Maharashtra Political Updates : दिवसभरात काय राजकीय घडामोडी घडल्या? जाणून घ्या एका क्लिकवर

Shivsena-BJP News : छत्रपती संभाजीनगर महापालिका निवडणुकीसाठी शिवसेना-भाजप युतीची चर्चा सुरू झाली आहे. पहिल्या फेरीतच गरमा गरमी सुरू असून शिवसेनेने दहा वर्षापूर्वीच्या फाॅर्म्युला आणि त्यानुसार जागा वाटपाची मागणी केली आहे. यावर भाजपचे मंत्री अतुल सावे यांनी आता परिस्थिती बदलली आहे, दहा वर्षापूर्वीचा फाॅर्म्युला आता चालणार नाही. फिप्टी फिप्टीवरच चर्चा होऊ शकते, अशा शब्दात शिवसेनेला ठणकावले आहे, अन्यथा आम्ही निर्णय पक्षश्रेष्ठींवर सोडू, असा इशाराही सावे यांनी दिला आहे.

माणिकराव कोकाटे यांच्या अटकेचं वॉरंट घेऊन निघालेली नाशिक पोलिसांची टीम मुंबईच्या वेशीवर पोहोचली आहे. नाशिक पोलिसांची टीम आता ठाण्यात पोहचली असून थोड्याच वेळात लीलावती रुग्णालयात पोहोचणार आहे.

बीडच्या गेवराई येथील कॉलेज रोडवरील घटनेने बीड जिल्हा हादरला होता. याच घटनेतील अपहरण झालेल्या मुलीला सोडवण्यास गेवराई पोलिसांना यश आले आहे. गेवराई पोलीस ठाण्याचे पोलीस निरीक्षक किशोर पवार यांनी अपहरण कर्त्याच्या मागावर राहत मुलीला सुखरूप सोडवले आहे. तर मुलीला सोडून 03 आरोपी फरार झाले असून त्यांचा शोध घेण्याचे आव्हान आता पोलिसांपुढे असल्याचं पाहायला मिळत आहे.

तुळजापूर येथील दोन गटाचा राडा आणि त्यानंतर झालेल्या गोळीबार प्रकरणात भाजप आमदाराच्या पीएच नाव जोडलं जात आहे.आमदार राणाजगजितसिंह पाटील यांचे स्वीय सहाय्यक जयश कदम यांनी तुळजापूर येथील भाजपचे नगराध्यक्ष पदाचे उमेदवार पिटू गंगणेला सोबत घेऊन आमचे नातेवाईक करत आलेल्या तुळजापूर नळदुर्ग रस्ते कामावर जात शिवीगाळ केली. जाणीवपूर्वक आम्हाला छेडण्यासाठी ही शिवीगाळ केल्याचा आरोप काँग्रेसचे उमेदवार अमर कदम यांनी केला.या आरोपामुळे राडा प्रकरणात आमदारांचे स्वीय सहाय्यक यांचं नाव जोडलं जात आहे.

जिल्ह्यातील काँग्रेसच्या नेत्या विधानपरिषद सदस्या डॉ. प्रज्ञा सातव यांनी काँग्रेसला सोडचिठ्ठी दिल्यामुळे जिल्ह्यात काँग्रेस पक्षात खळबळ उडाली. त्याआधी पक्षांतर्गत कुरबुरीमुळेच माजी आमदार भाऊराव पाटील गोरेगावकर यांनीही एकनाथ शिंदेंच्या शिवसेनेत प्रवेश केला होता. एकापाठोपाठ एक असे हिंगोली जिल्ह्यातील दोन काँग्रेसचे आजी-माजी आमदार पक्ष सोडून गेल्यानंतर आता पक्षाची धुरा जिल्हाध्यक्ष सुरेश आप्पा सराफ यांच्याकडे सोपवण्यात आली आहे.

महापालिका निवडणुकीची घोषणा होतात मुख्यमंत्री देवेंद्र फडणवीस यांनी उपमुख्यमंत्री एकनाथ शिंदे यांच्या शिवसेनेबरोबर आपण युती करणार असल्याचं जाहीर केलं होतं. त्यानंतर आज पहिल्यांदाच पुणे महापालिका निवडणुकीसाठी भाजप आणि शिवसेनेच्या नेत्यांची बैठक पुण्यामध्ये संपन्न झाली आहे. या बैठकीपूर्वी शिंदे सेनेकडून भाजपसोबत युतीसाठी 31 जागांचा प्रस्ताव दिला असल्याचा सांगितलं जात आहे. पण या बैठकीला शिंदेंच्या सेनेकडून विधान परिषदेच्या उपसभापती नीलम गोऱ्हे, माजी मंत्री आणि आमदार विजय शिवतारे ,पुण्यातील शिवसेनेचे शहर प्रमुख नाना भानगिरे आणि अजय भोसले हे उपस्थित होते.तर दुसरीकडे भाजपकडून खासदार मुरलीधर मोहोळ, मंत्री चंद्रकांत पाटील, माधुरी मिसाळ, शहराध्यक्ष धीरज घाटे आणि माझी सभागृह नेते गणेश बिडकर यांची उपस्थित होते. पण पक्षाचे महानगर प्रमुख असलेले रवींद्र धंगेकर मात्र या बैठकीला उपस्थित असल्याचे पाहायला मिळाले नाही. त्यामुळे त्यांना या बैठकीपासून दूर ठेवल्याची आता चर्चा सुरू झाली आहे.

