततेचे आवाहन केलं. जमावाला पांगव्यासाठी यावेळी पोलिसांकडून सौम्य लाठीमार करण्यात आला. अजित पवारांची राष्ट्रवादी काँग्रेस आणि राष्ट्रवादी काँग्रेस पार्टी शरदचंद्र पवार पक्षाच्या कार्यकर्त्यांमध्ये हा मोठा राडा झाला आहे.
मतदानाचा टक्का वाढावा यासाठी निवडणूक आयोग प्रयत्नशील असतानाच, बदलापुरातून अमेरिकेत नोकरीसाठी गेलेल्या एका युवकानं खास मतदानासाठी हजेरी लावली. अमेय सोमवंशी, असं या युवकाचं नाव आहे. गेल्या आठ वर्षांपासून तो अमेरिकेतील कॅलिफोर्नियात वास्तव्याला आहे. बदलापूर नगरपालिकेची निवडणूक असल्यामुळे अमेय इथं आला आणि त्याने मतदानाचा हक्क बजावला. लोकशाहीत मतदानाला खूप महत्त्व आहे. त्यामुळेच आपण मतदानासाठी भारतात आल्याचं अमेय यानं सांगितलंय.
एकनाथ शिंदे यांच्या शिवसेनेचे हिंगोलीमधील आमदार संतोष बांगर यांच्यावर गुन्हा दाखल करण्यात आला आहे. आदर्श आचारसंहितेचा भंग केल्याप्रकरणी हा गुन्हा दाखल झाला आहे. मतदान केंद्र अध्यक्ष दिलीप चव्हाण यांनी फिर्याद दिली आहे.
'वातावरण जरी आल्हाददायक दिसत असलं, तरी रडीचा डाव खेळल्यासारखा सत्ताधारी पक्ष करत आहे. मोठ्या प्रमाणावर बोगस मतदान होत आहे. गाव खेड्यातून गाड्या भरभरून आणल्या जात आहे. एकनाथ शिंदे यांच्या शिवसेनेचे लोक अतिशय दादागिरी करत आहेत, तर थेट आमदाराच्या घरातील लोक पोलिसांना लोटपाठ करण्याच्या ही घटना घडत आहे,' असा घणाघात काँग्रेस प्रदेशाध्यक्ष हर्षवर्धन सपकाळ यांनी केला.
बुलढाणा इथं नगरपालिकांसाठी होत असलेल्या मतदानावेळी, मुस्लिम बहुल भागातील मतदान केंद्रावर बोगस मतदान होत असल्याची माहिती काँग्रेसच्या पदाधिकाऱ्यांनी मिळाली. त्यानुसार काँग्रेसच्या पदाधिकाऱ्यांनी बोगस मतदान करणाऱ्यांना पकडत चोप दिला. यावेळी मतदान केंद्रावर गोंधळ उडाल्याने पोलिसांना जमावला पंगवण्यासाठी पोलिसांनी सौम्य बळाचा वापर केला.
स्थानिक स्वराज्य संस्था निवडणुकीत अहिल्यानगर जिल्ह्यातील नगरपालिकांसाठी दुपारी दीडवाजेपर्यंत झालेल्या मतदानाची आकडेवारी समोर आली आहे. जिल्ह्यात सरासरी 35.58 टक्के मतदान. सर्वाधिक जामखेड येथे 43.38 टक्के. सर्वांत कमी शिर्डीत 31.22 टक्के. श्रीरामपूर 34.30, संगमनेर 36.33, राहुरी 34.74, राहाता 40.30, श्रीगोंदा 31.37, शेवगाव 35.70.
जळगावच्या जामनेरमध्ये राष्ट्रवादी काँग्रेस पार्टी शरदचंद्र पवार पक्षाच्या कार्यकर्त्यांनी बोगस मतदाराला पकडले. प्रभाग क्रमांक दहा मधील एकलव्य शाळेतील मतदान केंद्रावर बोगस मतदार युवक सापडला. बोगस मतदाराला पकडल्यानंतर कार्यकर्त्यांनी त्याला पोलिसांच्या स्वाधीन करत कारवाईची मागणी केली आहे. पोलिसांनी या युवकाविरोधात कारवाईसाठी पोलिस ठाण्यात नेलं आहे.
महाडमध्ये निवडणुकीच्या दरम्यान दोन राजकीय गटांमध्ये जोरदार राडा झाल्याची घटना समोर आली आहे. एका गटाच्या समर्थकांनी दुसऱ्या गटाच्या पदाधिकाऱ्याला मारहाण केल्याचा आणि वाहनांची तोडफोड केल्याचा आरोप करण्यात आला आहे. यावेळी रिव्हॉल्व्हरचा वापर झाल्याचा आणि जीवे मारण्याचा प्रयत्न केल्याचा गंभीर दावाही करण्यात आला आहे. पोलिसांनी काही कार्यकर्त्यांना ताब्यात घेतले असून परिसरात तणावाचे वातावरण आहे. या घटनेची सखोल चौकशी करण्याची मागणी करण्यात येत आहे.
