Political News Live Updates : मुंबई क्रिकेट असोसिएशनच्या उपाध्यक्षपदी जितेंद्र आव्हाड यांची निवड

मुंबई क्रिकेट असोसिएशनच्या निवडणुकीत अध्यक्षपदी अजिंक्य नाईक बिनविरोध निवड झाली. यानंतर एमसीएच्या उपाध्यक्षपदी जितेंद्र आव्हाड यांची निवड करण्यात आली आहे. नवीन शेट्टी यांचा या निवडणुकीत 48 मतांनी पराभव झाला आहे. तसेच सचिव पदावर उन्मेष खानविलकर यांचा विजय झाला आहे.

मुंबई महापालिका निवडणूक महायुती म्हणून एकत्र लढवण्याचे संकेत दिले जात आहेत. महायुतीत सध्या भाजप सर्वात मोठा पक्ष आहे. बीएमसीच्या 227 जागांपैकी भाजप सर्वाधिक जागा मागण्याची शक्यता आहे. त्यात अजित पवारांची राष्ट्रवादी काँग्रेस अजून नाही,पण एकनाथ शिंदे यांची शिवसेना मुंबईत 125 जागांची मागणी करण्याची शक्यता वर्तवली जात आहे. शिंदेंच्या शिवसेनेकडून 2012 व 2017 अशा दोन पंचवार्षिक मिळून 125 नगरसेवक सोबत असल्याचा दावा करण्यात आला आहे.

मंत्री अदिती तटकरे यांनी मुख्यमंत्री लाडकी बहीण योजनेबाबत महत्त्वाची अपडेट दिली आहे. लाडकी बहीण योजनेच्या वेबसाईटमध्ये काही बदल होत असल्यामुळे ई केवायसीसाठी वेळ लागत असल्याचं त्या म्हणाल्या. ज्या महिलेचा पती आणि वडील नाही अशा महिलांसाठी वेबसाईटवर बदल केले जाणार आहेत. ही प्रक्रिया लवकरच पूर्ण होईल असंही तटकरे यांनी सांगितलं.

दिल्लीच्या लाल किल्ला परिसरात झालेल्या कार स्फोट तपासात मोठी माहिती समोर आली आहे. पोलिसांनी अटकेत असलेल्या फरीदाबादमधील फतेहपूर तगा या गावातील डॉ.मुजम्मिल शकीलच्या भाड्याच्या घरातून तब्बल 2,563 किलो अमोनियम नायट्रेट जप्त केले आहे. दिल्ली स्फोट प्रकरणाचा संपूर्ण तपास NIA ने आपल्या हाती घेतल्यानंतर ही मोठी कारवाई करण्यात आली आहे.

शिवसेना पक्ष व चिन्ह प्रकारणांची पुढील सुनावणी सुप्रीम कोर्टात २१ जानेवारीला सकाळी ११.३० वाजता होणार आहे. सुप्रीम कोर्टात शिवसेना, राष्ट्रवादी काँग्रेसच्या याचिकांवर युक्तिवाद होणार आहे.

नांदेडच्या 13 नगरपालिकांसाठी नवी राजकीय समीकरण जुळले आहे. जागा वाटपाचा फॉर्म्युला एक दिवसात जाहीर करण्यात येणार आहे, असे काँग्रेस खासदार रविंद्र चव्हाण यांनी सांगितले.

छत्रपती संभाजीनगर–पुणे नव्या महामार्गाचा नकाशा अधिकृत घोषणेपूर्वीच लीक झाल्याने खळबळ उडाली आहे. हा नकाशा काही दलाल आणि व्यावसायिकांच्या हाती लागून त्यांनी जमिनींची खरेदी सुरू केली आहे. शेतकऱ्यांना माहिती नसल्याने ते कमी दरात जमीन विकत आहेत. त्यामुळे आता या प्रकरणात चौकशीची मागणी होत आहे.

पुणे रेल्वे स्टेशनवरील बंद सीसीटीव्ही आणि सुरक्षेतील त्रुटींवरून मंत्री नितेश राणे यांनी ठाकरे सरकारच्या अधिकाऱ्यांवर टीका केली. त्यांनी सुरक्षा कर्मचाऱ्यांच्या निष्काळजीपणावर नाराजी व्यक्त करत स्टेशनवरील सुरक्षेची ढिलाई धोकादायक असल्याचे सांगितले. हजारो प्रवासी येत असताना सुरक्षेचा अभाव असल्याचा आरोपही केला.

पुणे-पिंपरी चिंचवडकरांसाठी आनंदाची बातमी आहे. पंतप्रधान नरेंद्र मोदी यांच्या नेतृत्वातील केंद्र सरकारने पीएम-ई ड्राईव्ह योजनेअंतर्गत पुणे महानगर परिवहन महामंडळाला (पीएमपीएमएल) तब्बल 1000 नव्या इलेक्ट्रिक बस खरेदीस मंजुरी दिली आहे. केंद्रीय अवजड उद्योग मंत्री एच. डी. कुमारस्वामी यांनी या प्रस्तावावर अंतिम शिक्कामोर्तब केले असून, लवकरच या बस पीएमपीएमएलच्या ताफ्यात दाखल होणार आहेत.