आगामी बीएमसी निवडणुकीच्या पार्श्वभूमीवर मुंबईतील मतदार याद्यांमध्ये मोठ्या अनियमितता असल्याचा आरोप काँग्रेसने केला आहे. तर तीन वेळा नगरसेविका राहिलेल्या शीतल म्हात्रे यांनी पत्रकार परिषदेत ‘अदृश्य इमारती’, अस्तित्वात नसलेले मतदार आणि कोरे EPIC कार्ड उघड केले. तसेच त्यांनी अंतिम यादीत दुरुस्ती न झाल्याने निवडणूक आयोगावर ताशेरे ओढले आहेत.

राष्ट्रवादी काँग्रेसचे नेते तथा राज्याचे क्रीडा व युवक कल्याण मंत्री माणिकराव कोकाटे यांनी अखेर आपल्या मंत्रीपदाचा राजीनामा दिला आहे. कोकाटे यांनी पाठवलेला राजीनामा उपमुख्यमंत्री आणि राष्ट्रवादी काँग्रेसचे प्रमुख अजित पवार यांनी तत्वतः स्विकारला आहे. यामुळं आता महत्वाच्या घडामोडी घडण्याची शक्यता असून कोकाटेंविरोधात अटक वॉरंटही निघाला असून त्यांना कोणत्याही क्षणी अटक होवू शकते.

मुंबई आणि पुणे महापालिकांमध्ये राष्ट्रवादी काँग्रेस (शरदचंद्र पवार) पक्षासोबत निवडणूक लढवण्याबाबत दोन्ही पक्षांमध्ये सध्या चर्चा सुरू आहे. या चर्चांचा पुढचा टप्पा म्हणून उद्या पुण्यात ठाकरे गटाची शिवसेना आणि राष्ट्रवादी काँग्रेसच्या नेत्यांची बैठक होणार असल्याचे शिवसेना (ठाकरे गट) नेते सचिन अहिर यांनी सांगितले. ठाकरे गटाने एक अट स्पष्ट करत महत्त्वाची भूमिका मांडली आहे. पुणे आणि पिंपरी-चिंचवड महापालिकेमध्ये जर राष्ट्रवादी काँग्रेस (शरदचंद्र पवार) पक्षाने राष्ट्रवादी काँग्रेस (अजित पवार गट) सोबत जाण्याचा निर्णय घेतला, तर अशा परिस्थितीत आम्ही शरद पवारांच्या राष्ट्रवादीसोबत निवडणूक लढवणार नाही, असे ठामपणे सचिन अहिर यांनी सांगितले.

माणिकराव कोकाटे सध्या मुंबईतील लीलावती रुग्णालयात उपचार घेत आहेत. या पार्श्वभूमीवर त्यांना रुग्णालयातूनच अटक केली जाणार का, याबाबत चर्चा रंगली असून नाशिक पोलीस आयुक्त संदीप कर्णिक यांनी या प्रकरणाची सविस्तर माहिती वरिष्ठ पोलीस अधिकाऱ्यांकडून मागवली आहे. त्यानंतर कोकाटेंच्या अटकेसाठी नाशिक पोलिसांचे पथक मुंबईला रवाना झाले असल्याचे समजते. कोकाटे यांच्या अटकेचे वॉरंटही तयार आहे.

शासकीय सदनिका लाटण्यासाठी बनावट कागदपत्रे सादर करून सरकारची फसवणूक केल्याच्या 1995 सालच्या प्रकरणात राष्ट्रवादी काँग्रेसचे आमदार आणि माजी क्रीडामंत्री माणिकराव कोकाटे यांच्या अडचणी वाढताना दिसत आहेत. नाशिक जिल्हा न्यायालयाने दोन वर्षांची कारावासाची शिक्षा कायम ठेवल्यानंतर प्रथम वर्ग न्यायालयाने काढलेल्या अटक वॉरंटनंतर आता नाशिक पोलिसांची हालचाल वेगाने सुरू झाली आहे. माणिकराव कोकाटे सध्या मुंबईतील लीलावती रुग्णालयात उपचार घेत आहेत. या पार्श्वभूमीवर त्यांना रुग्णालयातूनच अटक केली जाणार का, याबाबत चर्चा रंगली असून नाशिक पोलीस आयुक्त संदीप कर्णिक यांनी या प्रकरणाची सविस्तर माहिती वरिष्ठ पोलीस अधिकाऱ्यांकडून मागवली आहे.