मराठा आणि ओबीसी आरक्षणाच्या मुद्द्यावरून महाराष्ट्रात सामाजिक तणाव निर्माण झाल्याच्या पार्श्वभूमीवर मुख्यमंत्री देवेंद्र फडणवीस यांनी आपली भूमिका स्पष्ट केली आहे. 'मला जाणीवपूर्वक व्हिलन ठरवण्याचा प्रयत्न केला जातोय, पण जात ही जनतेच्या मनात नसून केवळ नेत्यांच्या मनात असते,' असा टोला त्यांनी विरोधकांना लगावला आहे.
शिंदे मालवणात आले येताना बॅगेतून काय आणले? मालवणात भाजपाच्या थैल्याना बॅगेने उत्तर! या आधी नाशिक मध्ये ही बॅगा उतरल्याच होत्या लोकशाही ची ऐशी की तैशी? जय महाराष्ट्र! अशी एक्स पोस्ट एका व्हिडीओसहित संजय राऊत यांनी केली आहे.
येवला नगरपालिका सार्वत्रिक निवडणुकीत आज मतदान प्रक्रिया पार पडत असून राष्ट्रवादी कॉंग्रेस पार्टीचे स्टार प्रचारक माजी खासदार समीर भुजबळ, आमदार पंकज भुजबळ यांनी कुटुंबीयांसमवेत मतदानाचा हक्क बजावला.
नगरपालिका, नगरपालिका निवडणुकीची मतमोजणी पुढे ढकलण्यात आल्याने मुख्यमंत्री देवेंद्र फडणवीस यांनी नाराजी व्यक्त केली आहे. निवडणूक आयोगाने कोर्टाच्या आदेशाचा चुकीचा अर्थ काढला आहे, असे फडणवीस यांनी म्हटले आहे.
इंदापूर नगरपरिषदेसाठी पहिल्या दोन तासात टक्के मतदान 9.80 टक्के मतदान झाले. नगराध्यक्ष पदाचे उमेदवार प्रदीप गारटकर आणि भरत शहा यांनी बजावला मतदानाचा हक्क इंदापूर नगरपालिका निवडणुकीसाठी शहरातील 27 मतदान केंद्रांवर पहिल्या दोन तासांत 9.80 टक्के मतदान झाले. मतदान केंद्रापासून निर्धारित केलेल्या अंतरावर प्रमुख पक्ष व उमेदवारांनी नाव आणि मतदान केंद्र शोधण्यासाठी मतदारांना मतदार यादी तसेच मोबाइल अॅप्लिकेशनच्या माध्यमातून साह्य केले.
नगरपरिषद आणि नगरपालिका निवडणुकीची मतमोजणी पुढे ढकलण्यात आली आहे. ही मोजणी आता 21 डिसेंबर रोजी होणार आहे. यापूर्वी आयोगाने उद्या (2 डिसेंबर रोजी मतदान होणार असल्याचे जाहीर केले होते.
बदलापूरमध्ये भाजपा-शिवसेनेचे कार्यकर्ते आपसात भिडले आहेत. बदलापूर पश्चिम गांधी नगर टेकडी एसटी बसस्टँड जवळ भाजपा-शिवसेना कार्यकर्त्यांमध्ये तुफान राडा झाला आहे. परिसरात तणावाचे वातावरण असून पोलिसांचा मोठा फौजफाटा तैनात आहे. बस स्टँड परिसरात मतदारांना स्लिप वाटणे, त्याचबरोबर बुथ लावण्यावरून राडा झाला. या प्रकरणी दोन जणांना पोलिसांनी ताब्यात घेतले आहे.
गडहिंग्लज नगरपालिकेमध्ये बोगस मतदार आढळला आहे. प्रभाग क्रमांक चार मधील शिवराज शाळेच्या मतदान केंद्रावर हा प्रकार घडला. उमेदवाराच्या प्रतिनिधीकडून त्याला ताब्यात घेऊन पोलिसांकडे स्वाधीन केले आहे. गुजर वसाहतीमधील प्रकार पोलिंग एजंटने हा प्रकार उघडकीस आणला आहे.
अक्कलकोटमध्ये मतदार आणि पोलिसांमध्ये शाब्दिक वाद झाला आहे. अक्कलकोट मधील श्रीमंत राणी नित्मालाराजे कन्या प्रशालेत हा वाद झाला. एका महिलेला पोलिसांनी मतदान केंद्रावरून बाहेर काढल्याने हा वाद झाल्याची प्राथमिक माहिती आहे.