ठाकरे सेनेचे नेते माजी खासदार उन्मेष पाटील यांच्यासह चार जणांविरुद्ध फसवणुकीचा गुन्हा दाखल झाला आहे. देवगिरी नागरी सहकारी बँकेची ५.३३ कोटींची फसवणूक केल्याचा आरोप त्यांच्यावर आहे. उमंग व्हाईट गोल्ड प्रा. लि. कंपनीच्या कर्जावरून हा गुन्हा दाखल करण्यात आला आहे.

- डॉ. मुझम्मिल आणि डॉ. उमर यांनी लाल किल्ल्याची रेकी केली.

- जानेवारीच्या पहिल्या आठवड्यात लाल किल्ल्याची रेकी केली.

- २६ जानेवारी रोजी लाल किल्ल्याला लक्ष्य करणे हा त्याच्या नियोजनाचा एक भाग होता.

- दिवाळीत गर्दीच्या ठिकाणी घातपात करण्याचा कट होता.

- डॉ. मुझम्मिलच्या फोनच्या डंप डेटावरून मिळाली माहिती.

तुळजापूरातील ड्रग्स प्रकरणातील आरोपींना भाजपात प्रवेश देण्यावरून खासदार सुप्रिया सुळे यांनी मुख्यमंत्री देवेंद्र फडणवीस यांना पत्र लिहिले आहे. तुळजापूरातील या पक्षप्रवेशासंबंधात तातडीने कारवाई करण्याची मागणी पत्राद्वारे केली आहे. काल अनेक जणांनी भाजपमध्ये प्रवेश केला. यात शहरातील ड्रग्स तस्करी प्रकरणातील आरोपींचा समावेश असल्याकडे सुळे यांनी मुख्यमंत्र्‍यांचं लक्ष वेधलं आहे. हे पक्षप्रवेश जबाबदार नेत्यांच्या उपस्थितीत झाले, याचे आश्चर्य वाटले. ड्रग्स तस्करीला राजाश्रय मिळतोय, असे सुळे यांनी पत्रात म्हटलं आहे.

महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांच्या अध्यक्षतेखाली काँग्रेस पक्षाच्या राज्य निवडणूक मंडळाची महत्वाची बैठक आज दादर येथे आयोजित करण्यात आली आहे. या बैठकीला विधिमंडळ काँग्रेस पक्षाचे नेते विजय वडेट्टीवार, विधान परिषदेतील काँग्रेस पक्षाचे नेते सतेज ऊर्फ बंटी पाटील, ज्येष्ठ नेते, काँग्रेस वर्किंग कमिटीचे सदस्य बाळासाहेब थोरात, माजी मंत्री अमित देशमुख, विश्वजित कदम यांच्यासह निवड मंडळाचे सदस्य उपस्थित राहणार आहेत.

पुण्यातील जमीन व्यवहारप्रकरणी पार्थ पवार यांना माहिती होती, असे सामाजिक कार्यकर्त्या अंजली दमानिया यांनी पत्रकार परिषद सांगितले. यावरुन अजित पवार यांनी राजीनामा दिला पाहिजे, अशी मागणी दमानिया यांनी केली आहे.

मनोज जरांगे यांच्या घातपाताचा कट रचल्याच्या प्रकरणी कांचन साळवी नावाच्या आरोपीला अटक केली आहे. दादा गरड आणि अमोल खुणे यांच्याशी कांचन नावाच्या व्यक्तीचा सबंध असल्याचा आणि तो धनंजय मुंडेंचा PA असल्याचा आरोप मराठा आंदोलक मनोज जरांगे पाटील यांनी केला होता. त्यानंतर आता कांचन साळवीला जालना पोलिसांनी अटक केली आहे.

सांगलीत दलित महासंघाचे सांगली जिल्हाध्यक्ष उत्तम मोहिते यांची त्यांच्या वाढदिवशीच हत्या केल्याची धक्कादायक घटना घडली आहे. हत्या करण्यासाठी आलेल्या शाऱ्या उर्फ शाब्या शाहरुख शेख याच्यावरही जमावाने हल्ला केल्याने त्याचाही मृत्यू झाला आहे.

लोकसभा निवडणुकीत महाविकास आघाडीला चांगले यश मिळाले. पण, विधानसभेला गडबड झाली, ‘दाल में कुछ काला है, असाच विधानसभेचा निकाल लागल्याचा आरोप काँग्रेस आमदार विश्वजित कदम यांनी केला आहे.

राष्ट्रवादीच्या प्रवक्तेपदावरून हटवल्यानंतर रूपाली ठोंबरे पाटील आज अजित पवारांच्या भेटीसाठी आल्या होत्या. मात्र, पक्ष कार्यालयात अजित पवार आले नसल्याने त्यांनी आता भेट न झाल्याची माहिती समोर आली आहे.

शिवसेना पक्ष आणि चिन्ह प्रकरणी आजपासून सर्वोच्च न्यायालयात अंतिम सुनावणीला सुरुवात होणार आहे. 2022 मध्ये केंद्रीय निवडणूक आयोगाने एकनाथ शिंदे गटाला मूळ पक्ष आणि चिन्ह देण्याच्या निर्णयाला ठाकरे गटाने आव्हान दिले आहे. त्यानंतर शिवसेना पक्ष आणि निवडणूक धनुष्यबाण चिन्ह कोणाचं? या तीन वर्षांपासून प्रलंबित असलेल्या मुद्द्यावर सुनावणी होणार आहे.