पैठणमध्ये उमेदवाराच्या घरासमोर जादूटोण्याचा प्रयत्न झाल्याचा धक्कादायक प्रकार समोर आला आहे. ठाकरे गटाच्या उमेदवार मंगल कल्याण मगरे यांच्या घरासमोर लिंबू, नारळ, हळद, कुंकू एक बाहुली ,टाचण पिना आणि पुजलेली टोपली आढळून आलीये. या प्रकरणाची सखोल चौकशी व्हावी अशी मागणी होत आहे. यामुळे पैठण शहरात एकच खळबळ उडाली आहे.

मुंबईतील बांद्रा न्यायालयाला बॉम्ब ठेवल्याची धमकी मिळाल्याने आज मोठी खळबळ उडाली. ई-मेलद्वारे धमकी मिळताच सुरक्षेच्या कारणास्तव न्यायालयाचा परिसर तातडीने रिकामा करण्यात आला. पोलिस आणि बॉम्ब निरोधक पथकाने घटनास्थळी पोहोचून तपास सुरू केला. या पार्श्वभूमीवर दुपारी 3 वाजेपर्यंत न्यायालयाचे सर्व कामकाज तहकूब करण्यात आले.

सांगली जिल्ह्यातील राजकारणात मोठी उलथापालथ होत असून काँग्रेस पक्षाला जबर धक्का बसला आहे. सांगली–मिरज–कुपवाड महानगरपालिकेचे दोन माजी महापौर, एक माजी उपमहापौर आणि किमान १२ माजी नगरसेवक अजित पवारांच्या राष्ट्रवादीमध्ये प्रवेश करणार असल्याने जिल्ह्यात राजकीय भूकंप झाला आहे. आगामी महापालिका निवडणुकीच्या पार्श्वभूमीवर हा पक्षप्रवेश सांगली जिल्ह्यातील राजकीय समीकरणे बदलणारा ठरणार असल्याचे मानले जात आहे.

छत्रपती संभाजीनगरजवळील ओहर गावात जमिनीच्या वादाने हिंसक वळण घेतलं. जुन्या वादातून 11 जणांच्या टोळक्याने माजी सरपंच दादा सांडू पठाण यांची लोखंडी रॉड आणि लाठ्या-काठ्यांनी हल्ला करून हत्या केली. या हल्ल्यात अन्य तिघे जखमी झाले असून, संतप्त जमावाने आरोपींच्या दुकानांची तोडफोड केली. त्यामुळे गावात मोठा तणाव निर्माण झाला आहे. पोलिसांनी परिस्थिती नियंत्रणात आणण्यासाठी दंगा काबू पथक तैनात केले असून, याप्रकरणी आतापर्यंत दोघांना अटक करण्यात आली आहे....

काँग्रेस विधान परिषदेच्याआमदार प्रज्ञा सातव यांनी आमदारकीचा राजीनामा दिला आहे, त्यांनी राजीनामा विधीमंडळ सचिवांकडे सुपूर्द केला. त्या भाजपमध्ये प्रवेश करणार असल्याची चर्चा आहे.

पुणे महापालिकेसाठी भाजप आणि एकनाथ शिंदेंच्या शिवसेनेत बैठक होत आहे. या बैठकीत भाजपकडून आज चंद्रकांत पाटील, चंद्रशेखर बावनकुळे आणि इतर मुख्य शहरातील पदाधिकारी उपस्थित राहणा तर शिवसेनेकडून उदय सामंत, निलम गोऱ्हे, शहर प्रमुख नाना भानगिरे उपस्थित राहणार मात्र, एकनाथ शिंदेंचे पुणे महानगर प्रमुख असलेल्या रवींद्र धंगेकर यांना या बैठकीचे निमंत्रण देण्यात आलेले नाही.

आमदारा प्रज्ञा सातव या काँग्रेसच्या प्राथमिक सदस्यत्वाचा राजीनामा देणार आहेत. त्या विधान परिषदेच्या आमदारकीची राजीनामा देखील देण्याची शक्यता आहे. त्यांनी विधानसभा अध्यक्षांना भेटण्यासाठी वेळ मागितल्याची माहिती आहे.

महाराष्ट्रभूषण प्रसिद्ध शिल्पकार राम सुतार यांचे मध्यरात्री एकच्या सुमारास निधन झाले. नुकताच महाराष्ट्रभूषण पुरस्कार प्रदान करण्यात आला. नुकतीच त्यांनी वयाची 100 वर्षे पूर्ण केली होती.

महापालिका निवडणुकीच्या पार्श्वभूमीवर माणिकराव कोकाटे यांचा सहज राजीनामा घेणे शक्य असताना मुख्यमंत्री फडणवीस यांनी तसे केले नाही. याचा अर्थ ते कोकाटेंच्या आडून राष्ट्रवादी काँग्रेसची प्रतिमा मलिन करत असल्याचा दावा शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांनी केला आहे.