नगरपालिका, नगरपंचायतसाठी कोल्हापूर जिल्ह्यात सकाळी नऊ वाजेपर्यंत 11.47 टक्के मतदान पार पडलं आहे.
शिंदेंच्या शिवसेनेचे आमदार संतोष बांगर यांचा मतदान केंद्रायतील एक व्हिडिओ व्हायरल होत आहे. या व्हिडिओ प्रकरणाचा अहवाल निवडणूक अधिकाऱ्यांनी मागवला असून यामध्ये गोपनीयतेचा भंग झाला असेल तर कार्यवाही होणार असल्याची अशी माहिती निवडणूक अधिकाऱ्यांनी दिली आहे.
कागल नगर परिषद निवडणूक मतदान प्रक्रिये दरम्यान तृतीयपंथीय आणि पोलिसांमध्ये वाद झाला आहे. कागल येथील प्रभात क्रमांक पाच मतदान केंद्रावर काही उमेदवार आणि त्यांचे कार्यकर्ते पक्षाचा पक्षाचे चिन्ह घेऊन थेट मतदान केंद्रात येत असल्याचा आरोप केला जात आहे. याच मतदान केंद्रावरील बॅलेट युनिट अचानक बदलण्याचा तृतीयपंथीयांनी आरोप केला आहे.
कागल नगरपालिका निवडणुकी दरम्यान एक धक्कादायक प्रकार समोर आला आहे. मतदान केंद्राबाहेर मंतरलेली लिंबू टाकले आहेत. कागलमधील संत रोहिदास विद्यामंदिर मतदान केंद्राच्या बाहेर हा अनोखा प्रकार घडला आहे. त्यामुळे मतदारांमध्ये भीतीच वातावरण निर्माण झालं आहे.
साताऱ्यातील आझाद कॉलेज येथील मतदान केंद्रावरील ईव्हीएम मशीनमध्ये बिघाड झाल्याचं समोर आलं आहे. तांत्रिक अडचणीमुळे प्रभाग क्रमांक 16 मधील दोन नंबर बूख मधील ईव्हीएम बंद झालं आहे
'आपल्यातला एक गद्दार गेला त्याचा डायलॉग फेमस झाला होता काय झाडी काय डोंगर, आता त्याला जाऊन विचारा कारण त्याच्यावर ईडीची धाड पडली आहे. आता म्हण काय धाडी, काय पोलीस आणि जा तुरुंगात', अशा शब्दात शिवसेना उद्धव बाळासाहेब ठाकरे पक्षाचे सर्वेसर्वा उद्धव ठाकरे यांनी शिंदेंच्या शिवसेनेचे माजी आमदार शहाजीबापू पाटील यांच्यावर निशाणा साधला.
मालवण नगरपरिषद निवडणुकीच्या मतदानाच्या आदल्या रात्री नाकाबंदीत एक कार सापडली. या कारमध्ये दीड लाखांची रोकड सापडली असून ही कार भाजप (BJP) स्थानिक पदाधिकाऱ्याची असल्याचं समोर आलं आहे. त्यानंतर शिंदेंच्या शिवसेनेचे आमदार आमदार निलेश राणे आणि त्यांच्या कार्यकर्त्यांनी भाजपकडून पैसे वाटप सुरु असल्याचा आरोप केला. तर राणे यांनी थेट मालवण पोलीस ठाण्यात दाखल होत गुन्हा दाखल होत नाही तोपर्यंत पोलीस ठाण्यातून मागे हटणार नाही, अशी भूमिका घेतली.
पुणे जिल्ह्यातील 12 नगरपरिषदा व 3 नगरपंचायत, अध्यक्षपदाकरिता 76 उमेदवार आणि सदस्य पदाकरिता 955 उमेदवार निवडणुकीच्या रिंगणात आहेत. या सर्व उमेदवारांचे भवितव्य आज मतपेटीत कैद होणार आहे. पुणे जिल्ह्यातील 12 नगरपरिषदा व 3 नगरपंचायती मिळून एकूण 524 मतदान केंद्रे असणार आहेत.
सकाळी साडेसात वाजल्यापासून कोल्हापूर जिल्ह्यातील 10 नगरपालिका आणि 3 नगरपंचायतीच्या मतदान प्रक्रियेला सुरुवात झाली आहे. जिल्ह्यातील 317 मतदान केंद्रावर मतदान प्रक्रिया पार पडणार आहे. जयसिंगपूर, कागल नगरपालिका आणि चंदगड नगरपंचायतीमध्ये हाय व्होल्टेज लढत पाहायला मिळणार आहे. जिल्ह्यातील 13 नगरपालिका नगरपंचायतीसाठी 56 नगराध्यक्ष पदाचे उमेदवार आहेत. तर 263 नगरसेवक पदासाठी 809 उमेदवार निवडणुकीच्या रिंगणात आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.